တအာင်း(ပလောင်) အမျိုးသားလွတ်မြောက်ရေးတပ်မတော် TNLA မှ ထိန်းချုပ်ဒေသအတွင်း မှတ်ပုံတင်နှင့် အိမ်ထောင်စုစာရင်း ထုတ်ပေးခြင်း၊ ပြုစုခြင်း လုပ်ဆောင်နေကြောင်း ပြောဆိုလိုက်သည်။

“၁၀၂၇ စစ်ဆင်ရေး”အတွင်း TNLA ထိန်းချုပ်နိုင်ခဲ့သည့် မြို့နယ်အားလုံးရှိ ရပ်ကွက်၊ ကျေးရွာတိုင်းတွင် တောရွာမြို့နေ ပြည်သူအားလုံးကို လူဦးရေ စိစစ်ပြီး မှတ်ပုံတင်နှင့် အိမ်ထောင်စုစာရင်း ထုတ်ပေးသွားမည်ဖြစ်ကြောင်း TNLA ပြောရေးဆိုခွင့်ရှိသူ လွေးယေဦးက ယနေ့ (ဇွန်လ ၅ ရက်) တွင် အွန်လိုင်းမှတဆင့် ပြုလုပ်သည့် သတင်းစာရှင်းလင်းပွဲအတွင်း ပြောဆိုလိုက်သည်။

“မှတ်ပုံတင်စာရင်းတွေ အိမ်ထောင်စုစာရင်းတွေ စတင်ပြီးတော့ ကောက်ခံနေတာ ရှိပါတယ်။ လက်ရှိ ဒီမြို့နယ်တိုင်းမှာ အဓိက တရားဥပဒေစိုးမိုးရေးလုပ်ငန်းနဲ့ တရားမျှတမှုကို ဆောင်ရွက်နေတဲ့အချိန်မှာ အထူးသဖြင့် လူဝင်မှုအခြေအနေကတော့ မရှိမဖြစ် လိုအပ်ပါတယ်။ ကျမတို့က လက်ရှိအချိန်အထိကတော့ ရပ်ရွာကျေးရွာတိုင်းမှာ မိမိရဲ့ မှတ်ပုံတင်နဲ့အတူ အိမ်ထောင်စုစာရင်းတွေ ထုတ်ပေးတာ၊ ပြုစုတာ လက်ရှိဆောင်ရွက်နေတာ ဖြစ်ပါတယ်။ လက်ရှိဆောင်ရွက်နေဆဲကာလလို့ ပြောလို့ရပါတယ်”ဟု လွေးယေဦးက သတင်းစာရှင်းလင်းပွဲတွင် ဖြေကြားသည်။

TNLA မှ ၂၀၂၅ ခုနှစ်အတွင်း သီးသန့်ပြန်လည် ဖွဲ့စည်းခဲ့သည့် လူဝင်မှုကြီးကြပ်ရေးဌာန၏ လုပ်ငန်းစဉ်များဖြစ်သည့် တောရွာမြို့နေ ပြည်သူလူထုအားလုံး လူဦးရေ စိစစ်ပြီး အိမ်ထောင်စုစာရင်း ထုတ်ပေးခြင်း၊ တအာင်းပြည်သားမှတ်ပုံတင် စိစစ်ထုတ်ပေးခြင်းတို့ကို လုပ်ဆောင်သွားမည်ဟု သိရသည်။

ထိန်းချုပ်ဒေသအတွင်းရှိ ပြည်သူ့အင်အား လူဦးရေစာရင်း အမှန်ကို ပြုစုထိန်းသိမ်းထားရန်၊ လူအဝင်အထွက် စာရင်းများကို စည်းစနစ်ကြပ်မတ် ထိန်းသိမ်းရန်၊ မှတ်ပုံတင် ထုတ်ပေးခြင်း၊ ကြီးကြပ်ခြင်းဖြင့် ပြည်နယ်သား အခွင့်အရေးကို ကာကွယ်မြှင့်တင်နိုင်ရန် ရည်ရွယ်ပြီး ဒေသတွင်းရှိ လူဦးရေနှင့် လူဝင်မှုကြီးကြပ်ရေးလုပ်ငန်းစဉ်များကို စနစ်တကျ ပြုလုပ်နိုင်ရန်ဖြစ်ကြောင်း TNLA ဘက်မှ ထုတ်ပြန်သည်။

ပြီးခဲ့သည့် မေလ (၁) ရက်မှ စတင်ပြီး TNLA ဖွင့်လှစ်သည့် လူဦးရေစာရင်းနှင့် လူဝင်မှုကြီးကြပ်ရေးလုပ်ငန်းများအတွက် အပတ်စဉ် (၁) သင်တန်းသည် (၁၅) ရက်ကြာမြင့်ပြီး သင်တန်းသား/သူ (၅၁) ဦး တက်ရောက်သင်ကြားခဲ့ကြောင်း သိရသည်။

အလားတူ မေလ ၂၅ ရက်မှ စတင်၍ TNLA ထိန်းချုပ်ထားသည့် နမ့်ခမ်းမြို့နှင့် နမ့်ဆန်မြို့တို့တွင် TNLA ၏ မော်တော်ယာဉ် မှတ်ပုံတင်ကြီးကြပ်ရေးဌာနမှ အိမ်စီးကား၊ လုပ်ငန်းသုံးကား၊ ခရီးသည်တင်ကားနှင့် ကုန်တင်ကားများကို ယာဉ်လိုင်စင် ပြုလုပ်ပေးလျက် ရှိကြောင်း ဒေသခံများက ပြောသည်။

TNLA ထံ မှတ်ပုံတင်ထားသည့် ကားလိုင်စင်များသည် ၂ နှစ် သက်တမ်းရှိမည်ဖြစ်ပြီး TNLA ထိန်းချုပ်ဒေသအတွင်း အသုံးပြုနိုင်မည့် ကားအမျိုးအစားအလိုက် အခွန်နှင့် ဝန်ဆောင်ခ ၂ သိန်းကျပ်မှ ၅ သိန်းကျပ်အထိ ပေးဆောင်ရမည်ဟု သိရသည်။

လက်ရှိတွင် TNLA အနေဖြင့် မြို့ (၁၂) မြို့ ထိန်းချုပ်ထားပြီး စစ်ကောင်စီဘက်မှ ဧပြီလ တွေ့ဆုံဆွေးနွေးပွဲအတွင်း နောင်ချို၊ ကျောက်မဲ၊ သီပေါ၊ မိုးကုတ်နှင့် မိုးမိတ်မြို့တို့ကို လက်လွှတ်ရန် တောင်းဆိုခဲ့ရာ သဘောတူညီမှု မရရှိခဲ့ဘဲ တရုတ်အစိုးရ၏ ကြားဝင်စေ့စပ်မှုဖြင့် လာမည့် ဩဂုတ်လအတွင်း စစ်ကောင်စီနှင့် TNLA တို့ ထပ်မံတွေ့ဆုံမည်ဖြစ်ကြောင်း သိရသည်။