မြန်မာ-တရုတ်နယ်စပ် ငြိမ်းချမ်းရေးနှင့် တည်ငြိမ်ရေးကို မြှင့်တင်ရန် ကိုးကန့်တပ်ဖွဲ့ MNDAA က သေနတ် (၆၇၆) လက်ကို သိမ်းဆည်းခဲ့ပြီး ထိုထဲမှ သေနတ် (၂၀၀) လက်ကို တရုတ်နိုင်ငံဘက် လွှဲပြောင်းပေးခဲ့ကာ ကျန်ရှိသည့် (၄၇၆) လက်ကို မီးရှို့ဖျက်ဆီးလိုက်ကြောင်း သတင်းသိရသည်။

ကိုးကန့်တပ်ဖွဲ့ MNDAA ထိန်းချုပ်ထားသည့် အထူးဒေသ(၁) သည် မြန်မာ-တရုတ်နယ်စပ်တွင် တည်ရှိပြီး တရားမဝင် လက်နက်နှင့် ပေါက်ကွဲမှုဆိုင်ရာ ပစ္စည်းများ ပျံ့နှံမှုသည် နှစ်ဘက်နယ်စပ်ဒေသ၏ လုံခြုံရေးနှင့် တည်ငြိမ်ရေးကို တိုက်ရိုက်သက်ဆိုက်ကြောင်း ကိုးကန့်သတင်းကွန်ရက်မှ ယနေ့ (ဩဂုတ်လ ၂၅ ရက်) တွင် သတင်းထုတ်ပြန်သည်။

MNDAA လက်အောက်ခံ အထူးဒေသ(၁) ရဲတပ်ဖွဲ့သည် သေနတ် (၆၇၆) လက်ကို သိမ်းဆည်းရမိခဲ့ပြီး ၎င်းတို့အနက် သေနတ်အလက်ရေ (၂၀၀) ကို တရုတ်နိုင်ငံဘက်သို့ လွှဲပြောင်းပေးခဲ့ပြီး ကျန်ရှိသော လေသေနတ်၊ သံချွန်ထိုးသေနတ်များ အပါအဝင် တရားမဝင်သေနတ် (၄၇၆) လက်ကို မီးရှို့ဖျက်ဆီးခဲ့ကြောင်း ထုတ်ပြန်ချက်ထဲတွင် ရေးသားထားသည်။

ယခုကဲ့သို့ သေနတ်ဖျက်ဆီးသည့် လုပ်ငန်းစဉ်သည် နိုင်ငံရေးအရ အရေးပါပြီး နယ်စပ်ဒေသ တည်ငြိမ်ရေးကို ထိန်းသိမ်းရန် ခိုင်မာသော ဆန္ဒရှိခြင်းကို ထင်ဟပ်စေကြောင်း MNDAA ဘက်က ပြောဆိုထားသည်။

အခြားတစ်ဘက်တွင် ‘ဝ’တပ်ဖွဲ့ UWSA သည် မြောက်ပိုင်းမဟာမိတ်တပ်ဖွဲ့များ ဖြစ်ကြသည့် တအာင်း(ပလောင်)တပ်ဖွဲ့ PSLF/TNLA ၊ ကိုးကန့်တပ်ဖွဲ့ MNTJP/MNDAA နှင့် သျှမ်းတပ် SSPP/SSA တို့မှ ထိပ်ပိုင်းခေါင်းဆောင်များကို ‘ဝ’ထိန်းချုပ် ပန်ဆန်းမြို့သို့ ခေါ်ယူပြီး စစ်လက်နက်နှင့် ငွေကြေးများကို မည်သည့်အကြောင်းပြချက်မဆို ကူညီထောက်ပံ့ပေးတော့မည် မဟုတ်ကြောင်း UWSA ၏ တရားဝင် စစ်ရေးဆုံးဖြတ်ချက်ကို WSTV မှ ဩဂုတ်လ ၂၀ ရက်တွင် သတင်းထုတ်ပြန်သည်။