သျှမ်းပြည် မိုးမိတ်မြို့နယ်တွင် ကချင်လွတ်လပ်ရေးတပ် KIA၊ PDF ပူးပေါင်းတပ်နှင့် စစ်ကော်မရှင်တပ်တို့အကြား လက်နက်ကြီးဖြင့် အပြန်အလှန် ပစ်ခတ်နေကြောင်း စုံစမ်းသိရသည်။

ယနေ့ (ဇန်နဝါရီ ၃၀ ရက်) နံနက် ၈ နာရီခွဲခန့်တွင် စစ်ကော်မရှင်တပ် ပြန်လည်ထိန်းချုပ်ထားသည့် မိုးမိတ်မြို့နယ်ရှိ မိုးဟောက်နှင့် ပသင် ကျေးရွာအုပ်စုဘက်တွင် ကချင်လွတ်လပ်ရေးတပ် KIA၊ PDF ပူးပေါင်းတပ်နှင့် စစ်ကော်မရှင်တပ်တို့အကြား လက်နက်ကြီးဖြင့် အပြန်အလှန် ပစ်ခတ်ခဲ့ကြောင်း ဒေသခံများက ပြောသည်။

“ဒီမနက်မှာ မိုးဟောက်ဘက်ကို PDF နဲ့ ကျောင်းသားတပ်ကော စစ်တပ်ဘက်ကကော လက်နက်ကြီးနဲ့ အပြန်အလှန် ချနေကြတာ။ စစ်တပ်က မိုးမိတ်-တွင်းငယ်-သပိတ်ကျင်း လမ်းပိုင်းကို ပြန်ရချင်လို့ အဲ့ဘက်မှာ နေ့တိုင်းနီးပါး တိုက်ပွဲဖြစ်နေတယ်။ တိုက်ပွဲပြင်းတာကတော့ မြို့နားက ရေတံခွန်ရွာဘက်မှာ ဒရုန်းတွေနဲ့ပါ ဗုံးကြဲတာ” ဟု မိုးမိတ်ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။

KIA၊ PDF ပူးပေါင်းတပ်နှင့် စစ်ကော်မရှင်တပ်တို့အကြား အပြန်အလှန် လက်နက်ကြီး ပစ်ခတ်နေသည့် မိုးဟောက်ကျေးရွာအုပ်စုသည် မိုးမိတ်မြို့နှင့် ၁၆ မိုင်ခန့် ကွာဝေးပြီး မိုးမိတ်-တွင်းငယ်-သပိတ်ကျင်း လမ်းပိုင်းတွင် အရေးပါကြောင်း ဒေသခံများထံမှ သိရသည်။

မိုးကုတ်မြို့နှင့် မိုးမိတ်မြို့များမှ တအာင်း(ပလောင်) အမျိုးသားလွတ်မြောက်ရေးတပ်မတော် TNLA တပ်ဆုတ်ခဲ့ပြီးနောက် စစ်ကော်မရှင်တပ် ပြန်လည်ဝင်ရောက် တပ်စွဲထားသည်မှာ နှစ်လကျော် ရှိလာသော်လည်း မြို့အနီးတဝိုက်ရှိ PDF တပ်ဖွဲ့များနှင့် နေ့စဉ်နီးပါး တိုက်ပွဲဖြစ်ပွားနေပြီး အုပ်ချုပ်ရေးယန္တရား မလည်ပတ်နိုင်သေးကြောင်း ဒေသခံများက ပြောသည်။

လက်ရှိတွင် တောင်ကြီးမြို့နှင့် မန္တလေးမြို့ဘက်တွင် ရွှေ့ပြောင်း တာဝန်ထမ်းဆောင်နေရသည့် စစ်ကော်မရှင်လက်အောက်ခံ ဌာနဆိုင်ရာဝန်ထမ်းများကို မိုးကုတ်မြို့နှင့် မိုးမိတ်မြို့သို့ ဖေဖော်ဝါရီလတွင် ပြန်လည်နေရာချထားရန် ညွှန်ကြားထားကြောင်း သိရသည်။

အခြားတစ်ဘက်တွင် စစ်ကော်မရှင်တပ် ထိန်းချုပ်ထားသည့် မိုးမိတ်မြို့နယ်နှင့် ကချင်လွတ်လပ်ရေးတပ် KIA ထိန်းချုပ်ထားသည့် မဘိမ်းမြို့နယ် အစပ်ရှိ မြစ်ဆုံကျေးရွာဘက်တွင် KIA ၊ ABSDF ၊ PDF ပူးပေါင်းတပ်တို့ကို TNLA ဘက်မှ ဟန့်တားထားကြောင်း ဒေသခံများက ပြောသည်။

“၁၀၂၇ စစ်ဆင်ရေး”တွင် စစ်ကော်မရှင်တပ်ကို တိုက်ခိုက်ခဲ့သော်လည်း လက်ရှိတွင် အပစ်အခတ် ရပ်စဲရေး လက်မှတ်ထိုးထားသည့် TNLA နှင့် MNDAA တပ်တို့သည် ၎င်းတို့ ထိန်းချုပ်ထားနိုင်သည့် နယ်မြေရှိ အခြားသော တိုင်းရင်းသား လက်နက်ကိုင်တပ်ဖွဲ့များနှင့် နယ်မြေအငြင်းပွားမှု ဖြစ်ပြီး စစ်ရေးပွတ်တိုက်မှုများ မကြာခဏ ဖြစ်ပွားလာသည်။