တအာင်း(ပလောင်) အမျိုးသားလွတ်မြောက်ရေးတပ်မတော် (TNLA) ထိန်းချုပ်ထားသည့် ကျောက်မဲမြို့နှင့် မိုးကုတ်မြို့ပေါ်ကို စစ်ကောင်စီတပ်က လေကြောင်းဗုံးကြဲ တိုက်ခိုက်ခဲ့သဖြင့် ၃ ဦးထက်မနည်း သေဆုံးမှုရှိနေကြောင်း သိရသည်။
ယနေ့ ( ဇူလိုင်လ ၈ ရက်) နံနက် ၉ နာရီကျော်တွင် ကျောက်မဲမြို့ ငြိမ်းချမ်းရေးကုန်းရှိ ဘိုးဘွားရိပ်သာအနီးနှင့် နယ်စပ်ဒေသ တိုင်းရင်းသားလူမျိုးများ ဖွံ့ဖြိုးရေးရုံး (နတလရုံး) ကို စစ်ကောင်စီတပ်က လေကြောင်းဖြင့် ဗုံးကြဲတိုက်ခိုက်ခဲ့ခြင်းကြောင့် အရပ်သား ၁ ဦး သေဆုံးပြီး ထိခိုက်ဒဏ်ရာရရှိသူ ၄ ဦးရှိကြောင်း ကျောက်မဲဒေသခံများက ပြောသည်။
“ဗုံးက နှစ်ကြိမ်၊ ဘိုးဘွားရိပ်သား အနီးက နတလရုံးကို ဗုံးကြဲသွားတာ။ သေတာတော့ တစ်ဉီးရှိပြီး၊ ဒဏ်ရာရရှိသူက ၄ ဦးရှိတယ်” ဟု ကျောက်မဲမြို့ ဒေသခံအမျိုးသားတစ်ဦးက သျှမ်းသံတော်ဆင့်ကို ပြောသည်။
ကျောက်မဲမြို့နှင့် တစ်ချိန်တည်းတွင် ယနေ့ (ဇူလိုင်လ ၈ ရက်) နံနက် ၉ နာရီကျော်တွင် မိုးကုတ်မြို့ အနောက်ပိုင်း ဂေါင်းဦးဘာရပ်ရှိ “ကြိုးစားသူများ” ကိုယ်ပိုင်အထက်ပိုင်းကျောင်း အနီးတစ်ဝိုက်ကို စစ်ကောင်စီတပ်က လေကြောင်းဗုံးကြဲ တိုက်ခိုက်ခဲ့ခြင်းကြောင့် အရပ်သား ၃ ထက်မနည်း သေဆုံးခဲ့ပြီး ထိခိုက်ဒဏ်ရာရှိသူများ ရှိခဲ့ကြောင်း သိရသည်။
မိုးကုတ်မြို့ကို စစ်ကောင်စီတပ် လေကြောင်းဗုံးကြဲ တိုက်ခိုက်ခြင်းကြောင့် ဒေသခံထိခိုက်သေဆုံးမှုများကို သျှမ်းသံတော်ဆင့်မှ အသေးစိတ် ဆက်လက် စုံစမ်းနေဆဲ ဖြစ်သည်။
ပြီးခဲ့သည့် ဇွန်လ နောက်ဆုံးပတ်တွင် စစ်ကောင်စီတပ်မှ ကျောက်မဲမြို့ပေါ်သို့ သုံးကြိမ်ထက်မနည်း လေကြောင်းဗုံးကြဲ တိုက်ခိုက်ခဲ့သောကြောင့် အပျက်အစီးနှင့် ထိခိုက်မှုများပြီး အရပ်သားစုစုပေါင်း (၅)ဦး သေဆုံးကာ (၂၁)ဦး ဒဏ်ရာရရှိခဲ့ပြီး ကမ္ဘောဇသျှမ်းကျောင်းကြီး အနီးတဝိုက်တွင်လည်း အထိအခိုက်များခဲ့ကြောင်း သိရသည်။
Leave a Comments