သျှမ်းပြည်အတွင်းရှိ မြို့နယ် ၁၇ မြို့နယ်တွင် ယနေ့ (ဇန်နဝါရီလ ၁၁) ရက် နံနက်ပိုင်းမှစ၍ ရွေးကောက်ပွဲ အပိုင်း (၂) အတွက် မဲရုံတွင် မဲသွားပေးကြရာ အချို့မြို့နယ်ရှိ မဲရုံတွင် မဲပေးစက်များ ချို့ယွင်းမှု ဖြစ်နေကြောင်း ကိုယ်တိုင်မဲထည့်ခဲ့ကြသူအချို့က ပြောသည်။
စစ်ကော်မရှင်လက်အောက်ခံ ပြည်ထောင်စု ရွေးကောက်ပွဲကော်မရှင်သည် ယခုရွေးကောက်ပွဲတွင် မဲစာရွက်အစား အီလက်ထရောနစ် မဲပေးစက်ကို အသုံးပြုထားသည်။
သို့သော် မဲပေးစက်ကို နှိပ်ခဲ့ရာတွင် မဲပေးကြောင်းစာရွက်မကျလာဘဲ စက်ထဲတွင်ခံနေပြီး ဆက်နှိပ်မရ ဖြစ်နေကြောင်း မောက်မယ်မြို့ရှိ မဲရုံတွင် ကိုယ်တိုင်မဲသွားထည့်ခဲ့သူတစ်ဦးက သျှမ်းသံတော်ဆင့်ကို ပြောသည်။
“မနက်အစောပိုင်းက မဲရုံဖွင့်တော့ မဲပေးစက် error (ချို့ယွင်း) တက်တာ။ စက်ထဲမှာ စက္ကူခံပြီး မကျလာဘူး။ ၁၅ မိနစ်၊ ၂၀ မိနစ်လောက်ကြာတယ်။ သူတို့ ပြင်ဖို့လုပ်ပေမယ့် ပြင်လို့မရဘူး။ အဲ့နဲ့ စက်အသစ်လဲလိုက်ရတာ” ဟု ၎င်းက ပြောသည်။
ယင်းကဲ့သို့ မဲပေးစက် ချို့ယွင်းမှုဖြစ်ပွားခဲ့သောကြောင့် မဲလာပေးကြသည့် ဒေသခံအချို့လည်း ပြန်သွားကြကာ မဲပေးသူနည်းပါး နေကြောင်း ၎င်းက ပြောသည်။
မောက်မယ်မြို့နယ်တွင် ရပ်ကွက် ၇ ခု၊ ကျေးရွာအုပ်စု ၈ စုရှိ မဲရုံ (၃၃) ရုံမှ မဆန္ဒရှင်ပြည်သူများ (၂၂၉၇၇) ဦးရှိပြီး လွှတ်တော် (၃) ရပ်အတွက် လွှတ်တော်ကိုယ်စားလှယ်လောင်း (၁၄) ဦးနှင့် တိုင်းရင်းသားလွှတ်တော် အလိုက် ကိုယ်စားလှယ်လောင်းများ ဝင်ရောက်ယှဉ်ပြိုင်နေကြောင်း စစ်ကော်မရှင်က ယနေ့ ဇန်နဝါရီလ ၁၁ ရက်နေ့တွင် သတင်းထုတ်ပြန်သည်။
အလားတူ သျှမ်းပြည်အရှေ့ပိုင်း မိုင်းဖြတ်မြို့တွင်လည်း ယနေ့ နံနက်ပိုင်းက မဲရုံတွင် မဲသွားထည့်ကြရာ မဲပေးစက် ချို့ယွင်းမှုဖြစ်ခဲ့ကြောင်း ကိုယ်တိုင်မဲသွားထည့်ခဲ့သည့် မိုင်းဖြတ်မြို့ခံတစ်ဦးက ပြောသည်။
“ဒီနေ့ မနက်မဲသွားထည့်တာ၊ စက်ကဘာဖြစ်တာလဲတော့ မသိဘူး။ ပုံမှန်ဆိုရင် မဲပေးဖို့အတည်ပြုတဲ့ အချက်ပေးသံကို စောင့်ရတယ်လေ။ အခုက အသံလည်းမထွက်လာ၊ စက္ကူဖြတ်ပိုင်းလည်း မကျလာတော့ သူတို့စောင့်ခိုင်းတယ်။ ပြီးတော့ ပြန်နှိပ်ခိုင်းတယ်၊ ကျနော်လည်း မနှိပ်ဘဲ ထွက်လာလိုက်တာ” ဟု ၎င်းက ပြောသည်။
ယနေ့ ရွေးကောက်ပွဲ အပိုင်း (၂) ကို သျှမ်းပြည် မြောက်ပိုင်းမှ တန့်ယန်း၊ မိုင်းရယ်၊ တောင်ပိုင်းမှ ရွာငံ၊ ဆီဆိုင်၊ ကလော၊ ရပ်စောက်၊ ကွန်ဟိန်း၊ မိုင်းပန်၊ မောက်မယ်၊ မိုင်းကိုင်၊ လဲချားနှင့် အရှေ့ပိုင်းမှ မိုင်းခတ်၊ မိုင်းပျဉ်း၊ မိုင်းဖြတ်၊ မိုင်းတုံ၊ မိုင်းယောင်းနှင့် မိုင်းယန်းတွင် ကျင်းပနေကြောင်း သိရသည်။
Leave a Comments