သျှမ်းပြည် မြောက်ပိုင်း နောင်ချိုမြို့နယ်တွင် စစ်ကောင်စီတပ် နှင့် တအာင်း(ပလောင်) အမျိုးသားလွတ်မြောက်ရေး တပ်မတော်(TNLA) ပူးပေါင်းတပ်တို့ တိုက်ပွဲဖြစ်ပွားပြီး စစ်ကောင်စီမှ အပြင်းအထန်ဗုံးကြဲ တိုက်ခိုက်ခဲ့ကြောင်း သတင်းရရှိသည်။

ယမန်နေ့ (ဇွန်လ ၂၄ ရက်) မနက်ပိုင်းမှစ၍ နောင်ချိုမြို့နယ် ရွှေသွန်းကျေးရွာအနီးတဝိုက်တွင် စစ်ကောင်စီတပ်၏ ထိုးစစ်ဆင်မှုကြောင့် တအာင်း(ပလောင်) အမျိုးသားလွတ်မြောက်ရေး တပ်မတော်(TNLA) ပူးပေါင်းတပ်တို့ တိုက်ပွဲများ ပြင်းထန်ခဲ့ကြောင်း (DPLA)၏ တာဝန်ရှိသူတစ်ဦးက သျှမ်းသံတော်ဆင့်ကို ပြောသည်။

“မနေ့ကတော့ တိုက်ပွဲတွေနှစ်ဘက် တော်တော်လေးတိုက်ပွဲပြင်းထန်ခဲ့တယ်။ ဒီနေ့တော့ငြိမ်နေတယ်။ ဒီရက်ပိုင်းကတော့ အပြင်းအထန်ပြန်ထိုးစစ်ဆင်တာမျိုးရှိတယ်ဗျ။ စစ်မျက်နှာကလည်း ကျယ်တယ်။ နောင်ချို ရပ်စောက် ဗထူးလမ်းမကြီးတစ်လျှေက်ကို ပြန်ထိုးစစ်ဆက်လာတာပါ”ဟု (DPLA)၏ တာဝန်ရှိသူတစ်ဦးက ပြောသည်။

ထို တိုက်ပွဲများပြင်းထန်နေသည့် ရွှေသွန်းကျေးရွားအနီးတဝိုက်ကို ဦးတည်၍ စစ်ကောင်စီမှ လေကြောင်း ဗုံးကြဲတိုက်ခိုက်မှု ဗုံးအလုံး ၈၀ ကျော်ကြဲချခဲ့ကြောင်း ဓနုပြည်သူ့လွတ်မြောက်ရေး တပ်တော်(DPLA)မှ ယနေ့(ဇွန်လ ၂၅ရက်)တွင်ထုတ်ပြန်ခဲ့သည်။

“မနေ့ကတော့ လေကြောင်းဗုံးကြဲတိုက်ခိုက်မှု ပြင်းထန်ခဲ့ပါတယ်။လေးကြောင်းဗုံးကြဲတာကို အရင်ထပ် ပိုသုံးလာတာပါ။သူတို့ အထိနာတဲ့ အချိန်ဆို လေယာဉ်ပိုပြီး သုံးလေ့ရှိတယ်။Jet Fighter သုံးစီး၊Y-12 သုံးစီး နဲ့ မနက်ကနေ ညထိဗုံးကြဲတာပါ။”ဟု (DPLA)၏ တာဝန်ရှိသူတစ်ဦးက ပြောသည်။

စစ်ကောင်စီမှ ထိုတိုက်ပွဲဖြစ်ပွားသည့် နေရာများကို ပေါင် ၅၀၀ ဗုံးနှင့် ပေါင် ၃၀၀ ဗုံးအပါအဝင် ဗုံးအလုံး ပေါင်း ၈၀ ကျော်ကို ဂျက်လေယာဉ် ၊ Y -12 ဖြင့် ယမန်နေ့ (ဇွန်လ ၂၄ ရက်) မနက် ၉ နာရီ မှ ည ၇ နာရီကျော်အထိ တနေကုန်နီးပါး ဗုံးကြဲတိုက်ခိုက်မှုများပြုလုပ်ခဲ့ကြောင်း ထုတ်ပြန်ချက်တွင် ဖော်ပြထားသည်။

လက်ရှိတွင် စစ်ကောင်စီတပ်မှ လက်နက်ကြီးများ၊ ဒရုန်းများ နှင့် လေကြောင်းဗုံးကြဲတိုက်ခိုက်မှုကို အသုံးပြု၍ နောင်ချိုမြို့အနီးတဝိုက်‌တွင် အဆက်မပြတ် ထိုးစစ်ဆင်တိုက်ခိုက်မှုများပြုလုပ် နေခြင်းကြောင့် တိုက်ပွဲများမကြာခဏဖြစ်ပွားလျှက်ရှိနေကြောင်းသိရသည်။

စစ်ကောင်စီတပ်က ဇွန် ၂၂ ရက်တွင် နောင်ချိုမြို့ သရက်ကုန်ကျေးရွာကို လေကြောင်းဖြင့် ဗုံးကြဲတိုက်ခိုက်ခဲ့ပြီး၊ ဇွန် ၂၁ ရက်တွင်လည်း နောင်ချိုမြို့ သံဘိုကျေးရွာကို စစ်ကောင်စီတပ်က လေယာဉ်ဖြင့် ဗုံးအလုံး(၅၀)ကျော် ကြဲချတိုက်ခိုက်ခဲ့ကြောင်း TNLA ဘက်မှ ထုတ်ပြန်ထားသည်။