သျှမ်းပြည် ကျောက်မဲမြို့နယ် နောင်ပိန်ရွာထဲသို့ စစ်ကော်မရှင်တပ်မှ လေကြောင်းဖြင့် ဆက်တိုက်ဗုံးကြဲခြင်းကြောင့် ဈေးအနီးရှိ ကုန်မာဆိုင်နှင့် နေအိမ်များ မီးလောင်နေပြီး ပိတ်မိပြည်သူ ထိခိုက်သေဆုံးမှုများကြောင်း စုံစမ်းသိရသည်။

ယနေ့ (ဩဂုတ်လ ၂၃ ရက်) နံနက်ပိုင်းတွင် TNLA ပူးပေါင်းတပ်နှင့် စစ်ကော်မရှင်တပ်တို့ မြေပြင်ထိတွေ့တိုက်ပွဲ ပြင်းထန်နေသည့် ကျောက်မဲမြို့နယ် နောင်ပိန်ရွာထဲသို့ ဂျက်ဖိုက်တာဖြင့် ဗုံးကြဲတိုက်ခိုက်ခဲ့ခြင်းကြောင့် ရပ်ကွက် (၂) ဈေးအနီးရှိ ကုန်မာဆိုင်နှင့် နေအိမ်များ မီးလောင်ကျွမ်းနေပြီး ပိတ်မိပြည်သူ ထိခိုက်သေဆုံးမှု များပြားနေကြောင်း ဒေသခံများက ပြောသည်။

“ရွာထဲကို စစ်သားတွေ ဝင်ကုန်ပြီ၊ အိမ်တွေထဲကိုလည်း တံခါးတွေ အတင်းဆွဲဖွင့်ပြီး ဝင်တာ။ ယောကျ်ားလေးတွေရှိလား ဆိုပြီး ဇွတ်ကို ရှာမေးနေကြတာ၊ ရွာထဲကိုလည်း လုံးဝ ပေးမဝင်တော့ဘူး။ နောင်ပိန်ဈေးပတ်လည်က အိမ်တွေနဲ့ ကိုသားငယ် ကုန်မာဆိုင် မီးလောင်နေတာ။ လမ်းမှာ လူတွေ သေနေတာလည်း သုံးလေးလောင်းတွေ့တယ်လို့ ပြောတယ်”ဟု နောင်ပိန်စစ်ရှောင် အမျိုးသားတစ်ဦးက သျှမ်းသံတော်ဆင့်ကို ပြောသည်။

အလားတူ နောင်ပိန်ရွာအတွင်း ပိတ်မိနေသည့် ပြည်သူများကို စစ်ကော်မရှင်တပ်သားများက သေနတ်ပစ်ခတ်ခြင်းကြောင့် သေဆုံးဒဏ်ရာရသူများလည်း ရှိနေပြီး အသေးစိတ်ကို သျှမ်းသံတော်ဆင့်မှ ဆက်လက်စုံစမ်းနေသည်။

စစ်ကော်မရှင်တပ်လက်အောက်ခံ ဝါဒဖြန့်တယ်လီဂရမ် ချန်နယ်များတွင် နောင်ပိန်ရွာကို မီးရှို့ကာ TNLA ဘက်က တပ်ဆုတ်ခွာသွားကြောင်း ဒရုန်းဖြင့် ရိုက်ထားသည့် ရုပ်သံဗီဒီယိုဖြင့် ဝါဒဖြန့်ထားကြောင်း ဒေသခံများက ပြောသည်။

SSPP ထိန်းချုပ်နယ်မြေဖြစ်ပြီး TNLA ပူးပေါင်းတပ်နှင့် စစ်ကော်မရှင်တပ်တို့ တိုက်ပွဲ ပြင်းထန်နေသည့် နောင်ပိန်တိုက်နယ်ထဲသို့ ယမန်နေ့ (ဩဂုတ်လ ၂၂ ရက်) တစ်ရက်တည်းတွင် ဗုံးအလုံးရေ (၃၉) လုံး ကြဲချတိုက်ခိုက်ခံရပြီး အသက်ဆုံးရှုံးခဲ့ရသော အရပ်သားပြည်သူများ၏ ကျန်ရစ်သူ မိသားစုများနှင့် ထပ်တူဝမ်းနည်းရကြောင်း တအာင်းပြည်ကောင်စီ TLC မှ ယမန်နေ့တွင် ထုတ်ပြန်သည်။

လက်ရှိတွင် နောင်ပိန်တိုက်နယ်မှ ပုံဝိုးတိုက်နယ်ဘက်သို့ ထွက်ပြေးတိမ်းရှောင်နေသည့် စစ်ဘေးရှောင် ၁ သောင်းနီးပါးအတွက် အရေးပေါ် စားနပ်ရိက္ခာ အကူအညီများ လိုအပ်နေကြောင်း စစ်ရှောင်ကူညီသူများထံမှ သိရသည်။