သျှမ်း-မန္တလေးနယ်စပ် တအာင်း(ပလောင်) အမျိုးသားလွတ်မြောက်ရေးတပ်မတော် TNLA ထိန်းချုပ်ထားသည့် မိုးကုတ်မြို့ပေါ်ရှိ KTV များကို ရက်အကန့်သတ်မရှိ ပိတ်ခိုင်းထားကြောင်း သတင်းသိရသည်။

ပြီးခဲ့သည့် စက်တင်ဘာလ ၁၃ ရက်နေ့မှ စပြီး မိုးကုတ်မြို့ပေါ်ရှိ KTV ဆိုင်များကို တအာင်း(ပလောင်) အမျိုးသားလွတ်မြောက်ရေးတပ်မတော် TNLA လက်အောက်ခံ ရဲတပ်ဖွဲ့များက လိုက်လံသတိပေးပြီးနောက် ဆိုင်များကို ရက်အကန့်အသတ်မရှိ ပိတ်ထားခဲ့ရကြောင် မိုးကုတ်မြို့ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။

“အခုက မိုးကုတ်မှာ ရှိတဲ့ KTV ဆိုင်တွေ အကုန် ပိတ်ထားရတယ်။ ရဲတွေ သတိပေးတယ်လို့ပဲ သိရတယ်၊ ဘာကြောင့်လဲ ဆိုတာတော့ အကြောင်းအရင်း တိတိကျကျ မသိရဘူး”ဟု မိုးကုတ်မြို့ ဒေသခံ အမျိုးသားတစ်ဦးက ပြောသည်။

လက်ရှိ မိုးကုတ်မြို့ပေါ်တွင် ဖွင့်လှစ်ထားသည့် KTV ဆိုင် ၅ ဆိုင်ထက်မနည်း ရှိနေကြောင်း ဒေသခံများက ပြောသည်။

အလားတူ စက်တင်ဘာလ ပထမပတ် အတွင်းကလည်း TNLA ထိန်းချုပ်ထားသည့် နမ့်ခမ်းမြို့ပေါ်မှ KTV ဆိုင်နှင့် အနှိပ်ခန်းများကို ရက်အကန့်သတ်မရှိ ပိတ်ခိုင်းထားခဲ့ကြောင်း သိရသည်။

KTV ဆိုင်များကို ပိတ်ရန် TNLA မှ အသိပေး ကြေညာထားပြီး စည်းကမ်း ချိုးဖောက်ပါက ပြင်းပြင်းထန်ထန် အရေးယူသွားမည်ဖြစ်ကြောင်း သိရသည်။