သျှမ်းပြည် ကျောက်မဲမြို့နယ်တွင် ရှမ်းပြည်တိုးတက်ရေးပါတီ/ ရှမ်းပြည်တပ်မတော် (SSPP/SSA) နှင့် တအာင်း(ပလောင်) အမျိုးသားလွတ်မြောက်ရေးတပ်မတော် TNLA တို့ ထိတွေ့တိုက်ပွဲ ဖြစ်ပွားခဲ့ပြီး ထိခိုက်ကျဆုံးမှုရှိကြောင်း စုံစမ်းသိရသည်။

ယမန်နေ့ (ဇွန်လ ၁၅ ရက်) ညနေ ၅ နာရီခွဲမှ ၇ နာရီခန့်အထိ ကျောက်မဲမြို့နယ် ဟူးဆွန်ကျေးရွာ အရှေ့တောင်ဘက်တွင် SSPP တပ်စခန်းရှိရာ တောင်ကုန်းအနီးသို့ TNLA ဘက်မှ စစ်ကြောင်း (၃) ခုဖြင့် ဝင်ရောက်လာခြင်းကြောင့် နှစ်ဘက်ထိတွေ့တိုက်ပွဲ ဖြစ်ပွားခဲ့ကြောင်း စစ်ရေးသတင်းရင်းမြစ်တစ်ဦးက သျှမ်းသံတော်ဆင့်ကို ပြောသည်။

“TNLA ဘက်က စစ်ကြောင်း ၃ သုပ်ခွဲပြီး တက်လာလို့ တိုက်ပွဲဖြစ်ကြတာ၊ အင်အား ၈၀ လောက် ရှိမယ်။ ဖက်ခေးစိတ် (လွႆၽၵ်းၶိူဝ်းၸိူၵ်ႈ) တောင်ပေါ်က SSPP စခန်းကို ရွှေ့ခိုင်းနေတာ ၃ ရက် ရှိပြီ။ မနေ့က တိုက်ပွဲဖြစ်ပြီးတော့ ဟူးဆွန်က စာသင်ကျောင်းကို TNLA တပ်ဆုတ်သွားတယ်”ဟု ကျောက်မဲမြို့နယ်မှ စစ်ရေးသတင်းရင်းမြစ်က ပြောသည်။

SSPP နှင့် TNLA နှစ်ဘက်ထိတွေ့တိုက်ပွဲအတွင်း ထိခိုက်ကျဆုံးမှုရှိကြောင်း စစ်ရေးသတင်းရင်းမြစ်မှ ပြောဆိုသော်လည်း သျှမ်းသံတော်ဆင့်မှ သီးခြားအတည်ပြုနိုင်ခြင်း မရှိသေးဘဲ ယနေ့ (ဇွန်လ ၁၆ ရက်) နံနက်ပိုင်းအထိ နှစ်ဘက်စစ်ရေးတင်းမာနေကြောင်း ဒေသခံများထံမှ သိရသည်။

ကျောက်မဲမြို့နယ်အတွင်း ဖြစ်ပွားခဲ့သည့် အဆိုပါ ထိတွေ့တိုက်ပွဲနှင့် ပတ်သက်၍ သျှမ်းသံတော်ဆင့်မှ TNLA ပြောရေးဆိုခွင့်ရှိသူ လွေးယေဦးထံ ဆက်သွယ်မေးမြန်းထားသော်လည်း ပြန်လည်ဖြေကြားခြင်း မရှိသေးပါ။

အလားတူ SSPP ပြောရေးဆိုခွင့်ရှိသူ ဗိုလ်မှူးစိုင်းဖုန်းဟန် ထံ မေးမြန်းနိုင်ရန် သျှမ်းသံတော်ဆင့်မှ ဆက်သွယ်ခဲ့သော်လည်း ဖုန်းစက်ပိတ်ထားသည်။

ကျောက်မဲမြို့နယ်အတွင်း SSPP နှင့် TNLA တိုက်ပွဲဖြစ်ပွားခဲ့သည့် ဟူးဆွန်ကျေးရွာအုပ်စုသည် ပြီးခဲ့သည့် ၂၀၂၁ ခုနှစ်အတွင်း သျှမ်းပြည်ပြန်လည်ထူထောင်ရေးကောင်စီ/ သျှမ်းပြည်တပ်မတော် (RCSS/SSA) နှင့် မြောက်ပိုင်း မဟာမိတ်ဖြစ်သည့် တအာင်း(ပလောင်) အမျိုးသားလွတ်မြောက်ရေးတပ်မတော် TNLA ၊ ရှမ်းပြည်တိုးတက်ရေးပါတီ/ ရှမ်းပြည်တပ်မတော် (SSPP/SSA) တို့အကြား တိုက်ပွဲပြင်းထန်စွာ ဖြစ်ပွားခဲ့သည့် နေရာလည်းဖြစ်သည်။

ယမန်နှစ် ၂၀၂၄ ဇူလိုင်လ ပထမပတ်အတွင်းကလည်း ကျောက်မဲမြို့နယ် နောင်ပိန်ကျေးရွာအုပ်စုနှင့် သီပေါမြို့နယ် ကြံခင်းရွာ၊ ရေပူရွာတို့တွင် SSPP နှင့် TNLA အကြား ထိတွေ့တိုက်ပွဲ ဖြစ်ပွားခဲ့ရာ စစ်ရေးပဋိပက္ခကို ‘ဝ’တပ်ဖွဲ့ UWSA ဦးဆောင်သည့် ပြည်ထောင်စုနိုင်ငံရေး ဆွေးနွေးမှုညှိနှိုင်းရေးကော်မတီ (FPNCC) မှ အမြန်ဆုံး ကြားဝင်ထိန်းသိမ်းပေးရန် နှစ်ဘက်တပ်ဖွဲ့စလုံးက ထုတ်ပြန်ခဲ့သည်။

၎င်းနောက် ၂၀၂၄ ဇူလိုင်လ ၁၃ ရက်တွင် ‘ဝ’တပ်ဖွဲ့ UWSA ဌာနချုပ်တည်ရှိရာ ပန်ဆန်းမြို့၌ SSPP ဘက်မှ ဒုဥက္ကဋ္ဌဖြစ်သူ ဒုဗိုလ်ချုပ်ကြီးခွန်စိုင်း ဦးဆောင်၍ TNLA ဘက်မှ ဥက္ကဋ္ဌဖြစ်သူ ဒုဗိုလ်ချုပ်ကြီး တားအိုက်ဘုန်း ဉီးဆောင်သည့် အဖွဲ့တို့နှင့် နှစ်ဘက်တပ်ဖွဲ့ တွေ့ဆုံဆွေးနွေးခဲ့ကြောင်း သိရသော်လည်း ထိုစဉ်က ဆွေးနွေးပွဲရလဒ်ကို နှစ်ဘက်တပ်ဖွဲ့စလုံးမှ ထုတ်ပြန်ကြေညာခဲ့ခြင်း မရှိပေ။

အခြားတစ်ဘက်၌ လားရှိုးမြို့နယ်နှင့် သီပေါမြို့နယ်များတွင်လည်း ရှမ်းပြည်တိုးတက်ရေးပါတီ/ ရှမ်းပြည်တပ်မတော် (SSPP/SSA) နှင့် ကိုးကန့်တပ်ဖွဲ့ MNDAA တို့သည် နယ်မြေပြဿနာ အငြင်းပွားမှုကြောင့် ဧပြီလ နောက်ဆုံးပတ်မှ စတင်၍ တိုက်ပွဲဆက်တိုက် ဖြစ်ပွားလာခဲ့ကြောင်း ဒေသခံများက ပြောသည်။ေ