သျှမ်းပြည် ကွတ်ခိုင်မြို့နယ် တိုက်ပွဲအတွင်း ထွက်ပြေးပုန်းအောင်းနေသည့် TNLA တပ်သားများကို လက်နက်အပ်ရန်နှင့် ဆေးဝါးကုသမှုခံယူရန် MNDAA ဘက်မှ လိုက်လံစည်းရုံးနေကြောင်း စုံစမ်းသိရသည်။

မတ်လ ၂၂ ရက်မှ စတင်ပြီး ကွတ်ခိုင်မြို့နယ်အတွင်းရှိ မုံးစီး၊ ကာလိုင်၊ မိုင်းယုလေး၊ ရှုခင်းသာ၊ ၃၈ မိုင် စသည့် ကျေးရွာအုပ်စုများတွင် MNDAA လက်အောက်ခံ တာဝန်ရှိသူများမှ အုပ်ချုပ်ရေးလုပ်ငန်းစဉ် ချမှတ်နိုင်ရန် ဒေသခံများကို အစည်းအဝေး ခေါ်ယူခဲ့ကြောင်း သိရသည်။

အဆိုပါ အစည်းအဝေးတွင် ကွတ်ခိုင်တိုက်ပွဲအတွင်း ထွက်ပြေးပုန်းအောင်းနေသည့် TNLA တပ်သားများ MNDAA ထံ လက်နက်အပ်နှံရန်နှင့် ဆေးဝါးကုသမှု ခံယူရန် ပြောဆိုစည်းရုံးခဲ့ကြောင်း ကွတ်ခိုင်ဒေသခံများက ပြောသည်။

“အတင်းအဓမ္မ ဝင်ခိုင်းတာမဟုတ်ဘူး၊ သူရှင်းပြတာက ရှင်းရှင်းပဲ။ တကယ်လို့ ပလောင်စစ်တပ်ထဲမှာ ဝင်ဖူးတယ်၊ အဲဒီမှာ တာဝန်မထမ်းဆောင်ချင်တော့ဘူး ဆိုရင် အိမ်မှာ နေမယ်ဆိုရင်လည်း အိမ်မှာနေမယ်လို့ ပြောပေါ့နော်။ လောလောဆယ် တချို့က တောထဲမှာ သေနတ်ဖွက်ပြီးမှ တစ်ခါတည်း ပြေးကုန်ကြတယ်၊ ဒဏ်ရာရပြီးမှ မထွက်လာရဲတဲ့ လူတွေလည်း ထွက်လာဖို့ ဆေးကုပေးမယ်ပေါ့”ဟု အဆိုပါ အစည်းအဝေးသို့ တက်ရောက်ခဲ့သည့် ကွတ်ခိုင်ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။

ကွတ်ခိုင်မြို့နယ်တစ်ခုလုံးကို ကိုးကန့်တပ်ဖွဲ့ MNDAA မှ အလုံးစုံ ထိန်းချုပ်ရန် တအာင်း(ပလောင်) အမျိုးသားလွတ်မြောက်ရေးတပ်မတော် TNLA နှင့် MNDAA ဗဟိုခေါင်းဆောင်များကြား လောက်ကိုင်မြို့တွင် ၃ ရက်ကြာ တွေ့ဆုံဆွေးနွေးခဲ့ပြီးနောက် သဘောတူနိုင်ခဲ့ကြောင်း TNLA ပြောရေးဆိုခွင့်ရှိသူ လွေးယေဦးမှ မီဒီယာများသို့ မတ်လ ၂၀ ရက်တွင် ဖြေကြားထားသည်။

“ကိုးကန့်ဘက်က တကယ်လို့ လုပ်ချင်တဲ့လူဆိုရင် လမ်းဖွင့်ထားတယ် အဲ့လိုပြောတယ်၊ လစာကတော့ လုပ်ပြီဆိုရင်တော့ သူ့ဟာနဲ့သူတော့ ပေးမှာပဲ။ ဟိုဘက်(TNLA)မှာ အလုပ်လုပ်ချင်သေးတယ် ဆိုရင်လည်း သူတို့နယ်မြေ ကန့်သတ်တဲ့နေရာထိ ပို့ပေးမယ်ပေါ့။ တကယ်လို့ သူတို့ဆီမှာ တာဝန်ထမ်းဆောင်ချင်တယ် ဆိုရင်လည်း လက်ခံတယ် ဆိုပြီးမှ အဲ့လိုရှင်းပြတာ။ အတင်းအဓမ္မ ဝင်ဖမ်းတာတော့ မဟုတ်ပါဘူး” ဟု အစည်းအဝေး တက်ရောက်ခဲ့သည့် အဆိုပါ အမျိုးသားက သျှမ်းသံတော်ဆင့်ကို ဆက်ပြောသည်။

အလားတူ မတ်လ ၁၄ ရက်နှင့် ၁၅ ရက်တို့တွင် ပြင်းထန်ခဲ့သည့် ကွတ်ခိုင်တိုက်ပွဲ နှစ်ရက်အတွင်း TNLA ဘက်မှ ထိခိုက်ဒဏ်ရာရသူ (၁၈) ဦးနှင့် လက်နက်ချ ဖမ်းဆီးခံရသူ ၁၀၀ နီးပါးရှိပြီး ၎င်းဖမ်းဆီးခံရသူများထဲမှ အချို့ကို မတ်လ (၂၄) ရက်တွင် MNDAA ဘက်မှ ပြန်လည်လွတ်ပေးခဲ့ကြောင်း စစ်ရေးသတင်းမြစ်ထံမှ သိရသည်။

“အခုလောလောဆယ် ပုန်းအောင်းနေတဲ့ လူတွေ သုံးရက်အတွင်း မြန်မြန်ထွက်လာဖို့၊ တောထဲမှာ အိမ်ထဲမှာ ဖွက်ထားတဲ့ လက်နက်တွေ လာအပ်ပေးပေါ့။ တကယ်လို့ လာစစ်လို့ မိရင်တော့ အရေးယူမှာပေါ့နော်။ လောလောဆယ် ဒီသုံးရက်အတွင်းမှာ သူတို့နေရာဘက် သွားရင်သွား၊ အဲ့လို ဖွက်ထားတာ မလုပ်နဲ့လို့ပြောတယ်။ သိန္နီတဝိုက်မှာ ရှေ့နှစ်က သျှမ်းတပ်တွေကို လုပ်သလို ကိုးကန့်က ပလောင်တပ်ကို အဲ့လိုပြန်လုပ်နေတာ” ဟု စစ်ရေးသတင်းရင်းမြစ်တစ်ဦးက သျှမ်းသံတော်ဆင့်ကို အတည်ပြုသည်။

အလားတူ ကွတ်ခိုင်မြို့နယ်အတွင်းရှိ ကျေးရွာဆိုင်းဘုတ်များကိုလည်း အောက်ခံ ဆေးအဖြူပေါ်တွင် လူမျိုးအလိုက် သက်ဆိုင်ရာ စာပေနှင့် မြန်မာစာဖြင့် ရေးသားရန် MNDAA တာဝန်ရှိသူများက ပြောဆိုခဲ့ကြောင်း အစည်းအဝေး တက်ရောက်ခဲ့သူများထံမှ သိရသည်။

“မုခ်ဦးနဲ့ ဆိုင်းဘုတ်တွေ ရွာအလိုက်မှာ ပလောင်ရွာဆိုလည်း ပလောင်အလံဒီဇိုင်းနဲ့ အပေါ်မှာ စာရေးတဲ့ဟာ ဖြုတ်ခိုင်းတာ။ အောက်ခံမှာ ဆေးအဖြူ သုတ်ပြီးမှ ပလောင်လို ရေးပြီး အောက်မှာ ဗမာလိုလည်း ရေးပေါ့နော်။ ကချင်ဆိုရင် အပေါ်မှာ ကချင်လိုရေးပြီးမှ အောက်မှာ ဗမာလိုရေး၊ တရုတ်ဆိုရင်လည်း အပေါ်မှာ တရုတ်လိုရေးပြီးမှ အောက်မှာ ဗမာလို ပြန်ရေးထားပေး။ အစည်းအဝေးမှာ အဲ့လိုလုပ်ခိုင်းတယ်” ဟု မုံးစီးဒေသခံ အမျိုးသမီးတစ်ဦးက သျှမ်းသံတော်ဆင့်ကို ပြောသည်။

MNDAA တာဝန်ရှိသူများမှ ကွတ်ခိုင်မြို့နယ်အတွင်းရှိ ရပ်ကွက်နှင့် ကျေးရွာအုပ်စုများသို့ ကွင်းဆင်းကာ လူထုတွေ့ဆုံပွဲများတွင် တရုတ်၊ မြန်မာနှင့် တအာင်း(ပလောင်) ဘာသာစကား ၃ မျိုးဖြင့် ပြောကြားခဲ့ကြောင်း၊ တက်ရောက်လာသည့် ဒေသခံများကို နို့မှုန့်နှင့် ပုလဲဓာတ်မြေဩဇာများကို ထောက်ပံ့ပေးအပ်ခဲ့ကြောင်း MNDAA သတင်းများ ဖော်ပြနေသည့် ကိုးကန့်သတင်းကွန်ရက်မှ ယနေ့ (မတ်လ ၂၆ ရက်) တွင် သတင်းထုတ်ပြန်ထားသည်။