သျှမ်းပြည် တန့်ယန်းမြို့နယ်တွင် စစ်ကောင်စီလက်အောက်ခံ ဌာနဆိုင်ရာ ပူးပေါင်းအဖွဲ့များမှ လိုင်စင်မဲ့ကားနှင့် ဆိုင်ကယ်များကို စတင်ဖမ်းဆီးနေကြောင်း စုံစမ်းသိရသည်။
ယမန်နေ့ (ဇွန်လ ၁၈ ရက်) မှ စတင်ပြီး တန့်ယန်းမြို့ရှိ မြို့လယ်လမ်းမကြီးတွင် စစ်ကောင်စီလက်အောက်ခံ ယာဉ်ထိန်းရဲတပ်ဖွဲ့ အပါအဝင် ဌာနဆိုင်ရာ ပူးပေါင်းအဖွဲ့များမှ လိုင်စင်မဲ့ကားနှင့် ဆိုင်ကယ်များကို စတင်ဖမ်းဆီးနေခြင်းကြောင့် မြို့တွင်းအသွားအလာမရှိဘဲ တိတ်ဆိတ်နေကြောင်း ဒေသခံများက ပြောဆိုသည်။
“စာထွက်ထားတာတော့ ၁၈ ရက်နေ့ရယ်၊ ၂၁ ရက်နေ့ရယ် နေ့လယ် ၁ နာရီကနေ ၄ နာရီအထိ လို့တွေ့တယ်။ ဖမ်းမယ့် အကြောင်းရင်းကတော့ ဘာမှ မပြောဘူး။ ဖမ်းတဲ့ နေရာက မြို့လယ်လမ်းမကြီးမှာ သူတို့ စောင့်တယ်၊ မနေ့ကတော့ တစ်နေရာပဲ တွေ့တယ်။ ဖမ်းသွားတဲ့ ဆိုင်ကယ်တွေ ရဲစခန်းထဲမှာ အပြည့်ပဲလို့ ပြောတယ်”ဟု တန့်ယန်းဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။
တန့်ယန်းမြို့တွင် လိုင်စင်မဲ့ယာဉ်များကို ဖမ်းဆီးရေး အစီအမံကို စစ်ကောင်စီလက်အောက်ခံ မြို့နယ်ရဲတပ်ဖွဲ့မှူးရုံးမှ ခရိုင်ရဲတပ်ဖွဲ့မှူးရုံးသို့ လိပ်မူပေးပို့သည့် စာသည် ဖမ်းဆီးမှုမတိုင်ခင် လူမှုကွန်ရက်ပေါ် ကြိုတင်ပျံ့နှံ့လာခဲ့ခြင်းကြောင့် မြို့တွင်းအသွားအလာ နည်းသွားကြောင်း ဒေသခံများထံမှ သိရသည်။
လူမှုကွန်ယက်ပေါ် ပျံ့နှံလာသည့် လိုင်စင်မဲ့ယာဉ် ဖမ်းဆီးရေး အစီအမံတွင် ဇွန်လ ၁၈ ရက်နှင့် ၂၁ ရက်တွင် စစ်ကောင်စီလက်အောက်ခံ ဌာနဆိုင်ရာ ပူးပေါင်းအဖွဲ့များမှ စစ်ဆေးဖမ်းဆီးမည့် အချိန်များ ဖော်ပြထားသည်။
ထို့အပြင် တန့်ယန်းမြို့ပေါ် ရပ်ကွက်များအတွင်း လိုင်စင်မဲ့ကား၊ ဆိုင်ကယ် အရောင်းပြခန်းနှင့် ဆိုင်နေရာများအား ရှောင်တခင် စစ်ဆေးပြီး မြို့ဝင်/ထွက်ဂိတ်များ၊ လမ်းမများတွင် စစ်ဆေးဖမ်းဆီးခြင်း ဆောင်ရွက်မည်ဖြစ်ပြီး ဥပဒေနှင့်အညီ အမှုဖွင့် အရေးယူမည်ကြောင်း ဆိုသည်။
“အခက်အခဲကတော့ အဘက်ဘက်ပေါ့၊ မိုးရာသီ ကျောင်းလည်းဖွင့်တော့ မိဘတွေက ကလေးကို ကား၊ ဆိုင်ကယ်နဲ့ ကြိုပို့လုပ်တာလေ။ ဈေးသည်တို့ ကုန်သည်တို့လည်း ကားနဲ့ပဲ ပစ္စည်းတင်ကြတာလေ၊ အများစုကတော့ လိုင်စင်မရှိကြဘူးပေါ့။ အခုလိုဖမ်းတော့ အားလုံးတူတူ ဒုက္ခရောက်တာပေါ့၊ အရောင်းအဝယ် အသွားအလာ တော်တော်ကြဲသွားတယ်”ဟု တန့်ယန်းဒေသခံ ဈေးသည်တစ်ဦးက သျှမ်းသံတော်ဆင့်ကို ပြောသည်။
အခြားတစ်ဘက်တွင် စစ်ကောင်စီခွင့်ပြုချက်ဖြင့် တန့်ယန်းမြို့တွင် ဝင်ရောက်နေရာယူ တပ်စွဲထားသည့် ‘ဝ’တပ်ဖွဲ့ UWSA နဲ့ အခြား လက်နက်ကိုင်တပ်ဖွဲ့များ၏ ယာဉ်များကို စစ်ကောင်စီလက်အောက်ခံ ဌာနဆိုင်ရာ ပူးပေါင်းအဖွဲ့များမှ တားဆီးစစ်ဆေးခြင်း မရှိကြောင်း ဒေသခံများက ပြောဆိုသည်။
သျှမ်းပြည်မြောက်ပိုင်းရှိ စစ်ကောင်စီထိန်းချုပ်ထားသည့် မြို့များထဲ တန့်ယန်းမြို့၌ ပထမဆုံး လိုင်စင်မဲ့ယာဉ်များကို ဖမ်းဆီးစစ်ဆေးနေခြင်းဖြစ်သည်။
အလားတူ သျှမ်းပြည်တောင်ပိုင်းနှင့် အရှေ့ပိုင်းရှိ မြို့ကြီးများတွင် စစ်ကောင်စီလက်အောက်ခံ ယာဉ်ထိန်းရဲများမှ လိုင်စင်မဲ့ယာဉ်များကို တင်းတင်းကြပ်ကြပ် ဖမ်းဆီးစစ်ဆေးနေပြီး ဖမ်းဆီးခံရသည့် တန်ဖိုးကြီး ကားများကို ပြန်ရွေးထုတ်ခွင့် မပေးဘဲ အစိတ်အပိုင်းများကို ဖြုတ်ယူကာ တဆင့်ပြန်လည် ရောင်းချမှုများ ရှိနေကြောင်း ဒေသခံများက ပြောဆိုသည်။
Leave a Comments