သျှမ်းပြည် မြောက်ပိုင်း မိုးမိတ်မြို့နယ်တွင် စစ်ကော်မရှင်တပ် နှင့် တော်လှန်ရေးတပ်ဖွဲ့ PDF တို့ တိုက်ပွဲ ပြင်းထန်ခဲ့ကြောင်း စုံစမ်းသိရသည်။

ယနေ့ ( ဒီဇင်ဘာလ ၂၄ ရက်) မနက်ပိုင်းတွင် မိုးမိတ်မြို့နယ် ရေတံခွန်ကျေးရွာ အနီးတဝိုက်တွင် စစ်ကော်မရှင်တပ် နှင့် တော်လှန်ရေးတပ်ဖွဲ့ PDF တို့ တိုက်ပွဲများဖြစ်ပွားခဲ့ကြောင်း မိုးမိတ်မြို့နယ် ဒေသခံအအမျိုးသားတစ်ဦးက သျှမ်းသံတော်ဆင့်ကို ပြောသည်။

“ မနက်ကတော့ နှစ်ဘက် တိုက်ပွဲတွေဖြစ်နေတာ။ရေတံခွန်ရွာ နဲ့ မန်ကျီးပင်ရွာဘက်မှာပဲ ဖြစ်တာပါ။ မိုးမိတ်နဲ့ သိပ်မဝေးပေမဲ့ ခုထိတော့ အခြေအနေက အသေစိတ်မသိရသေးဘူး။”ဟု မိုးမိတ်မြို့နယ် ဒေသခံအအမျိုးသားတစ်ဦးက ပြောသည်။

ထိုတိုက်ပွဲဖြစ်ပွားသည့် ရေတံခွန်ရွာ နှင့် မန်ကျီးပင်ရွာသည် မိုးမိတ်မြို့ နှင့် ၁၀ မိုင်ဝန်းကျင်သာ ဝေးကြောင်း သိရသည်။

လက်ရှိတွင် မိုးမိတ် – မဘိမ်းလမ်းပိုင်းကို (KIA) က ထိန်းချုပ်ထားပြီး၊မိုးမိတ် – မန်တုံလမ်းကို(TNLA) က ထိန်းချုပ်ထားကာ မိုးမိတ် – မိုးကုတ်လမ်းကို စစ်ကော်မရှင်တပ်ဖွဲ့က ထိန်းချုပ်ထားပါတယ်။

မိုးမိတ်မြို့နယ်တွင် တအာင်း(ပလောင်) အမျိုးသားလွတ်မြောက်ရေးတပ်မတော် TNLA အပြင် ကချင်လွတ်လပ်ရေးတပ် (KIA) ၊ ရှမ်းပြည်တိုးတက်ရေးပါတီ/ ရှမ်းပြည်တပ်မတော် (SSPP/SSA) ၊ မြန်မာနိုင်ငံလုံးဆိုင်ရာ ကျောင်းသားများ ဒီမိုကရက်တစ်တပ်ဦး (ABSDF) နှင့် ပြည်သူ့ကာကွယ်ရေးတပ်ဖွဲ့ PDF များလည်း သွားလာလှုပ်ရှားနေသည်။

ပြီးခဲ့သည့် (ဒီဇင်ဘာလ ၁ ရက်)မှ စတင်ပြီး မိုးကုတ်မြို့နှင့် မိုးမိတ်မြို့မှ TNLA တပ်ဆုတ်ပြီးနောက် တော်လှန်ရေးအင်အားစု PDF တပ်များ ထိန်းချုပ်ထားသည့် နေရာအထိ စစ်ကော်မရှင်တပ်ဘက်မှ မြေပြင် စစ်ကြောင်းထိုး အင်အားတိုးချဲ့ ခဲ့သည်။