သျှမ်းပြည်-မန္တလေးတိုင်းနယ်စပ်ရှိ မိုးကုတ်မြို့တွင် စစ်ကော်မရှင်တပ်ဘက်မှ အင်အားဖြည့် စစ်ကြောင်းထိုးခြင်းကြောင့် တော်လှန်ရေးအင်အားစု PDF တပ်များနှင့် ထိတွေ့တိုက်ပွဲ ပြင်းထန်ခဲ့ကြောင်း စုံစမ်းသိရသည်။

ယမန်နေ့ (ဖေဖော်ဝါရီလ ၈ ရက်) နံနက်ပိုင်းမှ စတင်၍ မိုးကုတ်မြို့နယ်ရှိ ချောင်းကြီးနှင့် ရှမ်းကုန်းစံ ကျေးရွာဘက်တွင် စစ်ကော်မရှင်တပ်နှင့် တော်လှန်ရေးအင်အားစု PDF တပ်များ ထိတွေ့တိုက်ပွဲ ပြင်းထန်ခဲ့ပြီး မိုးကုတ်မြို့ထဲရှိ စစ်ကော်မရှင်တပ်မှ လက်နက်ကြီးများဖြင့် ပစ်ကူပေးခဲ့ကြောင်း ဒေသခံများက ပြောသည်။

ထို့နောက် စစ်ကော်မရှင်ဘက်မှ ယမန်နေ့ ညပိုင်းတွင် အင်အားထပ်ဖြည့်ကာ စစ်ကြောင်းထိုးနေပြီး ယနေ့ (ဖေဖော်ဝါရီလ ၉ ရက်) နေ့လယ်ပိုင်းတွင်လည်း ဂျက်ဖိုက်တာဖြင့် လေကြောင်းကင်းထောက် ပျံသန်းခဲ့ကြောင်း မိုးကုတ်မြို့မှ စစ်ရေးသတင်းရင်းမြစ်တစ်ဦးက ပြောသည်။

“ချောင်းကြီးဘက်ကို စစ်တပ်က အင်အား ၂၀၀ ကျော် တက်သွားတယ်၊ မနေ့က တိုက်ပွဲဖြစ်ပြီးတော့ အကျအဆုံးရှိလို့ ခန ပြန်ဆုတ်သွားသေးတယ်။ ဒီနေ့တော့ နေ့လယ်ပိုင်းမှာ လေကြောင်းကင်းထောက် လာတယ်” ဟု မိုးကုတ်မြို့နယ်မှ စစ်ရေးသတင်းရင်းမြစ် တစ်ဦးက သျှမ်းသံတော်ဆင့်ကို ပြောသည်။

မိုးကုတ်မြို့မှ တအာင်း(ပလောင်) အမျိုးသားလွတ်မြောက်ရေးတပ်မတော် TNLA တပ်ဆုတ်ခဲ့ပြီးနောက် စစ်ကော်မရှင်တပ် ပြန်လည်ဝင်ရောက် တပ်စွဲထားသည်မှာ နှစ်လခွဲကျော် ရှိလာသော်လည်း မြို့အနီးတဝိုက်ရှိ PDF တပ်ဖွဲ့များနှင့် နေ့စဉ်နီးပါး တိုက်ပွဲဖြစ်ပွားနေပြီး အုပ်ချုပ်ရေးယန္တရား မလည်ပတ်နိုင်သေးကြောင်း ဒေသခံများက ပြောသည်။

ဖေဖော်ဝါရီလ (၅) ရက်တွင် မိုးကုတ်မြို့ထဲသို့ စစ်ကော်မရှင်လက်အောက်ခံ ဌာနဆိုင်ရာ ဝန်ထမ်းများ ထပ်မံရောက်ရှိခဲ့ပြီးနောက် မိုးကုတ်မြို့အရှေ့ပိုင်းရှိ နေအိမ်နှင့် ဆိုင်အချို့ကို PDF တပ်များနှင့် ဆက်စပ်သည်ဟုဆိုကာ စစ်ကော်မရှင်ဘက်မှ ချိတ်ပိတ်ခဲ့ကြောင်း ဒေသခံများက ပြောသည်။
 

လက်ရှိတွင် မန္တလေး-သပိတ်ကျင်း-မိုးကုတ်လမ်းပိုင်းတွင် ခရီးသည်တင်ယာဉ်နှင့် ကုန်တင်ယာဉ်များကို စစ်ကော်မရှင်ဘက်မှ အချိန်အကန့်အသတ်ဖြင့် ဖြတ်သန်းခွင့်ပြုထားသော်လည်း ယာဉ်စီးခမြင့်မားနေခြင်းကြောင့် စစ်ဘေးရှောင်များမှာ နေရပ်ပြန်ရန် အခက်အခဲ ကြုံတွေ့နေရကြောင်း သိရသည်။

တရုတ်နိုင်ငံ၏ ကြားဝင်စေ့စပ်မှုကြောင့် စစ်ကော်မရှင်ထံ မိုးကုတ်မြို့ကို TNLA ဘက်မှ ပြန်လည်လွှဲပြောင်းပေးခဲ့ပြီးနောက် အပစ်အခတ်ရပ်စဲရေး သဘောတူခဲ့သော်လည်း မြို့သိမ်းတိုက်ပွဲတွင် အတူပါဝင်ခဲ့သည့် တော်လှန်ရေးအင်အားစု PDF တပ်များနှင့် စစ်ကော်မရှင်တပ်ကြား ထိတွေ့တိုက်ပွဲများ၊ ဒရုန်းဗုံးကြဲ တိုက်ခိုက်မှုများ ဆက်လက်ဖြစ်ပွားနေကြောင်း ဒေသခံများက ပြောသည်။