သျှမ်းပြည် ကွတ်ခိုင်မြို့နယ် မုံးဟွမ်တိုက်နယ် မန်ဝိန်းကျေးရွာရှိ ပြည်သူတစ်ဦးကို သေနတ်ဖြင့် ပစ်သတ်ခဲ့သည့် SSPP တပ်ရင်းမှူးဆိုသူကို အပြစ်ပေး အရေးယူရန် ဒေသခံများက တောင်းဆိုထားကြောင်း စုံစမ်းသိရသည်။

ဖြစ်စဉ်မှာ ဇူလိုင်လ (၁၈) ရက် ညနေပိုင်းတွင် ကွတ်ခိုင်မြို့နယ် မုံးဟွမ်တိုက်နယ် မန်ဝိန်းကျေးရွာသို့ ရှမ်းပြည်တိုးတက်ရေးပါတီ/ ရှမ်းပြည်တပ်မတော် (SSPP/SSA) ၏ အမှတ်-၁၈၀ တပ်ရင်းမှူးဆိုသူ စိုင်းစိန္နနှင့် အဖွဲ့သည် စစ်ပြေးဖမ်းဆီးရန် နမ့်ခမ်းဘက်မှ ရောက်လာကြောင်း မန်ဝိန်းဒေသခံများက ပြောသည်။

SSPP တပ်ရင်းမှူး စိုင်းစိန္နနှင့် အဖွဲ့သည် စစ်ပြေးဖမ်းဆီးပြီး ပြန်လည်ထွက်ခွာစဉ် မန်ဝိန်းကျေးရွာ အထွက်လမ်း၌ ကားဘီးနွံထဲနစ်၍ ဆက်မသွားနိုင်ဘဲဖြစ်ရာ အနီးရှိ လယ်ကွက်ထဲတွင် နွားကျောင်းနေသည့် အသက် (၃၀) အရွယ်ခန့် စိုင်းဆမ်းထွန်း သည် ပေါက်ပြားဖြင့် သွားရောက်ကူညီခဲ့သည်။

ထို့သို့ကူညီပြီးနောက် SSPP တပ်ဖွဲ့ဝင်များမှ စိုင်းဆမ်းထွန်းကို ကားတင်ခေါ်ဆောင်သွားရန် လုပ်ဆောင်ခဲ့စဉ် ၎င်းမှ အကြောင်းရင်း မသိရဘဲ မလိုက်နိုင်ကြောင်း ပြောဆိုပြီး ကားပေါ်မှ ခုန်ဆင်းလာစဉ် ခြေထောက်နှင့် ရင်ဘတ်ကို သေနတ်ဖြင့် တစ်ချက်စီ ပစ်ခံရပြီး သေဆုံးသွားခဲ့ကြောင်း ဖြစ်စဉ်သိရှိသူ မုံးဟွမ်ဒေသခံတစ်ဦးက ပြောသည်။

“တံတားနား ခုန်ဆင်းတဲ့အချိန်မှာ ခြေထောက်ကို သေနတ်နဲ့ တစ်ခါပစ်တယ်။ အဲ့လောက်နဲ့ မကျေနပ်လို့ ကားပေါ်က ဆင်းပြီးတော့ ရင်ဘတ်ကို နောက်တစ်ချက် ထပ်ပစ်တယ်၊ နှစ်ခါတောင် ပစ်တာ။ အထက်ကလည်း ကျူးလွန်တဲ့လူကို အပြစ်ပေး အရေးယူစေချင်တယ်။ အားလုံးလည်း ဒီဒေသက လူတွေပဲ၊ ပွင့်ပွင့်လင်းလင်းနဲ့ အမှန်အတိုင်း ဝန်ခံခိုင်းစေချင်တယ် ဘာမှ ဖုံးကွယ်စရာ မလိုဘူး”ဟု မုံးဟွမ်ဒေသခံ ၎င်းအမျိုးသားက သျှမ်းသံတော်ဆင့်ကို ပြောသည်။

အဆိုပါ သေနတ်ပစ်ခတ်မှုနှင့် ပတ်သက်ပြီး ဇူလိုင်လ ၁၉ ရက် နံနက်ပိုင်းတွင် SSPP ၏ ပန်ဆိုင်းမြို့ဘက်မှ တာဝန်ရှိသူ (၃) ဦးသည် ကွတ်ခိုင်မြို့နယ် မန်ဝိန်းကျေးရွာ စာသင်ကျောင်းသို့ လာရောက်၍ သံဃာတော်များ၊ ကျေးရွာလူကြီး၊ ရပ်မိရပ်ဖနှင့် ရွာသားများ စုစုပေါင်း (၂၀၀) ကျော်ကို တွေ့ဆုံရှင်းပြခဲ့သော်လည်း ဒေသခံများ ကျေနပ်လောက်သည့် ဖြေရှင်းမှု မရရှိခဲ့ကြောင်း ဆိုသည်။

“ဘာကြောင့် နွားကျောင်းတဲ့ ပြည်သူတစ်ယောက်ကို ခေါ်သွားပြီး လမ်းမှာ ခွေးလိုဝက်လို ပစ်သတ်တာလဲ၊ သူက ဘာအပြစ်ရှိလို့ သေနတ်နဲ့ ပစ်သတ်ရတာလဲ ဆိုတာ အားလုံးက သိချင်တယ်။ သေနတ်ပစ်တဲ့ စစ်သားကို သိနေတာတောင် မဝန်ခံခိုင်းသေးဘူး။ အမိန့်ပေးတဲ့ အထက်လူကြီး ကိုယ်တိုင် လာဖြေရှင်းဖို့ ဒေသခံတွေ တောင်းဆိုထားတယ်”ဟု မုံးဟွမ်ဒေသခံ ၎င်းအမျိုးသားက ဆက်ပြောသည်။

ထို့နောက် SSPP ဘက်မှ တာဝန်ရှိသူများ ၃ ရက်အတွင်း ထပ်မံလာရောက်ပြီး ဖြေရှင်းပေးမည်ဟု ရွာသားများကို ပြောဆိုခဲ့သော်လည်း လက်ရှိအချိန်ထိ လာရောက်ခြင်း မရှိသေးကြောင်း ဒေသခံများထံမှ သိရသည်။

အလားတူ သေနတ်ပစ်ခတ်မှု ကျူးလွန်ခဲ့သူလည်း ဇူလိုင်လ (၁၉) ရက် ညပိုင်းတွင် မန်ဝိန်းကျေးရွာ တာဝန်ရှိသူများနှင့် လာရောက်တွေ့ဆုံခဲ့သော်လည်း တာဝန်ယူမှု တာဝန်ခံမှု မရှိဘဲ ရှောင်တိမ်းနေကြောင်း ဒေသခံများက ပြောသည်။

“ပြည်သူကို သေနတ်နဲ့ပစ်တာ မဟုတ်သေးဘူးလေ မကျေနပ်ဘူး။ သူတို့ကိုယ်တိုင်လည်း အဲ့မှာ သွားစစ်ဆေးပြီးပြီ၊ စစ်သားကိုယ်တိုင်ပဲ ကျည်ဆံပြန်သွားကောက်လာတာ။ ကိုယ့်လူမျိုး အချင်းချင်း စစ်သားလုပ်တဲ့လူတွေ ဒီလိုမျိုး လူ့အခွင့်အရေး ချိုးဖောက်ပြီး ခေါင်းရှောင်တာမျိုး မလိုချင်ဘူး၊ ပြည်သူက အဖွဲ့အစည်းကို ပြန်ထိန်းဖို့လုပ်ရမယ်”ဟု မန်ဝိန်းဒေသခံ အမျိုးသမီးတစ်ဦးက ပြောသည်။

ယခုဖြစ်စဉ်နှင့် ပတ်သက်၍ စုံစမ်းမေးမြန်းနိုင်ရန် SSPP ပြောရေးဆိုခွင့်ရှိသူ ဗိုလ်မှူးစိုင်းဖုန်းဟန်ထံ သျှမ်းသံတော်ဆင့်က ဖုန်းဖြင့် အကြိမ်ကြိမ် ဆက်သွယ်ခဲ့သော်လည်း ဖုန်းစက်ပိတ်ထားသည်။

သို့သော်လည်း SSPP ၏ ပန်ဆိုင်းမြို့နယ် အုပ်ချုပ်ရေးနယ်မြေအတွင်း ဖြစ်ပွားခဲ့သည့် ပြည်သူလူထုနှင့် သျှမ်းတပ်အကြား ပြဿနာကို SSPP ထိပ်ပိုင်းခေါင်းဆောင်များ သိရှိထားပြီး အကြောင်းရင်းကို စုံစမ်းဖော်ထုတ်ရန် SSPP ဌာနချုပ်မှ သက်ဆိုင်ရာ တပ်ရင်းများသို့ ညွှန်ကြားထားကြောင်း ယမန်နေ့ (ဇူလိုင်လ ၂၂ ရက်) တွင် SSPP Info မှ သတင်းထုတ်ပြန်သည်။

ပြဿနာအရင်းခံပေါ် မူတည်၍ စုံစမ်းစစ်ဆေးမှု ရလဒ်အတိုင်း ပြစ်မှုကျူးလွန်သူနှင့် သက်ဆိုင်သူများကို တရားဥပဒေအရ အပြစ်ပေး အရေးယူမှုများ ဆက်လက်လုပ်ဆောင်ကာ ဖြေရှင်းသွားမည်ဖြစ်ကြောင်း SSPP ထုတ်ပြန်ချက်ထဲတွင် ရေးသားထားသည်။

ကွတ်ခိုင်မြို့နယ် မုံးဟွမ်တိုက်နယ် မန်ဝိန်းကျေးရွာတွင် သေနတ်ပစ်ခံရပြီး သေဆုံးခဲ့သူ စိုင်းဆမ်းထွန်းသည် မူးယစ်ဆေးဝါး သုံးစွဲသူလည်း မဟုတ်ဘဲ နွားကျောင်းကာ သမ္မာအာဇီဝ လုပ်ကိုင်စားသောက်သူဖြစ်ပြီး လက်ရှိတွင် ဇနီးနှင့် သားသမီး (၃) ဦး ကျန်ရစ်ခဲ့ကြောင်း သိရသည်။