သျှမ်းပြည် ကွတ်ခိုင်မြို့နယ်တွင် ဖြစ်ပွားနေသည့် TNLA နှင့် MNDAA ကြား မြေပြင်တိုက်ပွဲများမှာ ဆက်လက်ပြင်းထန်နေပြီး နမ့်ခမ်းမြို့ဘက်သို့ ဦးတည်နေကြောင်း စုံစမ်းသိရသည်။

ယနေ့ (မတ်လ ၁၅ ရက်) နံနက် ၃ နာရီကျော်မှ စတင်၍ ကွတ်ခိုင်မြို့ပြင်ဘက်တွင် တအာင်း(ပလောင်) အမျိုးသားလွတ်မြောက်ရေးတပ်မတော် TNLA နှင့် ကိုးကန့်တပ်ဖွဲ့ MNDAA ကြား ဒရုန်းဖြင့် လိုက်လံတိုက်ခိုက်ခဲ့ကြပြီး မြို့တွင်းရှိ ရဲစခန်း၊ တပ်နှင့် ဌာနဆိုင်ရာ နေရာဟောင်းများသို့ MNDAA ဘက်မှ ထိုးစစ်ဆင် တိုက်ခိုက်နေကြောင်း ကွတ်ခိုင်ဒေသခံများက ပြောသည်။

ထို့အပြင် ကွတ်ခိုင်နှင့် နမ့်ခမ်းကြား TNLA ထိန်းချုပ်ထားသည့် မိုင်းယုလေးနှင့် ၁၂ မိုင်ဂိတ်ဘက်တွင်လည်း နှစ်ဘက်တပ်ဖွဲ့ကြား ထိတွေ့တိုက်ပွဲ ဖြစ်ပွားခဲ့ပြီး ယနေ့နံနက် ၉ နာရီခန့်တွင် မိုင်းယုလေးဒေသကို MNDAA ဘက်မှ ထိန်းချုပ်လိုက်ကြောင်း စစ်ရေးသတင်းရင်းမြစ်တစ်ဦးက သျှမ်းသံတော်ဆင့်ကို ပြောသည်။

“ဒီမနက် ၃ နာရီလောက်က စပြီး ကွတ်ခိုင်မြို့ပြင်မှာ ဒရုန်းနဲ့ လိုက်ပစ်နေကြတယ်။ မိုင်းယုအဝင် လမ်းခွဲနားရယ်၊ နမ့်ခမ်းသွားတဲ့ ၁၂ မိုင်ဂိတ်ရယ် ပလောင်နဲ့ ကိုးကန့် တိုက်ပွဲဖြစ်ကြတယ်။ တိုက်ပွဲအခြေအနေက နမ့်ခမ်းထိ မရောက်ဘူးလို့ တပ်အပ်မပြောနိုင်ဘူး၊ အခု ကိုးကန့်ဘက်က နမ့်ခမ်းမြို့ကိုပါ သိမ်းမယ့်အစီအစဉ် ရှိ မရှိ စုံစမ်းနေတယ်” ဟု သျှမ်းပြည်မြောက်ပိုင်းမှ အဆိုပါ စစ်ရေးသတင်းရင်းမြစ်က ပြောသည်။

ယမန်နေ့ (မတ်လ ၁၄ ရက်) နံနက် ၁၀ နာရီခန့်မှ စတင်ပြီး ကွတ်ခိုင်မြို့နယ်ရှိ မုံးစီး၊ နမ့်ဖတ်ကာ၊ လွိုင်ဆမ်ဆစ်၊ မန်ပြိန်းနှင့် မြို့အနီးတဝိုက်ရှိ TNLA တပ်စခန်းများကို MNDAA ဘက်မှ ဒရုန်းနှင့် လက်နက်ကြီးများ အသုံးပြုပြီး တပြိုင်နက် စတင်တိုက်ခိုက်ခဲ့ရာ လဝက်နီးပါး ကုန်စည်ဖြတ်တောက်ခံထားရခြင်းကြောင့် တိုက်ပွဲကာလ ကြာမြင့်ပါက စားနပ်ရိက္ခာ ပြတ်တောက်မည်ကို စိုးရိမ်နေရကြောင်း ကွတ်ခိုင်ဒေသခံများက ပြောသည်။

ကွတ်ခိုင်နှင့် သိန္နီမြို့နယ်တွင် TNLA နှင့် MNDAA ကြား တစ်လကျော်ကြာ ဖြစ်ပွားနေသည့် နယ်မြေအငြင်းပွားမှု ပြဿနာများမှာ ပြေလည်မှု မရရှိဘဲ မြေပြင်စစ်ရေးတင်းမာမှု ဖြစ်ပွားခဲ့ရာမှ ညီနောင်မဟာမိတ် တပ်အချင်းချင်း တိုက်ခိုက်သည်အထိ စစ်ရေးပဋိပက္ခ ကြီးထွားလာသည်။

“ကိုးကန့်ဘက်က ကြူကုတ်ပန်ဆိုင်းဘက်ကနေ စစ်အင်အား ဖြည့်နေတော့ တိုက်ပွဲပြင်းထန်လာရင် နမ့်ခမ်းဘက်ထိ ရောက်နိုင်တယ်။ အခု TNLA ရဲ့ ထောက်ပို့လမ်းကြောင်း အားလုံးနီးပါးကို ကိုးကန့်ဘက်က ပိတ်ထားတယ်။ စစ်ရေးလှုပ်ရှားမှုကိုကြည့်ပြီး အကြမ်းဖျင်း ခန့်မှန်းရရင် ကိုးကန့်ဘက်က စစ်အင်အား တစ်ထောင်ကျော် သုံးထားတယ်” ဟု အဆိုပါ စစ်ရေးသတင်းရင်းမြစ်က ဆက်ပြောသည်။

တရုတ်နှစ်သစ်ကူးမတိုင်မီ ဖေဖော်ဝါရီ (၁၃) ရက်တွင် ကွတ်ခိုင်မြို့ရှိ ကိုးကန့်တပ် MNDAA အုပ်ချုပ်ရေးရုံးများကို TNLA ဘက်မှ ရည်ရွယ်ချက်ရှိရှိ ဝင်ရောက်တိုက်ခိုက် စီးနင်းခဲ့ကြောင့် နှစ်ဦးနှစ်ဘက် ညီနောင်မဟာမိတ်ဆက်ဆံရေးကို ထိခိုက်စေခဲ့ကြောင်း MNDAA ဘက်မှ ယမန်နေ့ (မတ်လ ၁၄ ရက်) ဖြစ်စဉ်နှင့် ပတ်သက်၍ ထုတ်ပြန်ကြေညာချက်တွင် ရေးသားထားသည်။

TNLA ဘက်မှ ပုံမှန်ကင်းလှည့်နေသော MNDAA တပ်ဖွဲ့ဝင်များကို ကြားဖြတ် တိုက်ခိုက်ခဲ့ခြင်းကြောင့် တန်ပြန်ခုခံ တိုက်ခိုက်ခဲ့ရပြီး အဆိုပါဖြစ်စဉ်ကြောင့် ပေါ်ပေါက်လာသည့် နောက်ဆက်တွဲပြဿနာအားလုံးကို TNLA အပြည့်အဝ တာဝန်ယူရမည်ဟု MNDAA ထုတ်ပြန်ချက်တွင် ဖော်ပြထားသည်။

အခြားတစ်ဘက်တွင် ကွတ်ခိုင်ဒေသ အနှံ့အပြားရှိ TNLA တပ်စခန်းများကို MNDAA ဘက်မှ တပြိုင်နက် စတင်ထိုးစစ်ဆင် တိုက်ခိုက်ခြင်း၊ ညီနောင်မဟာမိတ်(၃) ဖွဲ့ ပူးတွဲထိန်းချုပ်ထားသည့် မူဆယ်မြို့နယ် ကျင်ဆန်းကျော့ နယ်စပ်ကုန်သွယ်ရေးဇုန် (၁၀၅) မိုင်ရှိ TNLA တပ်ဖွဲ့ဝင်များကို လက်နက်နှင့်အတူ ဖမ်းဆီးခြင်းများ ဆက်တိုက်ပြုလုပ်ခဲ့ကြောင်း TNLA ဘက်မှ ယမန်နေ့ ညနေပိုင်းတွင် ထုတ်ပြန်ခဲ့သည်။

TNLA အနေဖြင့် ယမန်နေ့ ညနေပိုင်း ၅ နာရီအထိ MNDAA အား ပြန်လည်ပစ်ခတ်ခဲ့ခြင်း မရှိဘဲ မိမိကိုယ်ကို ခုခံကာကွယ်ခြင်းသာ ဆောင်ရွက်ခဲ့ပြီး ညီနောင်မဟာမိတ်အချင်းချင်းကြား ဖြစ်ပေါ်နေသည့် ပြဿနာများကို တွေ့ဆုံဆွေးနွေး ညှိနှိုင်းခြင်းဖြင့် ကြိုးစား အဖြေရှာသွားမည်ဖြစ်ကြောင်း ပြောဆိုထားသည်။

အလားတူ အမျိုးသားညီညွတ်ရေး အတိုင်ပင်ခံကောင်စီ (NUCC) ကလည်း MNDAA နှင့် TNLA ကြား လက်ရှိဖြစ်ပွားနေသော လက်နက်ကိုင်တိုက်ပွဲများကို ချက်ချင်းရပ်တန့်ပြီး မိတ်ဖက်ပဋိပက္ခများအဖြစ် ရှုမြင်ကာ နိုင်ငံရေးအရ ငြိမ်းချမ်းစွာ တွေ့ဆုံဆွေးနွေး ဖြေရှင်းကြရန် တောင်းဆိုပြီး ကူညီပံ့ပိုးမှု လိုအပ်ပါက ပါဝင်ဆောင်ရွက်နိုင်ရန် NUCC ဘက်မှ ကမ်းလှမ်းထားသည်။