သျှမ်းပြည် သိန္နီမြို့တွင် ကိုးကန့်တပ် MNDAA ၏ တပ်သားများ အရက်သောက်နေစဉ် လူငယ်များနှင့် စကားများရန်ဖြစ်ပြီး လူငယ် ၄ ဦးကို ဖမ်းဆီးရိုက်နှက်ခဲ့ကြောင်း စုံစမ်းသိရသည်။

ဖြစ်စဉ်မှာ ဇွန်လ ၁၆ ရက် ည ၉ နာရီခွဲခန့်တွင် သိန္နီမြို့ ရပ်ကွက် (၃) အတွင်းရှိ စားသောက်ဆိုင် တစ်ဆိုင်၌ ဖြစ်ပွားခဲ့ကြောင်း ဖြစ်စဉ်သိရှိသူ သိန္နီမြို့ဒေသခံတစ်ဦးက သျှမ်းသံတော်ဆင့်ကို ပြောသည်။

အဆိုပါ ပြဿနာသည် ကိုးကန့်တပ် MNDAA ၏ တပ်သားများနှင့် လူငယ်များအကြား အကြည့်ချင်းဆုံရာမှ စတင်ဖြစ်ပွားခဲ့ကြောင်း ဆိုသည်။

“လူငယ်အချင်းချင်း အကြည့်ချင်းဆုံရာကနေ ပြဿနာ စဖြစ်တာ။ အဲ့လူငယ်တွေက သူတို့ကို စိုက်ကြည့်တယ်ဆိုပြီး မကျေနပ်လို့ ဝင်ရိုက်တာ၊ စတီးခုံတွေနဲ့ကော ဝိုင်းရိုက်ပြီး သေနတ်နဲ့တွေကော ချိန်ခဲ့ကြတယ်လို့ ပြောတယ်။ ပြီးတော့ အဲ့ဒီလူငယ်တွေကို ကိုးကန့်ရဲကားတွေနဲ့ ဖမ်းခေါ်သွားပြီး ရုံးမှာ ထပ်သွားရိုက်သေးတယ်” ဟု ဖြစ်စဉ်သိရှိသူ သိန္နီမြို့ခံတစ်ဦးက ပြောသည်။

ထိုလူငယ် ၄ ဦးကို ကိုးကန့်တပ် MNDAA ဖမ်းဆီးသွားကြောင်း သိရှိရပြီးနောက် သက်ဆိုင်ရာ မိဘများက သွားရောက်တောင်းပန်ခဲ့သဖြင့် ၎င်းတို့ကို ညတွင်းချင်း ပြန်လွှတ်ပေးခဲ့ကြောင်း သိရသည်။

ဖမ်းဆီးရိုက်နှက်ခံရသူများသည် အသက် ၂၀ ကျော်အရွယ် သျှမ်းလူငယ်များဖြစ်ကြပြီး ယခင်ကတည်းက MNDAA တပ်သားများနှင့် မည်သည့် ရန်ငြိုးရန်စမှ မရှိခဲ့ကြောင်း ဒေသခံများက ပြောပြသည်။

“MNDAA တပ်သားတွေက သူတို့မှာ အပြစ်ရှိကြောင်း ဝန်မခံဘူး။ ပြီးတော့ အဲ့လူငယ်တွေကိုလည်း အခုတစ်ကြိမ်ပဲရမယ်၊ နောက်တစ်ခါဆိုရင် မရဘူးဆိုပြီးတော့ ခြိမ်းခြောက်ခဲ့သေးတယ်။ သေနတ်ရှိတိုင်း ပြည်သူတွေကို နှိပ်စက်မယ်ဆိုရင် အာဏာရှင်စစ်တပ်နဲ့ မခြားမနား အတူတူပဲ” ဟု သိန္နီမြို့ဒေသခံတစ်ဦးက ထပ်လောင်းပြောသည်။

ပြီးခဲ့သည့် ဖေဖော်ဝါရီလ (၇) ရက်တွင်လည်း လားရှိုးမြို့နယ် မိုင်းယော်တိုက်နယ်ရှိ လုံမွန်းကျေးရွာ ဘုန်းကြီးကျောင်း၌ တပ်စွဲထားသည့် ကိုးကန့်တပ်သား နှစ်ဦးသည် အရွယ်မရောက်သေးသည့် မိန်းကလေးငယ်ကို အပြိုင်လိုက်သည့် ကိစ္စကြောင့် ရန်ဖြစ်ကြပြီး အချင်းချင်း သေနတ်ပစ်ခဲ့ရာ တစ်ဦးသေဆုံးခဲ့သည်။

လက်ရှိ သိန္နီမြို့နယ်အတွင်း နေထိုင်သည့် လူငယ်များကို ညဘက်အချိန်တွင် စစ်ဆေးတွေ့ရှိလျှင် မူးယစ်ဆေးဝါး သုံးစွဲသည်ဆိုသည့် စွပ်စွဲချက်ဖြင့် ကိုးကန့်တပ် MNDAA က ဖမ်းဆီးခေါ်ဆောင်လျက်ရှိကြောင်း သိန္နီမြို့ဒေသခံ အမျိုးသမီးတစ်ဦးက ပြောသည်။
“ပြီးခဲ့တဲ့ ရက်ပိုင်းကလည်း ရပ်ကွက် ၃ က သားမက်နဲ့ သား နှစ်ယောက်ကို ဖမ်းခေါ်သွားတယ်။ အကြောင်းကတော့ ညဘက်ကြီး အပြင်ထွက်လို့ဆိုပြီး မူးယစ်ဆေးအကြောင်းပြချက်နဲ့ ဖမ်းခေါ်သွားတာ။ အခုတလော အကြောင်းအရင်းမရှိ လူတွေကို လိုက်ဖမ်းနေတယ်” ဟု ၎င်းဒေသခံ အမျိုးသမီးက ပြောသည်။

သိန္နီမြို့နယ်မှ MNDAA တပ်ဆုတ်ခွာရမည်ဟု သတင်းထွက်ပေါ်နေသည့်ကြားက ယခုရက်ပိုင်း၌ တပ်သားသစ် စုဆောင်းရာတွင် အမျိုးသမီးများကိုပါ ခေါ်ယူရန် ကိုးကန့်တပ် MNDAA မှ စာရင်းကောက်ယူနေကြောင်း ဒေသခံများက ပြောသည်။

သိန္နီမြို့ကို “၁၀၂၇ စစ်ဆင်ရေး” ပထမပိုင်း စတင်ခဲ့ချိန် ၂၀၂၃ စက်တင်ဘာကုန်ကတည်းက ကိုးကန့်တပ်ဖွဲ့ MNDAA ပထမဆုံး ထိန်းချုပ်နိုင်ခဲ့သည့် မြို့ဖြစ်ပြီး မြို့ပေါ်ရပ်ကွက်များကို မူလ (၄) ရပ်ကွက်မှ (၆) ရပ်ကွက်အဖြစ် ပြောင်းလဲသတ်မှတ်ပြီး အုပ်ချုပ်ရေးယန္တရား လည်ပတ်လျက်ရှိသည်။