သျှမ်းပြည်တောင်ပိုင်း နမ့်စန်မြို့အခြေစိုက် စစ်ကောင်စီလေတပ်စခန်းသို့ ပို့ဆောင်မည့် လေယာဉ်ဆီတင် ဆီဘောက်ဆာကားကို စစ်ကောင်စီအရာခံဗိုလ်နှင့်အတူ အောင်ဆန်းမြေ ပြည်သူ့ကာကွယ်ရေးတပ်ဖွဲ့မှ ဖမ်းဆီးရမိခဲ့ကြောင်း သတင်းသိရသည်။

ယမန်နေ့ (ဇွန်လ ၈ ရက်) နံနက်ပိုင်းတွင် မကွေးတိုင်း နတ်မောက်မြို့နယ်ဘက်မှ ရန်ကုန်-မန္တလေး အမြန်လမ်းပေါ်သို့ ထွက်ခွာလာသော စစ်ကောင်စီ၏ လေယာဉ်ဆီတင် ဆီဘောက်ဆာကားကို အောင်ဆန်းမြေ ပြည်သူ့ကာကွယ်ရေးတပ်ဖွဲ့ (Aung San’s Land Natmauk) မှ မိုင်တိုင် (၂၆၂) အနီးတွင် ဖမ်းဆီးရမိခဲ့သည်။

နမ့်စန်လေတပ်စခန်းဌာနချုပ်သို့ သယ်ယူပို့ဆောင်မည့် ယာဉ်အမှတ် 2B-8525 ဆီဘောက်ဆာကားထဲတွင် လေယာဉ်ဆီအပြည့်နှင့်အတူ စစ်ကောင်စီတပ် အရာခံဗိုလ် မင်းထွဋ်၏ လက်အောက်ငယ်သား နှစ်ဦးတို့အား ဖမ်းဆီးရမိခဲ့ပြီး ၎င်းတို့ကို စစ်ဆေးနေကြောင်း အောင်ဆန်းမြေ PDF တပ်ဖွဲ့မှ ခေတ်သစ်သတင်းဌာနသို့ ယမန်နေ့တွင် ဖြေကြားထားသည်။

ယခုဖမ်းဆီးရမိသည့် လေယာဉ်ဆီတင်ကားသည် နမ့်စန်လေတပ်စခန်းရှိ လေယာဉ်၊ ရဟတ်ယာဉ်များ စစ်ဆင်ရေးနှင့် လေ့ကျင့်ပျံသန်းရေး၊ မော်တော်ယာဉ်နှင့် ရေစက်၊ မီးစက်များ အသုံးပြုရန်အတွက် လေယာဉ်ဆီ (JET-A1)၊ အောက်တိန်း Octane နှင့် ဒီဇယ်ဆီ High Speed Diesel ဆီများ သယ်ယူလာကြောင်း ဇွန်လ (၅) ရက် နေ့စွဲဖြင့် တပ်ကိုယ်စားလှယ်စေလွှတ်သည့် စာထဲတွင် ရေးသားထားသည်။

စစ်ကောင်စီတပ်၏ လေကြောင်းတိုက်ခိုက်မှုကြောင့် ၂၀၂၃ ဇန်နဝါရီလမှ ၂၀၂၅ မေလအထိ နှစ်နှစ်ကျော်ကာလအတွင်း အရပ်သားပြည်သူ (၃၀၀၀) ကျော် သေဆုံးခဲ့ရကြောင်း NUG မှ မေလ တတိယပတ်တွင် ထုတ်ပြန်ထားသည်။

ရန်ကုန်တိုင်းနှင့် နေပြည်တော်မှ လွဲ၍ ပြည်နယ်နှင့်တိုင်း (၁၃) ခုစလုံးတွင် လေကြောင်းဗုံးကြဲ တိုက်ခိုက်မှုပေါင်း (၂၆၀၀) ကျော်အထိ ရှိခဲ့ကြောင်း NUG ၏ ထုတ်ပြန်ချက်ထဲတွင် ဖော်ပြထားသည်။

အလားတူ မတ်လ (၂၈) ရက်တွင် အင်အားပြင်း စစ်ကိုင်းငလျင်ကြီး လှုပ်ခတ်ခဲ့ပြီးနောက် စစ်ကောင်စီတပ်သည် ယာယီအပစ်အခတ် ရပ်စဲကြောင်း ကြေညာခဲ့သော်လည်း စာသင်ကျောင်းကဲ့သို့ အရပ်သားများကို ပစ်မှတ်ထားသည့် လေကြောင်းဗုံးကြဲ တိုက်ခိုက်မှုကို နိုင်ငံတဝှမ်း လုပ်ဆောင်ခဲ့သည်။

စစ်ကောင်စီတပ်ကို ရုရှားနှင့် တရုတ်နိုင်ငံများမှ ကျောထောက်နောက်ခံပေးမှုကြောင့် လေကြောင်းဗုံးကြဲ တိုက်ခိုက်ခြင်းကို ယခင်ကထက် ပိုမိုတိုးမြှင့်လုပ်ဆောင်လာကြောင်း သုံးသပ်မှုများလည်း ရှိနေပြီး မြန်မာနိုင်ငံအပေါ် လေယာဉ်ဆီရောင်းချမှု ပိတ်ပင်ရေး ဒဏ်ခတ်ပိတ်ဆို့မှု ချမှတ်ရန် Justice For Myanmar နှင့် The Sentry ကဲ့သို့ အရပ်ဘက်အဖွဲ့အစည်းများမှ ယမန်နှစ် ၂၀၂၄ ကတည်းက တောင်းဆိုထားသည်။