သျှမ်းတော်လှန်ရေးနေ့ နီးကပ်လာပြီဖြစ်သဖြင့် သျှမ်းတပ်(၂)တပ် ထိုးစစ်ဆင် တိုက်ခိုက်မှု ကို (၁၀)ရက်အတွင်း လုံးဝ အပစ်ရပ်စဲရန် RCSS/SSA ၏ အမိန့်စာ လူမှုကွန်ရက်စာမျက်နှာတွင် သျှမ်းဘာသာဖြင့် ယနေ့ (မေ ၁၆)ရက်၌ ပျံ့နှံ့လာသည်။

အဆိုပါ အပစ်ရပ်စဲကာလသည် ယနေ့ (မေ ၁၆)ရက်မှစတင်ပြီး မေ ၂၅ရက်ထိဖြစ်ကာ နှစ်ဘက်တွေ့ဆုံဆွေးနွေးနိုင်ရန် အတွက် သျှမ်းပြည်ပြန်လည်ထူထောင်ရေးကောင်စီ၊ သျှမ်းပြည်တပ်မတော်( RCSS/SSA လက်အောက်ခံတပ်ရင်း၊တပ်ဖွဲ့များအားလုံး ရှမ်းပြည်တိုးတက်ရေးပါတီ၊ရှမ်းပြည်တပ်မတော် (SSPP/SSA) အားထိုးစစ်ဆင်တိုက်ခိုက်မှု လုံးဝ အပစ်ရပ်စဲရန် RCSS အမိန့်စာတွင် ရေးသားထားသည်။

ထို့အပြင် သျှမ်းတော်လှန်ရေးနေ့တွင်လည်း သက်ဆိုင်ရာ အဖွဲ့အစည်းမှ ခေါင်းဆောင်များနှင့် တွေ့ဆုံဆွေးနွေးနိုင်ရန် အတွဥ် (၁၀)ရက်သာ ကာလအတွင်း တပ်ရင်း၊ တပ်ဖွဲ့များ မိမိရောက်ရှိနေသည့် နေရာတွင် စစ်ရေးလှုပ်ရှားမှုရပ်နားထားရမည်ဖြစ်ပြီး ခုခံကာကွယ်ရန်အတွက်သာ စီစဉ်ထားရန်လည်း အမိန့်စာတွင် ပါရှိသည်။

လက်ရှိ အနေအထားအရ သျှမ်းပြည်၏ ကံကြမ္မာပြိုလုနီးပါး ဖြစ်နေချိန် သျှမ်းတပ်အချင်းချင်း တွေ့ဆုံဆွေးနွေးမှုမရှိလျှင် သျှမ်းပြည်သူ လူထုအနေဖြင့် ဘေးဒုက္ခမျိုးစုံ ဆက်လက်ခံစားရမည်ဖြစ်သည်။

လာမည့် (၆၈)နှစ်ပြည့် သျှမ်းတော်လှန်ရေးနေ့တွင် နှစ်ဘက်တပ်ဖွဲ့နှင့် ပြည်သူလူထုများတွေ့ဆုံဆွေးနွေးနိုင်ရန် RCSS/SSA ဉက္ကဌ ဗိုက်ချုပ်ကြီး ယွက်စစ်မှ ဉီးဆောင် စီစဉ်ထားပြီးဖြစ်ကြောင်း SSPP မိတ္တူပေးပို့ထားကြောင်းလည်း ၎င်းစာတွင် ဖော်ပြထားသည်။

အဆိုပါ ကိစ္စနှင့်ပတ်သက်ပြီး RCSS/SSA ၏ ပြောရေးဆိုခွင့်ရှိသူကို သျှမ်းသံတော်ဆင့်က ဆက်သွယ်ခဲ့သော်လည်း လက်ခံဖြေကြားခြင်းမရှိပေ?

“ ကျနော်အနေနဲ့ကတော့သျှမ်းတပ်(၂)တပ် သျှမ်းလူထုကို ငဲ့ညားသင့်ပြီ၊ ကျနော်တို့လူထုတွေ သျှမ်းတပ်(၂)တပ်ကို အားကိုးချင်တယ်။ အာဏာရှင်တိုက်ဖျက်ရေးမှာလည်း သျှမ်းတပ်ကမပါဘဲ အချင်းချင်းတိုက်နေတာတွေ ရပ်ပေးဖို့တောင်းဆိုချင်တယ်” ဟု လားရှိုးမြို့ ဒေသခံ အမျိုးသားတစ်ဉီးက သျှမ်းသံတော်ဆင့်ကိုပြောသည်။

ယခုနှစ် မေ ၂၁ရက် တွင် သျှမ်းတော်လှန်ရေး (၆၈)နှစ်ပြည့်မည်ဖြစ်ပြီး၊ သျှမ်းတပ်(၂)တပ်အချင်းချင်းကြား စစ်ရေးတင်းမာမှုကလည်း ပိုကြီးလာသည်။