သျှမ်းပြည်တော်လှန်ရေး (၆၇) နှစ်ကာလအတွင်း နိုင်ငံရေး ပြဿနာကြုံတွေ့ရခြင်း၊ အမြင်မတူခြင်းတို့ကြောင့် သျှမ်းတော်လှန်ရေးအဖွဲ့များအကြား သွေးကွဲမှုများရှိခဲ့သည်ဟု သျှမ်းပြည်ပြန်လည်ထူထောင်ရေးကောင်စီ/ သျှမ်းပြည်တပ်မတော် (RCSS/SSA) ဥက္ကဌ ဗိုလ်ချုပ်ကြီး ယွက်စစ်က ပြောသည်။

ယနေ့ မေလ ၂၁ ရက်တွင် ကျရောက်သော (၆၇) နှစ်မြောက် သျှမ်းပြည်တော်လှန်ရေးနေ့အတွက် ပေးပို့သည့် သဝဏ်လွှာထဲတွင် ဗိုလ်ချုပ်ကြီး ယွက်စစ်က ထိုကဲ့သို့ ထည့်သွင်းပြောဆိုထားခြင်း ဖြစ်သည်။

ထို့ပြင် တော်လှန်ရေးအဖွဲ့ အချို့သည် စီးပွားရေးလုပ်ငန်းရှင်များကို နောက်ခံထားပြီး ကိုယ်ကျိုးစီးပွားရေး လုပ်ငန်းများ လုပ်ကိုင်ခြင်း၊ သျှမ်းလူထုတို့၏ ပညာရေး၊ ဗဟုသုတ မပြည့်စုံခြင်းတို့ကြောင့် ရန်သူ၏ စည်းရုံးသိမ်းသွင်းမှုကို ခံရပြီး အသုံးချခံဘဝရောက်ခဲ့ကြရသည်ဟု ဗိုလ်ချုပ်ကြီး ယွက်စစ်က ပြောဆိုထားသည်။

ထိုကြောင့် သျှမ်းတော်လှန်ရေး၏ အားနည်းချက် ဖြစ်သလို တော်လှန်ရေး ပန်းတိုင်သို့ မရောက်အောင် ဟန့်တာားသည့် အတားအဆီးလည်း ဖြစ်ကြောင်းဆိုသည်။

တော်လှန်ရေး ရှည်ကြာလာခြင်းနှင့်အတူ သင်ခန်းစာအမျိုးမျိုးလည်း ရရှိခဲ့ပြီးဖြစ်၍ သျှမ်းပြည်လူထုများ၊ မျိုးချစ်များအနေဖြင့် ရရှိခဲ့သော သင်ခန်းစာအား လေ့လာသုံးသပ်ပြီး အတွေးအခေါ်နှင့် လုပ်ငန်းများအား ပြုပြင်ရမည်ဖြစ်သည်ဟု ၎င်းကဆိုထားသည်။

တော်လှန်ရေး ဆောလျင်စွာ အောင်မြင်ရေးနှင့် ကျွန်ဘဝလွတ်မြောက်ရေးအတွက် သျှမ်းပြည်သားများအား အနေဖြင့် အမျိုးသား၊ တိုင်းပြည်၊ ဘာသာ၊ သာသနာတို့အတွက် ရည်မှန်းပြီး တော်လှန်ရေးတွင် ရဲ့ဝံ့စွာပါဝင်ဆင်နွဲ့ကြရန် ဗိုလ်ချုပ်ကြီး ယွက်စစ်က တိုက်တွန်းထားသည်။

ခေတ်အဆက်ဆက် သျှမ်းတော်လှန်ရေးသည် သျှမ်းပြည်လူထုတို့၏ အသက်အိုးအိမ်စည်းစိမ်တို့ဖြင့် ဖြစ်တည်လာခဲ့ကြောင်း၊ ပြည်သူနှင့်တော်လှန်ရေးသည် ခွဲခြား၍မရနိုင်ကြောင်း Tai Student’ Union ကလည်း ယနေ့ပေးပို့သည့် သဝဏ်လွှာထဲတွင် ထည့်သွင်းပြောဆိုထားသည်။

သို့သော် ယခုအခါတွင် စစ်အာဏာရှင်စနစ်ဆိုးနျင့် ခေတ်နိုင်ငံရေးရေစီးကြောင့် ဖြစ်ပေါ်လာသော သျှမ်းပြည်တွင်းရေး အခြေအနေများသည် ပိုမိုရှုပ်ထွေးလာပြီး သျှမ်းပြည်သူတို့အပေါ် များစွာသက်ရောက်လျက်ရှိကာ သျှမ်းပြည်သူများသည် မိမိတို့၏ ရပိုင်ခွင့်များကို လက်လွတ်ဆုံးရှုံးနေရ၍ အားကိုးရာမဲ့ အခြေအနေဖြစ်နေခဲ့ကြောင်း ဆိုထားသည်။

သျှမ်းအမျိုးသားတော်လှန်ရေး၊ နိုင်ငံရေးကို ဦးဆောင်နေသူများ အချင်းချင်းအပါအဝင် သျှမ်းလူမှုအသိုင်းအဝိုင်းများတွင် အချင်းချင်းမသင့်မမြတ် ဖြစ်နေကြသည်မှာ ဝမ်းနည်းဖွယ်ရာ ဖြစ်ကြောင်း၊ ထိုကြောင့် သျှမ်းတော်လှန်ရေး၊ နိုင်ငံရေးအဖွဲ့အစည်းများမှ ယခုလက်ရှိကာလတွင် သျှမ်းအမျိုးသား သွေးစည်း ညီညွတ်ရေးအတွက် ပြန်လည်ပေါင်းစဉ်းနိုင်ကြရန် မေတ္တာရပ်ခံကြောင်း Tai Student’ Union ကလည်း တိုက်တွန်းထားသည်။

သျှမ်းပြည်တော်လှန်ရေးနေ့ဆိုသည်မှာ ဗမာစစ်တပ်၏ ဖိနှိပ်ဒဏ်ကို မခံနိုင်သည့်အတွက် စဝ်ဆောယန္တ ဦးဆောင်ပြီး လူငယ် ၃၁ ဦး၊ သေနတ် ၇ လက်နှင့် ဖွဲ့စည်းလိုက်သည့် “နွံစစ်ဟန်” အဖွဲ့သည် ၁၉၅၈ မေလ ၂၁ ရက်နေ့တွင် သျှမ်းပြည်လွတ်လပ်ရေးရရှိရန်နှင့် နယ်ချဲ့ဗမာတပ်မတော်ကို တွန်းလှန်ရန်အတွက် သွေးသစ္စာရေသောက်ခဲ့ကာ သျှမ်းတော်လှန်ရေးသမိုင်းစတင်ခဲ့ခြင်း ဖြစ်သည်။