သျှမ်းပြည်အတွင်း ကြုံတွေ့နေရသည့် အသေးအမွှား ပြဿနာများမှသည် နိုင်ငံရေးပြဿနာအထိ ဖြေရှင်းနိုင်ရန် ပြည်သူများအားလုံး ပညာရေးကို အားပေးမှသာ နိုင်ငံပြန်လည် အေးချမ်းလာနိုင်ကြောင်း သျှမ်းကွန်မြူနတီကောလိပ် ဥက္ကဋ္ဌက ပြောဆိုလိုက်သည်။

ယနေ့ (ဇွန်လ ၂၉ ရက်) တွင် သျှမ်းပြည် ကွန်ဟိန်းမြို့နယ် ကာလိမြို့ရှိ သျှမ်းကွန်မြူနတီကောလိပ် (Shan Community College) တွင် စတုတ္ထအကြိမ်မြောက် ဘွဲ့လက်မှတ် ပေးအပ်ချီးမြှင့်ပွဲ ကျင်းပခဲ့သည်။

အဆိုပါ အခမ်းအနားတွင် သျှမ်းကွန်မြူနတီကောလိပ်မှ ကျောင်းသားကျောင်းသူ (၃၅) ဦး Associate Degree ဘွဲ့လက်ခံရယူခဲ့ပြီး ကော်တိုင်းအဖွဲ့အစည်းမှ ဖွင့်လှစ်သည့် သျှမ်းအမျိုးသားကျောင်းများမှ အထက်တန်းအောင်လက်မှတ် ရရှိသူ (၂၅) ဦး၊ စုစုပေါင်း (၆၀) ဦးတို့ကို ဘွဲ့လက်မှတ်နှင့် အောင်လက်မှတ် အသီးသီး ပေးအပ်ချီးမြှင့်ခဲ့ကြောင်း သျှမ်းကွန်မြူနတီကောလိပ် ဥက္ကဋ္ဌ နန်းဟျိုးဆိုင် က ပြောသည်။

“ကျမတို့အမြင်နဲ့ ပြောရမယ်ဆိုရင် ကြုံတွေ့နေရတဲ့ ပြဿနာတိုင်းကို ဖြေရှင်းဖို့ အသေးအမွှား အကြောင်းအရာက စပြီး နိုင်ငံရေးအကြောင်းထိပါ ပြဿနာဖြေရှင်းဖို့ ပညာရေးက အရမ်းအရေးကြီးပါတယ်။ ပညာရေးဆိုတာက စာပေနဲ့ အဆင့်အတန်းတစ်ခုတည်းကို ပြောတာမဟုတ်ဘူး။ နှလုံးသာထဲအထိ ပိုင်ဆိုင်ထားတဲ့ စွမ်းရည်နဲ့ အများပြည်သူတွေအပေါ် ကောင်းအောင်၊ လူမှုရေးတိုးတက်အောင် လုပ်နိုင်တဲ့အရာမျိုးတွေကို ဆိုလိုချင်တာ။ ဒါကြောင့် ပြည်သူတွေအားလုံး ပညာရေးကို အားပေးမယ်ဆိုရင် ကျမတို့နိုင်ငံလည်း တစ်နေ့နေ့တော့ ပြန်လည်အေးချမ်းလာနိုင်ပါတယ်”ဟု နန်းဟျိုးဆိုင် က သျှမ်းသံတော်ဆင့်ကို ပြောသည်။

ကော်တိုင်း (Kaw Dai Organization – ၵေႃတႆး) အဖွဲ့အစည်း လက်အောက်ရှိ အခြေခံပညာကဏ္ဍတွင် ၂၀၀၅ ခုနှစ်မှ စတင်ပြီး မိခင်ဘာသာစကားအခြေပြု သင်ကြားရေးစနစ်ဖြင့် သျှမ်းအမျိုးသားကျောင်းများ (ႁူင်းႁဵၼ်းၸိူဝ့်ၸၢတ်ႈ – Shan National School) ဖွင့်လှစ်ထားပြီး အထက်တန်းပြီးမြောက်သူများ အနေဖြင့် သျှမ်းကွန်မြူနတီကောလိပ်တွင် အဆင့်မြင့်ပညာ ဆက်လက်တက်ရောက်နိုင်သည်။

“အထက်တန်းအောင်တဲ့ ကျောင်းသားတချို့ကတော့ သျှမ်းကွန်မြူနတီကောလိပ်မှာ ကျောင်းဆက်တက်မယ့်သူလည်း ရှိသလို တချို့လည်း GED ဆက်တက်ပြီး တခြားတက္ကသိုလ် သွားတက်မယ့် သူတွေလည်းရှိတယ်။ ကောလိပ်ပြီးဆုံးတဲ့ ကျောင်းသားတွေကတော့ ထိုင်းနိုင်ငံ ချင်းမိုင်က တက္ကသိုလ်တွေမှာ ဆက်ပြီးတက်ရောက်မှာ ဖြစ်ပါတယ်”ဟု SCC ဥက္ကဋ္ဌ နန်းဟျိုးဆိုင် က သျှမ်းသံတော်ဆင့်ကို ဆက်ပြောသည်။

သျှမ်းကွန်မြူနတီကော်လိပ် (ၸၼ့်ၸွမ်တူင်ႇၵူၼ်းတႆး – Shan Community College) ကို ၂၀၁၇ ခုနှစ်တွင် စတင်ဖွင့်လှစ်ခဲ့ပြီး နိုင်ငံရေးသိပ္ပံ၊ လူမှုရေးသိပ္ပံ၊ စီးပွားရေးနှင့် နိုင်ငံတကာ ဆက်ဆံရေး ဘာသာရပ်များကို ၃ နှစ်တာ လေ့လာ၍ ကျောင်းသား/သူများအနေဖြင့် Associate Degree ရရှိပြီး ထိုင်းနိုင်ငံတွင် ချိတ်ဆက်ထားသည့် အဆင့်မြင့်တက္ကသိုလ်တွင် ၂ နှစ်ထပ်မံ တက်ရောက်ကာ နိုင်ငံတကာ အသိအမှတ်ပြု ဘွဲ့လက်မှတ်များ ရယူနိုင်သည်။

သျှမ်းကွန်မြူနတီကော်လိပ်အနေဖြင့် ထိုင်းနိုင်ငံ အဆင့်မြင့်တက္ကသိုလ်များနှင့် ချိတ်ဆက်မှုအဖြစ် ၂၀၁၉ ခုနှစ်တွင် ချင်းရိုင်းမြို့ရှိ Chiang Rai Rajaphat University နှင့်လည်းကောင်း၊ ၂၀၂၄ ခုနှစ်တွင် ချင်းမိုင်မြို့ရှိ Chiang Mai Rajaphat University ၊ Payap University တို့နှင့်လည်းကောင်း နားလည်မှု စာချွန်လွှာ (MoU) လက်မှတ်ရေးထိုးထားသည်။