သျှမ်းပြည်မြောက်ပိုင်းမှ တင်သွင်းလာသော ခန့်မှန်းတန်ဖိုးငွေကျပ် ၁၅ ဘီလီယံခန့် တန်ဖိုးရှိ မူးယစ်ဆေးဝါးများကို မန္တလေးမြို့တွင် ဖမ်းဆီးရမိကြောင်း စစ်ကော်မရှင်က ယမန်နေ့ (ဧပြီလ ၈ ရက်) တွင် သတင်းထုတ်ပြန်သည်။

ပြီးခဲ့သည့် ဧပြီလ ၆ ရက်တွင် မန္တလေးမြို့ ပြည်ကြီးတံခွန်မြို့နယ်အတွင်း လုံခြုံရေးတပ်ဖွဲ့ဝင်များက ဝင်ရောက်စီးနင်းခဲ့ရာ စိတ်ကြွဆေးပြား ၉၉ ဒသမ ၂၂ သိန်းပြားနှင့် ဘိန်းဖြူ ၅ ဒသမ ၅ ကီလိုဂရမ် စုစုပေါင်း ခန့်မှန်းတန်ဖိုးငွေကျပ် ၁၅ ဒသမ ၀၂ ဘီလီယံခန့်ကို သိမ်းဆည်းရမိခဲ့ကြောင်း ဆိုသည်။

ယင်းဖြစ်စဉ်နှင့် ဆက်စပ်၍ ဇနီးမောင်းနှံနှစ်ဦးကို ဖမ်းဆီးအရေးယူထားကြောင်း ထုတ်ပြန်ချက်တွင် ရေးသားဖော်ပြထားသည်။

စစ်ကော်မရှင်၏ စစ်ဆေးချက်အရ အဆိုပါမူးယစ်ဆေးဝါးများကို သျှမ်းပြည်မြောက်ပိုင်း ကွတ်ခိုင်မြို့နေ အိုက်ချွမ်ဆိုသူက မန္တလေးမြို့ပေါ်တွင် ပြန်လည်ဖြန့်ဖြူးရန်အတွက် စနစ်တကျ ပေးပို့ခဲ့ခြင်း ဖြစ်ကြောင်း ဆိုသည်။

လက်ရှိတွင် ရဲတပ်ဖွဲ့သည် သျှမ်းပြည်အတွင်းရှိ အဓိကကွင်းဆက်တရားခံကို ဖမ်းဆီးနိုင်ရန် စုံစမ်းစစ်ဆေးမှုများ ဆက်လက်လုပ်ဆောင်နေပြီး ဖမ်းဆီးရမိသူများကို မူးယစ်ဆေးဝါးဆိုင်ရာ ဥပဒေဖြင့် အရေးယူထားကြောင်း သိရသည်။

အလားတူ (မတ်လ ၂၄ ရက်) တွင်လည်း ထိုင်း-မြန်မာနယ်စပ် တာချီလိတ်မြို့အနီးတွင် ခန့်မှန်းတန်ဖိုး ငွေကျပ် ၂၀ ဒသမ ၂ ဘီလီယံခန့်ရှိသော မူးယစ်ဆေးဝါးများနှင့် အကြီးစား ထုတ်လုပ်ရေးစခန်းတစ်ခုကို စစ်ကော်မရှင်က သိမ်းဆည်းရမိသည်။