သျှမ်းပြည် ကွတ်ခိုင်မြို့နယ်တွင် ကိုးကန့်တပ်ဖွဲ့ MNDAA ထိန်းချုပ်ထားသည့် ရုံးများထဲတွင် မြန်မာနိုင်ငံတော်အလံကို ပြန်လည်လွှင့်ထူထားပြီး TNLA ဘက်မှလည်း စာသင်ကျောင်းများ အရေးပေါ် ပိတ်ထားကြောင်း စုံစမ်းသိရသည်။

ယမန်နေ့ (သြဂုတ်လ ၂၇ ရက်) တွင် ကွတ်ခိုင်မြို့ပေါ်ရှိ ကိုးကန့်တပ်ဖွဲ့ MNDAA ထိန်းချုပ်ဘက်ခြမ်းရှိ ဌာနဆိုင်ရာ ရုံးများထဲတွင် ၎င်းတို့၏ အထူးဒေသ(၁) အလံနှင့်အတူ မြန်မာနိုင်ငံတော်အလံကို အလည်ထား၍ ပြန်လည်လွှင့်ထူထားကြောင်း ကွတ်ခိုင်မြို့ ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်.

“ကွတ်ခိုင်မှာတော့ ကိုးကန့် အုပ်ချုပ်တဲ့ နေရာမှာက ဘယ်နေရာမဆို မြန်မာအလံနဲ့အတူတူ သူတို့အလံ လွှင့်ထူထားတယ်။ မြန်မာအလံကို အလည်ထားပြီး နည်းနည်းပိုမြှင့်ထားတယ်။ သူတို့ကတော့ ပြည်ထောင်စုထဲမှာနေလို့ အဲ့လိုပဲ ပြောတာပေါ့”ဟု ကွတ်ခိုင်မြို့ ဒေသခံ အမျိုးသားတစ်ဦးက ပြောသည်။

ထို့အပြင် ကွတ်ခိုင်မြို့ပေါ် တအာင်း(ပလောင်) အမျိုးသားလွတ်မြောက်ရေးတပ်မတော် TNLA ထိန်းချုပ်ဘက်ခြမ်းရှိ စာသင်ကျောင်းအချို့ကို ယမန်နေ့ (သြဂုတ်လ ၂၇ ရက်) တွင် အရေးပေါ် ပိတ်ထားပြီး၊ တရုတ်နိုင်ငံ ကူမင်းမြို့တွင် TNLA နှင့် စစ်ကော်မရှင်တို့ တွေ့ဆုံဆွေးနွေး နေစဉ်အတွင်း စစ်ကော်မရှင်၏ လေကြောင်းရန် ကာကွယ်ရေးအတွက် ပြင်ဆင်ခြင်းဖြစ်နိုင်ကြောင်း ကွတ်ခိုင်မြို့ ဒေသခံ အမျိုးသားတစ်ဦးက သုံးသပ်ပြောဆိုသည်။

“ကွတ်ခိုင်မှာ TNLA ထိန်းချုပ်တဲ့ နေရာတချို့ရဲ့ ကျောင်းတွေလည်း ပိတ်ထားတာ ဟုတ်ပါတယ်။ လေကြောင်းရန် ကာကွယ်ဖို့ပေါ့။ လေကြောင်းက အချိန်မရွေး လာပစ်နိုင်လို့ သတိထားတဲ့ အနေနဲ့ပေါ့” ကွတ်ခိုင်မြို့ ဒေသခံ အမျိုးသားတစ်ဦးက ပြောသည်။

တရုတ်၏ ကြားဝင်စေ့စပ်မှုဖြင့် စစ်ကော်မရှင်နှင့် MNDAA တို့ တရားဝင် အပစ်အခတ် ရပ်စဲရေး သဘောတူနိုင်ခဲ့ပြီးနောက် MNDAA ထိန်းချုပ်ထားသည့် မူဆယ်မြို့နယ် ပန်ဆိုင်း(ကြူကုတ်) နယ်စပ်ဂိတ်၊ မုံးကိုးမြို့တို့တွင် မြန်မာနိုင်ငံအလံကို ပြန်လည်လွှင့်ထူထားကြောင်း သိရသည်။

တစ်ချိန်တည်းတွင် ဩဂုတ်လ နောက်ဆုံးပတ်အတွင်း တရုတ်နိုင်ငံ ကူမင်းမြို့၌ TNLA နှင့် စစ်ကော်မရှင်တို့ တွေ့ဆုံဆွေးနွေးခဲ့စဉ် ကျောက်မဲမြို့နှင့် သီပေါမြို့တို့ကို ပြန်လည်စွန့်လွှတ်ရန် TNLA ဘက်မှ သဘောတူခဲ့သော်လည်း စစ်ကော်မရှင်ဘက်မှ နမ့်ဆန်နှင့် မန်တုံမြို့မှလွဲ၍ ကျန်မြို့များအားလုံးကို စွန့်လွှတ်ရန် တောင်းဆိုခဲ့ခြင်းကြောင့် ဆွေးနွေးပွဲမအောင်မြင်ဘဲ ပြီးဆုံးခဲ့ကြောင်း မြန်မာနောင်းသတင်းဌာနမှ ယနေ့တွင် သတင်းဖော်ပြထားသည်။