ရှမ်းပြည်တိုးတက်ရေးပါတီ/ ရှမ်းပြည်တပ်မတော် (SSPP/SSA) နှင့် ကိုးကန့်တပ်ဖွဲ့ MNDAA တို့အကြား ဖြစ်ပွားနေသည့် စစ်ရေးထိတွေ့မှု၊ စစ်ရေးတင်းမာမှုနှင့် ပတ်သက်၍ နှစ်ပါတီ ဗဟိုအဆင့် တွေ့ဆုံဖြေရှင်းသွားမည်ဖြစ်ကြောင်း SSPP ဘက်မှ ထုတ်ပြန်လိုက်သည်။

ဧပြီလ ၂၈-၂၉ ရက်အတွင်း SSPP/SSA နှင့် MNDJP/MNDAA တို့ စစ်ရေးထိတွေ့မှု (၈) နေရာ၊ နှစ်ဘက်တပ်များ ရုန်းရင်းဆန်ခတ် ထိုးကြိတ်ရိုက်နှက်ဖမ်းဆီးမှု (၂၄) နေရာအထိ ရှိခဲ့ပြီး နှစ်ဘက်ရဲဘော်များ ထိခိုက်ဒဏ်ရာ ရရှိခဲ့ကြောင်း SSPP ထုတ်ပြန်ချက်တွင် ဖော်ပြထားသည်။

“၁၀၂၇ စစ်ဆင်ရေး” ဒုတိယပိုင်းမှ စ၍ SSPP အုပ်ချုပ်ရေးနယ်မြေထဲ ဝင်ရောက်ဖြတ်သန်းခဲ့သည့် MNDAA အောက်ခြေတပ်ဖွဲ့များနှင့် SSPP အောက်ခြေတပ်များကြား ဘာသာစကား ပေါက်ကြားမှု အားနည်းခြင်း၊ MNDAA တပ်ဖွဲ့များ ဖြတ်သန်းသွားလာမှုကို ဗဟိုမှ တရားဝင် အကြောင်းကြားမှု အားနည်းခြင်းတို့ကြောင့် ဧပြီလ ၂၈-၂၉ ရက်နေ့တွင် ထိပ်တိုက်ဖြစ်ပွားမှု ဖြစ်ခဲ့ရကြောင်း ထုတ်ပြန်ချက်တွင် ရေးသားထားသည်။

ထို့အပြင် သီပေါမြို့နယ်အတွင်း ဖြစ်ပွားခဲ့သည့် SSPP/SSA နှင့် MNDAA တိုက်ပွဲကြား ထိခိုက်မှုများသည့် MNDAA တပ်က အင်အားထပ်မံဖြည့်တင်းနေကြောင်း ထုတ်ပြန်ချက်နှင့် မရှေးမနှောင်း အချိန်တွင် SSPP Info မှ သတင်းထုတ်ပြန်သည်။

၎င်းသတင်းထုတ်ပြန်ချက်ထဲတွင် ဧပြီလ ၂၉ ရက်၌ MNDAA မှ SSPP/SSA လှုပ်ရှားနယ်မြေထဲ ကျူးကျော်ဝင်ရောက်လာပြီး SSPP တပ်ဖွဲ့ဝင်များကို ဖမ်းဆီးရိုက်နှက်မှု၊ တပ်နေရာ အတင်းအကြပ် ပြောင်းရွှေ့ခိုင်းမှုကြောင့် နှစ်ဘက်ထိတွေ့တိုက်ပွဲ ၂ နာရီနီးပါး ဖြစ်ပွားကာ ထိခိုက်သေဆုံးမှုများလည်း ရှိခဲ့ကြောင်း ဆိုထားသည်။

အလားတူ SSPP ထိန်းချုပ်မှုအောက်ရှိ စိန်ကျော့တပ်စခန်းကို ကိုးကန့်တပ် MNDAA မှ ထိန်းချုပ်နိုင်ခဲ့ကြောင်း သတင်းမီဒီယာများက ဖော်ပြသော်လည်း လက်ရှိအချိန်တွင် SSPP/SSA မှ ပြန်လည်ထိန်းချုပ်နိုင်ခဲ့ကြောင်း သတင်းထုတ်ပြန်ချက်အရ သိရသည်။

လက်ရှိတွင် သီပေါမြို့နယ်အတွင်း SSPP/SSA တပ်စခန်းများ တည်ရှိရာ နားနန်းကျေးရွာ၊ နားတော်ကျေးရွာ၊ ခိုနန်းဖ၊ တင်းဟိုင်းကျေးရွာ၊ ဆင်ကျော့ ၊ နားတောင့်၊ နားမခေါ်၊ ဖာစေ (သီပေါ) စသည့် နေရာများ၌ ကိုးကန့်တပ် MNDAA မှ အင်အားဖြည့်တင်းမှုများ ပြုလုပ်နေပြီး နှစ်ဖက်တပ်ဖွဲ့ စစ်ရေးတင်းမာသည့် အခြေအနေများ ရှိနေကြောင်းလည်း SSPP Info သတင်းထုတ်ပြန်ချက်အရ သိရသည်။