ထိုင်းနိုင်ငံ ချင်းမိုင်ခရိုင် Mae Rim မြို့နယ်ရှိ ဈေးတစ်ခုတွင် ခွင့်ပြုချက်မရှိဘဲ ဈေးဆိုင်ဖွင့်လှစ်ရောင်းချသော မြန်မာနိုင်ငံသား ၃ ဦးကို ထိုင်းရဲတပ်ဖွဲ့များက ဖမ်းဆီးခဲ့ကြောင်း သိရသည်။

ဇူလိုင် ၇ ရက်နေ့တွင် Mae Rim မြို့နယ်ရှိ ဈေးတစ်ခု၌ ခွင့်ပြုချက်မရှိဘဲ နိုင်ငံခြားသားများ ဈေးဆိုင်ဖွင့်လှစ် ရောင်းချနေကြောင်း သတင်းသိရှိရသဖြင့် လူဝင်မှုကြီးကြပ်ရေး (လဝက) နှင့် ရဲတပ်ဖွဲ့များက သွားရောက်စစ်ဆေးခဲ့ရာ မြန်မာနိုင်ငံသား ၃ ဦးကို ဖမ်းဆီးရမိခဲ့ခြင်း ဖြစ်ကြောင်း Chiang Mai News သတင်းတွင် ဖော်ပြသည်။

စစ်ဆေးတွေ့ရှိချက်အရ အဆိုပါမြန်မာနိုင်ငံသား ၃ ဦးအနက် တစ်ဦးမှာ သက်တမ်းလွန်နေထိုင်သူဖြစ်ပြီး ၎င်းတို့သည် ခွင့်ပြုချက်မရှိဘဲ ဈေးဆိုင်ဖွင့်လှစ် ရောင်းချသောကြောင့် တရားခံများအားလုံးကို Mae Rim ရဲစခန်းသို့ ပို့ဆောင်ကာ တရားဥပဒေအရ အရေးယူဆောင်ရွက်သွားမည်ကြောင်း သိရသည်။

ထိုင်းနိုင်ငံသား မြန်မာနိုင်ငံသားများအပါအဝင် နိုင်ငံခြားသားများ လုပ်ကိုင်ခွင့်မပြုသော အလုပ်အကိုင် ၂၇ မျိုးရှိသည်။

ထိုထဲတွင် ဈေး/ လှည့်လည်ရောင်းခြင်းလုပ်ငန်းလည်းပါဝင်ပြီး ကန့်သတ်ထားသော လုပ်ငန်းများကို လုပ်ကိုင်နေကြောင်း စစ်ဆေးတွေ့ရှိပြီး ဖမ်းဆီးခံရပါက ဒဏ်ငွေ ဘတ် ၅,၀၀၀ မှ ဘတ် ၅၀,၀၀၀ အထိ ချမှတ်ခံရမည့်အပြင် ထိုင်းနိုင်ငံအတွင်း ၂ နှစ် အလုပ်လုပ်ခွင့်ပိတ်သိမ်းကာ မိမိနိုင်ငံသို့ ပြန်လည်ပို့ဆောင်ခြင်း ခံရမည်ဖြစ်သည်။