သျှမ်းပြည် သိန္နီမြို့မှ ကိုးကန့်တပ်ဖွဲ့ MNDAA ဆုတ်ခွာမည်မဟုတ်ဘဲ တရုတ်ရင်းနှီးမြှုပ်နှံမှုဖြင့် ဆေးရုံနှင့် ဈေးဝယ်စင်တာ တည်ဆောက်နေကြောင်း စုံစမ်းသိရသည်။

ဇူလိုင်လ ၂၉ ရက် နံနက် ၉ နာရီခွဲတွင် ကိုးကန့်တပ်ဖွဲ့ MNDAA ထိန်းချုပ်ထားသည့် သိန္နီမြို့ ရပ်ကွက်(၁) ဈေးတန်းရပ်ရှိ သိန္နီမြို့မဈေးနေရာ၌ တရုတ်ရင်းနှီးမြှုပ်နှံမှုဖြင့် ဆေးရုံနှင့် ဈေးဝယ်စင်တာ ပါဝင်သည့် သုံးထပ်အဆောက်အဦးသစ် ဆောက်လုပ်ရန် အုတ်မြစ်ချ ပန္နက်ရိုက် အခမ်းအနား ပြုလုပ်ခဲ့ကြောင်း ဒေသခံများက ပြောသည်။

ထို့နောက် ဇူလိုင်လ ၂၉ ရက် ညနေ(၃) နာရီတွင် MNDAA မှ သိန္နီခရိုင် ဆေးရုံအသစ် ဆောက်လုပ်မည့် သိန္နီမြို့မဈေးနေရာတွင် ဒေသခံများ၊ ဈေးသူဈေးသားများနှင့် အစည်းအဝေး ပြုလုပ်ကာ ဆေးရုံသစ်နှင့် ဈေးဆိုင်ခန်းအကြောင်း ရှင်းပြခဲ့သည်ဟု အစည်းအဝေးသို့ ကိုယ်တိုင်တက်ရောက်ခဲ့သူ အမျိုးသမီးတစ်ဦးက သျှမ်းသံတော်ဆင့်ကို ပြောသည်။

“သူတို့လုပ်ချင်တာ လုပ်ပြီးမှ ပြည်သူကို အသိပေးကြတာ။ စျေးလည်း အရင်က ပြည်သူကို ပြောတာက အသစ်ဆောက်ပြီးရင် အရင်ကိုယ့်နေရာဟောင်းနဲ့ ပြန်ပေးမယ်၊ အယောက်ဆီတိုင်းကို ပေးမယ်။ ခုကျ ဆေးရုံဆောက်ဖို့ အစီအစဉ်ဆွဲပြီးမှ ပြည်သူကို သတိပေးတာ။ ပြောတော့ ပြည်သူကို အရင်ဦးစားပေးမယ်တဲ့၊ ခုတော့ သူတို့ပြောထားတာနဲ့ တခြားစီ”ဟု သိန္နီမြို့မှ ၎င်းဈေးသည်အမျိုးသမီးက ပြောသည်။

သိန္နီမြို့မဈေး နေရာဟောင်းတွင် MNDAA မှ ခုတင် ၂၀၀ ဆံ့ သိန္နီခရိုင်ဆေးရုံ အဖြစ် ၃ ထပ်အဆောက်အဦသစ် တည်ဆောက်မည်ဖြစ်ပြီး ပထမထပ်တွင် ဈေးဆိုင်ခန်းများ၊ ဒုတိယထပ်တွင် ဆေးရုံဆေးခန်းနှင့် တတိယထပ်တွင် တည်းခိုခန်းများ ပါဝင်မည်ဖြစ်ကြောင်း သိရပြီး ဆောက်လုပ်ရေးကာလ (၇) လခန့် ကြာမြင့်မည်ဟု ဆိုသည်။

သို့သော် ပထမထပ်တွင် ဈေးဆိုင်ခန်း (၇၀) သာ ပါရှိမည်ဖြစ်ပြီး မူလ သိန္နီမြို့မဈေးတွင် ဆိုင်ခန်းပေါင်း (၃၀၀) ကျော် ရှိခြင်းကြောင့် ဆိုင်ရှင်များမှ သဘောမတူဘဲ အခြားနေရာတွင် သွားရောက်လုပ်ဆောင်ရန် သို့မဟုတ် ကာလပေါက်ဈေးအတိုင်း မူလပိုင်ရှင်များထံ လျော်ကြေးပေးအပ်ရန် အစည်းအဝေးတွင် ပြောဆိုခဲ့သည်ဟု သိန္နီဒေသခံ အဆိုပါအမျိုးသမီးက ဆက်ပြောသည်။

“၃ ထပ်ဆောက်မှာကို အောက်ဆုံးထပ်က ဈေးရောင်းခွင့်ပေးမယ်၊ ဆိုင်ခန်း (၇၀) ရှိမယ့်ဟာကို နဂိုမူလ ဆိုင်ရှင် (၃၀၀) ကျော်က အားလုံးမရဘူး။ ဆိုင်ခန်းမရတဲ့လူလည်း တခြားပရောဂျက်တွေ ထပ်ဆောက်ရင် ရမယ်၊ သူတို့ကိုးကန့်က တရုတ်တွေကို သိန္နီမှာ လာရင်းနှီးမြှုပ်နှံဖို့ ဖိတ်ခေါ်ထားလို့ စည်စည်ကားကား ဖြစ်လာမယ်။ သတင်းထွက်နေသလို သိန္နီကို ပြန်ပေးမှာ မဟုတ်ပဲ အစီအစဉ် ရှိတဲ့အတိုင်း ဆက်လုပ်သွားမယ်လို့ ပြောတယ်”ဟု ၎င်းဈေးသည်အမျိုးသမီးက ပြောဆိုသည်။

အလားတူ သိန္နီမြို့မဈေးနေရာနှင့် မျက်နှာချင်းဆိုင် ကြာကန်ဘေးရှိ လယ်ကွက်များကိုလည်း တရုတ်လုပ်ငန်းရှင်များမှ ဝယ်ယူလိုက်ပြီး ဟိုတယ်တည်ဆောက်လျက်ရှိကာ မြို့တွင်းအချက်အခြာကျသည့် အခြားနေရာများတွင်လည်း ဒေသခံများထံမှ နှစ်ရှည်ငှားရမ်းနေကြောင်း ဒေသခံများက ပြောသည်။

“သိန္နီကို သူတို့က မူပန် လို့ ခေါ်ကြတယ်၊ မြို့ထဲ တရုတ်စာတွေချည်းပဲ တစ်လုံးမှ နားမလည်ဘူး။ မြေကွက်နေရာကောင်းတွေကိုလည်း တရုတ်တွေက ၁၀ နှစ် ၂၅ နှစ် အဲ့လိုငှားနေတာ၊ ဒေသခံတွေတော့ ကိုယ့်နေရာ ပြန်မရမှာစိုးလို့ မငှားပေးဘူး။ လောက်ကိုင်မှာ ထမင်းဟင်း သွားရောင်းတဲ့သူတောင် သိန္နီပြောင်းလာကြပြီ၊ လောက်ကိုင်က လူမစည်တော့လို့ သိန္နီမှာ လာဖွင့်ကြပြီ”ဟု သိန္နီမြို့မှ လူငယ်တစ်ဦးက သျှမ်းသံတော်ဆင့်ကို ပြောသည်။

သိန္နီမြို့ကို တစ်နှစ်ခွဲကျော် ထိန်းချုပ်ထားသည့် ကိုးကန့်တပ်ဖွဲ့ MNDAA သည် လာမည့် စက်တင်ဘာလအတွင်း ထပ်မံတပ်ဆုတ်ရမည်ဟု သတင်းများ ကျယ်ကျယ်ပြန့်ပြန့် ထွက်ပေါ်နေသော်လည်း သိန္နီမြို့ပေါ်တွင် ပညာရေး၊ ကျန်းမာရေးနှင့် လမ်းပန်းဆက်သွယ်ရေးကဲ့သို့ ပြန်လည်ထူထောင်ရေးလုပ်ငန်းများ အရှိန်မပျက် ဆက်လက်လုပ်ဆောင်နေကြောင်း ဒေသခံများက ပြောသည်။

အခြားတစ်ဖက်တွင် ယမန်နေ့ (ဇူလိုင်လ ၃၀ ရက်) နံနက်ပိုင်းတွင် TNLA နှင့် MNDAA တို့ ထိန်းချုပ်ထားသည့် ကွတ်ခိုင်မြို့ပေါ်သို့ စစ်ကောင်စီတပ်မှ လေကြောင်းဗုံးကြဲ တိုက်ခိုက်ခဲ့ခြင်းကြောင့် တရုတ်ကြားဝင်မှုဖြင့် စစ်ကောင်စီနှင့် MNDAA ကြား သဘောတူထားသည့် စစ်ပြေငြိမ်းရေးစာချုပ်ကို စစ်ကောင်စီဘက်မှ ချိုးဖောက်လိုက်ခြင်းဖြစ်ကြောင်း ကိုးကန့်သတင်းကွန်ရက် The Kokang မှ ယမန်နေ့တွင် ထုတ်ပြန်ထားသည်။

ပြီးခဲ့သည့် ဧပြီလ ၁၅ ရက်တွင် သိန္နီမြို့ ရပ်ကွက် (၁) ဈေးတန်းရပ်ရှိ ပျက်စီးသွားသည့် သိန္နီမြို့မဈေးထဲ မူလဆိုင်ခန်းနေရာတွင် ပြန်လည်ဖွင့်လှစ် ရောင်းချနေသည့် ဈေးသည်များကို ကိုးကန့်တပ်ဖွဲ့ MNDAA ရဲများက လာရောက်နှင်ထုတ်ခဲ့ပြီး ၎င်းတို့ အသစ်ဖွင့်လှစ်ထားသည့် ပန်လော့ရွာဘက်သို့ သွားရောက်ရောင်းချခိုင်းပြီး MNDAA ထံလည်း အခွန်ပေးဆောင်ရကြောင်း ဒေသခံများက ပြောသည်။