ထိုင်းနိုင်ငံ၊ ချင်းမိုင်ခရိုင် လူဝင်မှုကြီးကြပ်ရေးဦးစီဌာနနှင့် ပူးပေါင်းစစ်ဆေးရေးအဖွဲ့များမှ ချင်းမိုင်မြို့တွင်းရှိ Tha Sala နယ်မြေ ပျံကျဈေးဆိုင်ခန်းများကို ဝင်ရောက်စစ်ဆေးခဲ့ပြီး မြန်မာနိုင်ငံသား ဈေးသည် ၉ ဦးအပါအဝင်၊ တရုတ်နိုင်ငံသား ၃ ဦး ဖမ်းမိကြောင်း Chiang Mai Immigration မှ သတင်းထုတ်ပြန်သည်။

ယမန်နေ့ (စက်တင်ဘာ ၁၀ ရက်) တွင် ချင်းမိုင်လူဝင်မှုကြီးကြပ်ရေး ဦးစီးဌာန၊ အလုပ်သမားညွှန်ကြားမှုဦးစီးဌာန၊ ပြည်တွင်းလုံခြုံရေး ကွပ်ကဲမှုဌာနချုပ် (ISOC) နှင့် ချင်းမိုင်ခရိုင် အထွေထွေအုပ်ချုပ်ရေးဌာနတို့ ပူးပေါင်းကာ အဆိုပါ Tha Sala နယ်မြေရှိ ဈေးဆိုင်ခန်းများကို ရှောင်တခင်ဝင်ရောက်စစ်ဆေးခဲ့ခြင်းဖြစ်သည်။

စစ်ဆေးမှုမှ မြန်မာနိုင်ငံသား ၉ ဦး ဖမ်းဆီးခံခဲ့ရပြီး နေထိုင်ခွင့် သက်တမ်းကျော်လွန်နေထိုင်သူ တစ်ဦး (Overstay)၊ တရားဥပဒေအရ ခွင့်ပြုထားသည့် လုပ်ပိုင်ခွင့်ထက်ပိုမိုကျော်လွန် လုပ်ဆောင်နေသည့် မြန်မာနိုင်ငံသား ၈ ဦး၊ အလုပ်လုပ်ကိုင်ခွင့်ကတ် (ဝေါ့ပါမစ်) မရှိဘဲ အလုပ်လုပ်ကိုင်နေသည့် တရုတ်နိုင်ငံသား ၃ ဦး တို့အား ဖမ်းဆီးခဲ့သည်။

ဖမ်းဆီးခံရသည့် မြန်မာနိုင်ငံသားအများစုမှာ Kammakon ဟုခေါ်သော ကျပန်းလုပ်သားအဖြစ်သာ လုပ်ကိုင်ရန် မှတ်ပုံတင်ထားပြီး သတ်မှတ်ထားသော အလုပ်များကို တရားဝင်လုပ်ပိုင်ခွင့်ရှိသော်လည်း လုပ်ပိုင်ခွင့်ထက်ကျော်လွန်နေသည့် ဈေးဆိုင်ခန်းများ ဖွင့်လှစ်ရောင်းချနေခြင်းကြောင့် ဖမ်းဆီးခံရခြင်းဖြစ်သည်။

လက်ရှိတွင် အာဏာပိုင်များမှ ဖမ်းဆီးခံရသူများကို ဆက်လက်အရေးယူနိုင်ရန် Mae Ping ရဲစခန်းသို့ လွှဲပြောင်းပို့ဆောင်ထားကြောင်း သိရသည်။

အလားတူ စက်တင်ဘာလ ၉ ရက်နေ့ကလည်း ချင်းမိုင်မြို့ Chang Phueak နယ်မြေတွင် လှည့်လည်ရောင်းချနေသော မြန်မာနိုင်ငံသား ဈေးသည်အမျိုးသမီးအား တရားဝင်အလုပ်လုပ်ပိုင်ခွင့်မရှိဘဲ‌ ဈေးရောင်းချနေကြောင်း တိုင်ကြားမှုအရ ဝင်ရောက်ဖမ်းဆီးခဲ့သေးသည်။

ကိုးကား – Chiang Mai Immigration