သျှမ်းပြည် သိန္နီမြို့နယ် စယ်အူကျေးရွာအုပ်စု မန်ပန်ရွာတွင် တရုတ်ကျောင်းဆရာမတစ်ဦး မုဒိမ်းကျင့်ခံရပြီး သတ်ဖြတ်ခံထားရကြောင်း ဒေသခံများက ပြောသည်။

ကိုးကန့်တပ်ဖွဲ့ (MNDAA) ထိန်းချုပ်ထားသည့် သိန္နီမြို့နယ်တွင် အဆိုပါ မုဒိမ်းကျင့် သတ်ဖြတ်ခံရသူမှာ စယ်အူကျေးရွာအုပ်စု မန်ပန်ရွာရှိ တရုတ်ကျောင်း၌ စာသင်ပေးနေသည့် အသက် (၅၀) နှစ်ခန့်အရွယ် Wu Yin Fen ဆိုသူ အမျိုးသမီးဖြစ်ကြောင်း ၎င်းနှင့် နီးစပ်သူတစ်ဦးက သျှမ်းသံတော်ဆင့်ကို ပြောသည်။

ဖြစ်စဉ်မှာ သြဂုတ်လ ၂၈ ရက် နံနက်ပိုင်းတွင် Wu Yin Fen ၏ ရုပ်အလောင်းကို ၎င်းနေအိမ်ရှိ အိပ်ခန်းထဲတွင် အဝတ်ဗလာဖြင့် တွေ့ရှိခဲ့ပြီး လည်ပင်းနှင့် လက်များတွင် ဓားပြတ်ရှဒဏ်ရာများ တွေ့ရှိရသဖြင့် မုဒိမ်းကျင့်ပြီး သတ်ဖြတ်ခံရခြင်း ဖြစ်နိုင်ကြောင်း ဒေသခံများက ပြောဆိုသည်။

“ဘောင်းဘီ ဝတ်မထားဘူး၊ ပြီးတော့ ဘောင်းဘီပေါ်မှာလည်း သွေးတွေ ပြည့်နေတယ်။ လည်ပင်းနဲ့ လက်မှာလည်း ဖြတ်ခံထားရတယ်။ ဖြစ်တာကတော့ ညတုန်းက ဖြစ်သွားတာ၊ အလောင်းကို နောက်နေ့ မနက်မှ သူ့ကုတင်နားမှာပဲ ပြန်တွေ့တာ” ဟု သေဆုံးသူနှင့် နီးစပ်သူတစ်ဦးက သျှမ်းသံတော်ဆင့်ကို ပြောသည်။

ယခုဖြစ်စဉ် ဖြစ်ပွားခဲ့သည့် မန်ပန်ရွာသည် သိန္နီမြို့နယ်အတွင်းရှိ ပန်နားရွာနှင့် မောက်စလီရွာ အကြားတွင် တည်ရှိပြီး မြို့နှင့် ၆ မိုင်သာ ကွာဝေးသည်။

သေဆုံးသူ၏ ရုပ်အလောင်းကို ကိုးကန့်တပ် MNDAA က သယ်ဆောင်သွားခဲ့ပြီး ယင်းသေဆုံးမှုနှင့် ပတ်သက်၍ သတင်းအချက်အလက် အသေးစိတ်များအား မသိရှိရဘဲ Wu Yin Fen သေဆုံးမှုနှင့် ပတ်သက်၍ ကိုးကန့်တပ် MNDAA ဘက်က သတင်းဖုံးကွယ်ထားသည်ဟု ဒေသခံများက ပြောသည်။

“ကျမလည်း သေချာမသိရသေးဘူး၊ သူများတွေလည်း စုံစမ်းနေသေးတယ်။ ဆရာမ အခုလို ဖြစ်သွားမယ်ဆိုတာ ထင်ထောင် မထင်ထားဘူး။ ကျမတို့ဆို အသေကြောက်တာ” ဟု သေဆုံးသူနှင့် နီးစပ်သူတစ်ဦးက ပြောသည်။

ပြီးခဲ့သည့် သင်္ကြန်ကာလတွင်လည်း သိန္နီမြို့မှာ မိန်းကလေးငယ်တစ်ဦး မုဒိမ်းကျင့်ခံရသည့် ဖြစ်စဉ်တစ်ခု ဖြစ်ပွားခဲ့ကြောင်း ဒေသခံများက ပြောဆိုသည်။

သို့သော် သိန္နီမြို့နယ်ကို ထိန်းချုပ်ထားသည့် ကိုးကန့်တပ် MNDAA ဘက်က သတင်းဖုံးကွယ်ထားသဖြင့် သတင်းပျံ့နှံ့လာခဲ့ခြင်း မရှိကြောင်း ဆိုသည်။

၂၀၂၃ ခုနှစ် စက်တင်ဘာလကုန်ပိုင်းမှစ၍ သိန္နီမြို့ကို ကိုးကန့်တပ် MNDAA ထိန်းချုပ်လာပြီးနောက်ပိုင်း မြို့ထဲတွင် တရုတ်စီးပွားရေးသမားများ အများအပြား ဝင်ရောက်လာနေပြီး လူသူနေထိုင်ခြင်းမရှိသည့် အိမ်နှင့် ဆိုင်ခန်းများကို ဈေးကြီးပေးပြီး ဌားရမ်းကာ နေထိုင်နေကြကြောင်း ဒေသခံများက ပြောသည်။

ကိုးကန့်တပ် MNDAA ၂ နှစ်နီးပါး ထိန်းချုပ်ထားသည့် သိန္နီမြို့ထဲသို့ ယခု စက်တင်ဘာလ ၁၉ ရက်နေ့မှ စ၍ စစ်ကော်မရှင် လက်အောက်ခံ ဌာနဆိုင်ရာ ဝန်ထမ်းများ ပြန်ဝင်လာတော့မည်ဟု ဒေသခံများက ပြောသည်။