သျှမ်းပြည် နမ့်ခမ်းမြို့နယ်တွင် ဆီလီကွန်သတ္တုတူးဖော်သည့် ကုမ္ပဏီကို ရွာသားများ ဆန္ဒပြနေစဉ် TNLA တပ်သားများက လာရောက်တားမြစ်ခဲ့ကြောင်း စုံစမ်းသိရသည်။

မေလ ၅ ရက် နံနက်ပိုင်းတွင် တအာင်း(ပလောင်) အမျိုးသားလွတ်မြောက်ရေးတပ်မတော် TNLA ထိန်းချုပ်ထားသည့် နမ့်ခမ်းမြို့နယ် မန်စပ်ကျေးရွာအုပ်စုတွင် ဆီလီကွန်ကျောက် (သလင်းကျောက်) တူးဖော်ထုတ်ယူနေသည့် မြန်မာရွှေသီးနှံကုမ္ပဏီ Myanmar Golden Crop Co,Ltd. ကို အလိုမရှိကြောင်း ရွာသား (၆၀၀) ကျော်မှ ဆန္ဒပြနေစဉ် TNLA တပ်သားများက လာရောက်တားမြစ်ခဲ့ကြောင်း ဒေသခံများက ပြောသည်။

“ဧပြီလ ၁၂ ရက်နေ့မှာ ကျေးရွာလူထုရဲ့ ဆန္ဒသဘောထား မပါဘဲ လုပ်ငန်းဆက်လုပ်ဖို့ စာချုပ်ချုပ်ကြတယ်။ အဲ့ကိစ္စကို ကျေးရွာလူထုကို အသိမပေးလို့ မန်စပ်ဒေသခံတွေက တရုတ်ကုမ္ပဏီနဲ့ ပေါင်းလုပ်နေတဲ့ TNLA ကိုလည်း ဆန္ဒပြတယ်။ သတ္တုတူးတာက သဘာဝပတ်ဝန်းကျင်ကို ဖျက်စီးတဲ့အပြင် ဘေးပတ်ဝန်းကျင် ကျေးရွာ ၅ ရွာက လယ်ယာတွေကိုလည်း ထိခိုက်ပျက်စီးစေတယ်”ဟု နမ့်ခမ်းဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။

ဒေသခံများမှ မန်စပ်ရွာအနီးရှိ သတ္တုတွင်းလုပ်ကွက်သို့ သွားရောက်၍ ဆန္ဒထုတ်ဖော်ခဲ့စဉ် “MGC ကုမ္ပဏီ အလိုမရှိ”၊ “စီမံကိန်းနောက်ကွယ်တွင် အဓိက ကြိုးကိုင်နေသူ တားတောင်တန်း အလိုမရှိ”၊ “သတ္တုစီမံကိန်း သဘောတူညီစာချုပ် အလိုမရှိ” စသည့် ကြွေးကြော်ချက် ဆိုင်းဘုတ်များ ကိုင်ဆောင်ကာ ဆန္ဒထုတ်ဖော်ခဲ့ကြသည်။

နမ့်ခမ်းမြို့နယ် မန်စပ်ကျေးရွာရှိ ဒေသခံများမှ ဆီလီကွန်ကျောက် ဆက်လက်တူးဖော်နေသည့် ရွှေသီးနှံကုမ္ပဏီကို ရပ်တန့်ရန် အကြိမ်ကြိမ် စာပေးပို့ခဲ့သော်လည်း ကျေးရွာလူထု၏ တောင်းဆိုချက်များကို လျစ်လျူရှုထားပြီး လာရောက်ဖြေရှင်းပေးရန် ပျက်ကွက်ခဲ့ကြောင်း သိရသည်။

ပြီးခဲ့သည့် ဧပြီလ ၁၂ ရက်နေ့တွင် ကျေးရွာလူထုကို အသိပေး အကြောင်းကြားခြင်း မရှိဘဲ MGC ကုမ္ပဏီဘက်မှ ဆီလီကွန်ကျောက် (သလင်းကျောက်) ထုတ်လုပ်ရန် ကျေးရွာအုပ်ချုပ်ရေး တာဝန်ရှိသူများနှင့် (၃) နှစ် စာချုပ်ချုပ်ဆိုခဲ့ခြင်းကြောင့် ကျေးရွာလူထုများ သည်းမခံနိုင်ဘဲ ၎င်းသတ္တုတွင်းလုပ်ကွက်သို့ သွားရောက်၍ ဆန္ဒထုတ်ဖော်ခဲ့ကြကြောင်း ဒေသခံများက ပြောဆိုသည်။

ထိုကဲ့သို့ ဆန္ဒထုတ်ဖော်နေစဉ် TNLA တပ်သားများ၏ လာရောက်တားမြစ်ခြင်းကို ခံခဲ့ရပြီး ဦးဆောင်သူများကို ဖမ်းဆီးခေါ်ဆောင်သွားမည်ဟုလည်း ခြိမ်းခြောက်ပြောဆိုခဲ့ခြင်းကြောင့် ဝိုင်းဝန်းတားမြစ်ခဲ့ရကြောင်း ဒေသခံများက ပြောသည်။

နမ့်ခမ်းမြို့နယ် မန်စပ်ကျေးရွာတွင် ဆီလီကွန်ကျောက် ဆက်လက်တူးဖော်နေသည့် မြန်မာရွှေသီးနှံကုမ္ပဏီကို ရွာသားများ ဆန္ဒပြစဉ် TNLA တပ်သားများ လာရောက်တားမြစ်ခဲ့ခြင်းနှင့် ပတ်သက်၍ သျှမ်းသံတော်ဆင့်မှ TNLA ပြောရေးဆိုခွင့်ရှိသူ လွေးယေဦးထံ စာပို့မေးမြန်းထားသော်လည်း ပြန်လည်ဖြေကြားခြင်း မရှိသေးပါ။

ထို့အပြင် မြန်မာရွှေသီးနှံကုမ္ပဏီ၏ သတ္တုတူးဖော်ခွင့် လုပ်ငန်းလိုင်စင်မှာ ယမန်နှစ် ၂၀၂၄ ဒီဇင်ဘာလတွင် သက်တမ်းကုန်ဆုံးခဲ့သော်လည်း သတ္တုတူးဖော်မှုကို ရပ်ဆိုင်းခြင်း မရှိဘဲ အလုပ်သမားနှင့် စက်ယန္တယား အရေအတွက်တို့ကို TNLA ထံ စာရင်းလိမ်လည်တင်ပြ၍ ဆီလီကွန်ကျောက်ကို အလွန်အကျွံ တူးဖော်ပြီး တရုတ်နိုင်ငံသို့ တင်ပို့ရောင်းချနေကြောင်း ဒေသခံများထံမှ သိရသည်။

လက်ရှိတွင် ၎င်းဆီလီကွန်ကျောက် တူးဖော်မှု စီမံကိန်းကြောင့် ဒေသခံများ၏ လယ်မြေပျက်စီးခြင်း၊ တောတောင်ပျက်စီးခြင်းတို့အပြင် အလုပ်သမားများမှ ဒေသခံ အမျိုးသမီးများအပေါ် အဓမ္မလုပ်ရပ် ပြုလုပ်ခြင်း၊ လူ့အခွင့်အရေး ချိုးဖောက်ခြင်းနှင့် မူးယစ်ဆေးဝါး ရောင်းဝယ်ခြင်းများ ပြုလုပ်နေကြောင်း ဒေသခံများက ပြောဆိုသည်။