ယခုနှစ် ၂၀၂၄ ဇွန်လသည် ကျောင်းစတင်ဖွင့်သည့်ရက်ဖြစ်ကာ အခြေခံ ပညာကျောင်းသို့ ကလေးများကို စိုးရိမ်စိတ်ဖြင့် ပို့ဆောင်နေရကြောင်း မိဘများက ပြောသည်။

မြန်မာတဝှမ်းတွင် ၂၀၂၄ -၂၀၂၅ ပညာသင်နှစ်အတွက် မေ ၂၃ရက်နေ့မှ ဇွန်လ ၂ ရက်နေ့ တွင် ကျောင်းအပ်ကာလအဖြစ် သတ်မှတ်ခဲ့သည်။

ထို့နောက် ယမန်နေ့ (ဇွန် ၃)ရက် တွင် ကျောင်းစတက်ရသည့်ရက်ဖြစ်ပြီး အခြေခံပညာကျောင်းသို့ ကလေးများကို ပို့ဆောင်သည့် မိဘများသည် စိုးရိမ်စိတ်ဖြင့်ပို့နေရကြောင်း တောင်ကြီးမြို့နေ မူလတန်းကျောင်းတက်နေသည့် မိဘတစ်ဦးက သျှမ်းသံတော်ဆင့်ကိုပြောသည်။

“ကျမတို့က ကိုယ်ပိုင်ကျောင်းကိုမပို့နိုင်ဘူးလေ။ ဒါပေမယ့် အခြေခံပညာကျောင်းပို့တော့လည်း စိုးရိမ်တာပေါ့။ ကလေးတွေက ပညာမသင်ရတာကြာတော့ သူတို့အတွက်လည်းစိုးရိမ်တာပေါ့။ ကြောက်ကြောက်နဲ့ပို့ရတာ” ဟု တောင်ကြီးမြို့နေ မိဘတစ်ဦးက ဆိုသည်။

ထို့ပြင် ကလေးများ ပညာရေးအတွက် အစိုးရကျောင်းများထက် ကိုယ်ပိုင်ကျောင်းများကို ပိုပြီး ဦးစားပေးစဉ်းစားပေး လာသော ကျောင်းသားမိဘများလည်းရှိကြောင်းစုံစမ်းသိရသည် ။

“ကျနော်တို့နေတဲ့ မြို့ဘက်တော့ ဒီနှစ် အခြေခံ လူတန်းစားတွေက အစ ကိုယ်ပိုင်ကျောင်းအပ်ကြတယ်။ ကိုဗစ်ကြောင့်ရယ် ၊ နိုင်ငံရေး တွေကြောင့် ခု ကလေးတွေကအသက်တွေကြီးကုန်ပြီ။ မိဘတွေလည်း သူတို့ ကလေး ပညာရေးအတွက် စိုးရိမ်တာပေါ့ ပိုအဆင်ပြေမယ် မျှော်လင့်ချက်နဲ့ မရှိ ရှိတဲ့ ကြားက ထားကြတာ”ဟု ကိုယ်ပိုင်ကျောင်းအပ်သည့် နမ့်စန်မြို့မှ ကလေး မိခင်တစ်ဦးက ဆိုသည် ။

စီးပွားရေးကြပ်တည်းလာပြီး ငွေကြေးမတတ်နိုင်သောကြောင့် ၊ အင်တာနက်အခက်ခဲရှိသောကြောင့် ယခုနှစ်တွင် အစိုးရကျောင်း အများအပြား အပ်လာကြကြောင်း သိရသည်။

“ကိုယ်ပိုင်ကျောင်းထားတယ်ဆိုတာက တော်တော်တက်နိုင်တဲ့ သူတွေမှ ထားကြတာ နှစ်ချုပ်တစ်နှစ်သိန်းလေးဆယ်က အနည်းဆုံးပဲ ဒါမဲ့သူတို့ အနာဂတ်ပျောက်နေတယ်ဆိုတာ သိသိနဲ့ ထားကြတာ ဒီချိန် ဒီကာလမှာ ပိုက်ဆံသိပ်မကုန်တဲ့ အစိုးရကျောင်းပဲ မေးပြီး ထားစေချင်တယ်”ဟု စစ်ရှောင်ကို ကျောင်းထားပေးသည့် အမျိုးသားတစ်ဦး က ဆိုသည်။

စစ်ကောင်စီ ပညာရေးဝန်ကြီး ဌာန ၊ အခြေခံ ပညာဦးစီးဌာန အောက်မှာရှိသည် အခြေခံ ပညာကျောင်း ၊ ကိုယ်ပိုင်ကျောင်းနှင့် ဘုန်းတော်ကြီးသင်ပညာရေးကျောင်း များတွင် ယခုနှစ် ကျောင်းသားဦးရေ ၆၃သိန်းရှိကြောင်း ဇွန်လ ၂ရက် စစ်ကောင်စီ ထုတ် သတင်းစာတွင်ရေးသားထားသည်။

ပြီးခဲ့သည့်၂၀၂၃ – ၂၀၂၄ ပညာသင်နှစ်မှာ ပညာသင်နှစ် ကျောင်းအပ်နှံသူဦးရေ ၆၂သိန်းကျော်ထိရှိပြီး ၂၀၂၂ – ၂၀၂၃ ပညာသင်နှစ်တွင် ကျောင်းသားဦးရေ ၅၆သိန်းဝန်းကျင်သာရှိကြောင်း သိရသည်။

ကမ္ဘာကုလသမဂ္ဂ အဖွဲ့ကြီးမှ ၁၉၄၈ ဒီဇင်ဘာ ၁၀ရက်တွင်လူသားတိုင်းရသင့် ရထိုက်သော အခွင့်ရေးများကို လူ့အခွင့်ရေးကြေညာစာတမ်းအဖြစ်အတည်ပြုပြီး ထို လူ့အခွင့်အရေး အချက်(၃၀)ထဲမှ လူတိုင်း ပညာသင်ကြားပိုင်ခွင့်ရှိသည် ၊ အနိမ့်ဆုံးမူလတန်းပညာကို အခမဲ့ သင်ခွင့်ရှိသည် ဆိုသော အချက်လည်း ပါဝင်ကြောင်းသိရသည် ။

အလုပ်သင် သတင်းထောက် နန်းလောဝ်ငင်း ရေးသားသည်။