သျှမ်းပြည် နမ့်ခမ်းမြို့တွင် တအာင်း(ပလောင်) အမျိုးသားလွတ်မြောက်ရေးတပ်ဖွဲ့ TNLA မှ ပြစ်ဒဏ်စီရင်မည့် ပြစ်မှုကျူးလွန်သူများကို ကားပေါ်တင်ပြီး မြို့အနှံ့ လှည့်လည်ပြသခဲ့ကြောင်း စုံစမ်းသိရသည်။

ယနေ့ (ဩဂုတ်လ ၂၃ ရက်) နေ့လယ်ပိုင်းတွင် TNLA ထိန်းချုပ်ထားသည့် နမ့်ခမ်းမြို့ပေါ်တွင် TNLA လက်အောက်ခံရဲတပ်ဖွဲ့မှ ဖမ်းဆီးထားသည့် ပြစ်မှုကျူးလွန်သူ အမျိုးသား (၅) ဦးကို လုံခြုံရေးအပြည့်ဖြင့် ကားပေါ်တင်ပြီး ခေါ်ဆောင်ကာ လမ်းမကြီးအတိုင်း မြို့အနှံ့ လှည့်လည်ပြသခဲ့ကြောင်း ဒေသခံများက ပြောသည်။

“ဆိုင်ကယ်ခိုးမှုနဲ့ မူးယစ်ဆေးဝါးမှု၊ ခိုးရာပါပစ္စည်းလက်ခံမှု ဆိုပြီး လည်ပင်းမှာ ကတ်ပြားဆွဲထားပေးတာ။ ဘယ်လိုစီရင်ချက် ချတယ်ဆိုတာကိုတော့ မကြားရသေးဘူး။ ဒီမိုကရေစီအတွက် တိုက်ပွဲဝင်တယ်လို့ ပြောပြီးတော့ ကွန်မြူနစ်လမ်းစဉ်ဘက် ဒဏ်ပေးနည်း လိုက်သွားတာတော့ စိတ်မကောင်းဘူးပေါ့”ဟု နမ့်ခမ်းဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။

အဆိုပါ ပြစ်မှုကျူးလွန်သူ (၅) ဦးကို မြို့လယ်လမ်းမကြီးအတိုင်း လှည့်လည်ပြသခဲ့ပြီးနောက် TNLA ဘက်မှ မည်သို့ စီရင်ချက် ချမှတ်လိုက်သည်ကို မသိရှိရသေးဘဲ မြို့ပေါ် လမ်းဆုံလမ်းခွ မီးပွိုင့်နေရာများတွင် အခြားသော ပြစ်မှုကျူးလွန်သူများကို ထပ်မံကြေညာထားပြီး ရှာဖွေဖမ်းဆီးနေသည်ဟု ဒေသခံများက ပြောဆိုသည်။

ပြီးခဲ့သည့် ဧပြီလ ၁၀ ရက်တွင် လားရှိုးမြို့မှ ကိုးကန့်တပ်ဖွဲ့ MNDAA တပ်မဆုတ်ခွာခင်ကလည်း MNDAA စစ်ရေးအုပ်ချုပ်မှုကော်မတီမှ ဖမ်းဆီးရမိထားသည့် ရာဇဝတ်မှု ကျူးလွန်သူ (၈) ဦးကို အများပြည်သူရှေ့ သေဒဏ်နှင့် တစ်သက်တစ်ကျွန်းထောင်ဒဏ် စီရင်ချမှတ်ခဲ့ပြီး သေဒဏ် ချမှတ်ခံခဲ့ရသည့် အမျိုးသား (၇) ဦးတို့ကို လားရှိုးလေဆိပ်ဘက်သို့ ခေါ်ဆောင်သွားကာ ချက်ချင်းကွပ်မျက်လိုက်ကြောင်း လားရှိုးဒေသခံများက ပြောသည်။

အလားတူ ‘ဝ’တပ်ဖွဲ့ UWSA လည်း ၎င်းတို့ထိန်းချုပ်ဒေသရှိ မြို့ကြီးများတွင် ဖမ်းဆီးရမိသည့် ရာဇဝတ်မှုကျူးလွန်သူများကို ပြစ်ဒဏ်စီရင်ချမှတ်ခြင်း မပြုလုပ်မီ မြို့ပေါ်တွင် လှည့်လည်ပြသပြီးမှ “ပြည်သူ့တရားစီရင်ရေး အခမ်းအနား”ဟု ခေါင်းစဉ်တပ်ကာ ကျောင်းသားကျောင်းသူများ ပါဝင်သည့် လူစုလူဝေး ရှေ့မှောက်တွင် အသီးသီး ပြစ်ဒဏ်စီရင်ခဲ့သည်။