တအာင်း (ပလောင် ) အမျိုးသားများလွတ်မြောက်ရေးတပ်မတော် (TNLA) ထိန်းချုပ်ထားသော မိုးကုတ်မြို့အရှေ့ပိုင်း လူနေရပ်ကွက်ကို စစ်ကော်မရှင်က ဗုံးကြဲတိုက်ခိုက်ခဲ့သဖြင့် ကလေးအပါအဝင် အရပ်သား ၃ ဦး သေဆုံးခဲ့ရကြောင်း သိရသည်။
ယနေ့ (သြဂုတ် ၁၇ ) ရက် နံနက် ၉ နာရီအချိန်တွင် မိုးကုတ်မြို့အရှေ့ပိုင်း စီးပွားရေးဘဏ်နှင့် ပတ္တမြားငမောက် တည်းခိုးခန်းအနီးကို စစ်ကော်မရှင်က ဂျက်ဖိုက်တာဖြင့် ၂ ကြိမ် ဗုံးကြဲတိုက်ခိုက်ခဲ့ခြင်း ဖြစ်ကြောင်း မြို့ခံတစ်ဦးက ပြောသည်။
အဆိုပါဗုံးပေါက်ကွဲမှုကြောင့် လမ်းသွားလမ်းလာ ဂေါ်ရခါး ပြည်သူ ၁ ဦး၊ ကလေး ၁ ဦးနှင့် လူငယ် ၁ ဦး သေဆုံးခဲ့ရကြောင်း သိရသည်။
ပြီးခဲ့သည့် သြဂုတ် ၁၄ ရက် ညပိုင်းတွင်လည်း မိုးကုတ်မြို့အရှေ့ပိုင်း ရွေကူရပ်ကွက် လင်းရောင်ခြည် ဘုန်းကြီးကျောင်းကို စစ်ကော်မရှင်က ဗုံးကြဲတိုက်ခိုက်ခဲ့၍ ပြည်သူ ၂၁ ဦး သေဆုံးပြီး၊ ၇ ဦး ထိခိုက်ဒဏ်ရာရှိခဲ့ကြောင်း TNLA က ထုတ်ပြန်ထားသည်။
စစ်ကော်မရှင်သည် ယခုလအတွင်းမှာပင် မိုးကုတ်မြို့ကို လေကြောင်းဖြင့် ၃ ကြိမ် တိုက်ခိုက်ခဲ့ပြီဖြစ်ကြောင်း TNLA က ဆိုထားသည်။
Leave a Comments