သျှမ်းပြည် သီပေါမြို့နယ် နမ္မကျောက်မီးသွေးတွင်းရှိ ရှမ်းပြည်တိုးတက်ရေးပါတီ/ ရှမ်းပြည်တပ်မတော် SSPP/SSA တပ်စခန်းကို ဖယ်ရှားရန် ကိုးကန့်တပ်ဖွဲ့ MNDAA ဝင်ရောက်လာစဉ် နှစ်ဘက်သေနတ်ပစ်ခတ်မှု ဖြစ်ပွားခဲ့ကြောင်း စုံစမ်းသိရသည်။

ယနေ့ (ဧပြီလ ၂၉ ရက်) နံနက် ၁၀ နာရီခန့်တွင် သီပေါမြို့နယ် နမ္မကျေးရွာအုပ်စုရှိ နမ္မ၊ ကုန်းပေါင်းနှင့် နားနန်းကျေးရွာတဝိုက်ရှိ ကျောက်မီးသွေးတွင်းများတွင် အခြေစိုက်ထားသည့် SSPP တပ်စခန်းများကို ဖယ်ရှားရန် လားရှိုးဘက်မှ ကိုးကန့်တပ်သားများ ဝင်ရောက်လာစဉ် နှစ်ဘက်ထိတွေ့မှုဖြစ်ပြီး သေနတ်ပစ်ခတ်မှု ဖြစ်ပွားခဲ့ကြောင်း သီပေါဒေသခံများက ပြောသည်။

“ဒီမနက် ၁၀ နာရီလောက်မှာ MNDAA နဲ့ SSPP ပစ်ကြတာ ဟုတ်တယ်။ နမ္မကျောက်မီးသွေးတွင်း အထဲဘက်ထိ ရောက်လာတဲ့ ကိုးကန့်တပ်ကို SSPP က ဝိုင်းပြီး သေနတ်နဲ့ ပြန်ပစ်တယ်လို့ ကြားတယ်။ မနေ့ညကတည်းက ကိုးကန့်တပ်က နမ္မအုပ်စုထဲက နားနန်း၊ ကုန်းပေါင်းဘက် SSPP တပ်ကို သွားမောင်းထုတ်တာ အစောင့်ကိုလည်း ခြေထောက်နဲ့ ကန်တယ်”ဟု သီပေါဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။

သီပေါမြို့နယ် နမ္မကျောက်မီးသွေးတွင်း၌ SSPP နှင့် MNDAA တို့ နှစ်ဘက်ထိတွေ့မှုဖြစ်ပြီး သေနတ်ပစ်ခတ်သည့် အခြေအနေကို အတည်ပြုနိုင်ရန် SSPP ပြောရေးဆိုခွင့်ရှိသူ ဗိုလ်မှူးစိုင်းဖုန်းဟန် ထံ ဖုန်းဖြင့် ဆက်သွယ်ခဲ့သော်လည်း ဖုန်းလက်ခံဖြေကြားခြင်း မရှိပေ။

ယင်းမတိုင်ခင် ဧပြီလ နောက်ဆုံးပတ်မှစ၍ လားရှိုးဘက်မှ လာသည့် MNDAA တပ်သားများသည် SSPP ထိန်းချုပ်ထားသည့် နမ္မကျောက်မီးသွေးတွင်းကို စစ်ဆေးရန်ဟုဆိုကာ ကားတစ်စီးဖြင့် ရောက်ရှိလာပြီး SSPP ကို ကျောက်မီးသွေးတွင်းမှ ထွက်ခွာသွားရန် ပြောဆိုခဲ့ကြောင်း ဒေသခံများထံမှ သိရသည်။

ယမန်နေ့ (ဧပြီလ ၂၈ ရက်) ည ၇ နာရီခန့်တွင် နမ္မကျောက်မီးသွေးတွင်းသို့ ကိုးကန့်တပ်သားများ အင်အား (၃၀) ခန့် ထပ်မံရောက်ရှိလာပြီး နမ္မကျေးရွာအုပ်စု နားနန်းနှင့် ကုန်းပေါင်းဘက် အခြေစိုက်ထားသည့် SSPP တပ်စခန်းမှ ကင်းစောင့်တပ်သားကို ရိုက်နှက် ကန်ကျောက်ခဲ့သည့်အပြင် ပြည်သူနေအိမ်နှင့် ဘုန်းကြီးကျောင်းတို့ကိုလည်း ဝင်ရောက်ရှာဖွေ စစ်ဆေးခဲ့ကြောင်း ၎င်းဒေသခံ အမျိုးသားက ဆက်ပြောသည်။

“ကိုးကန့်တပ်က အရင် သုံးလေးရက်ကတည်းက နမ္မကျောက်မီးသွေးတွင်းကို စစ်ဆေးဖို့ဆိုပြီး ကားတစ်စီးနဲ့ သွားတာ၊ အဲ့မှာ SSPP ဘက်က ပေးမဝင်ဘူး။ ကိုးကန့်ဘက်က SSPP ကို တပ်ဆုတ်ဖို့ပြောတဲ့အချိန် မဆုတ်တဲ့အပြင် ရှေ့တိုးဖို့ လုပ်မယ်လို့ SSPP ဘက်က ပြန်ပြောတယ်။ SSPP ဘက်က တပ်ကို ရှေ့တိုးပြီး အမြင့်နေရာမှာ တပ်စွဲဖို့လုပ်မှာက ဒီနေ့၊ အဲ့မတိုင်ခင် မနေ့ည က ကိုးကန့်ထပ်ဝင်လာတာ”ဟု ၎င်းသီပေါဒေသခံ အမျိုးသားက ထပ်လောင်းပြောကြားတယ်။

လက်ရှိတွင် နမ္မကျောက်မီးသွေးတွင်း အနီးတဝိုက်သို့ နှစ်ဘက်တပ်ဖွဲ့များမှ အင်အားဖြည့်တင်းလာခြင်းကြောင့် စစ်ရေးတင်းမာမှု ဆက်ရှိနေပြီး ဒရုန်းပျံသန်းမှုများလည်း ရှိနေကြောင်း သိရသည်။

သီပေါမြို့နယ်ရှိ နမ္မကျောက်မီးသွေးတွင်း၌ SSPP အနေဖြင့် ဆယ်စုနှစ်ချီ၍ စခန်းချ တပ်စွဲထားပြီး ၎င်းတို့၏ ဘဏ္ဍာရေးအတွက် အရေးပါသည့် နေရာတစ်ခုဖြစ်ခြင်းကြောင့် မဟာမိတ်ဖြစ်သည့် MNDAA ကို မည်ကဲ့သို့ ပြန်လည်တုံ့ပြန် ဆောင်ရွက်မည်ကို စောင့်ကြည့်ရမယ်ဖြစ်ကြောင်း ဒေသခံများက ပြောဆိုသည်။

အလားတူ ယမန်နှစ် ၂၀၂၄ မတ်လနောက်ဆုံးပတ်ကလည်း သိန္နီမြို့နယ် နမ့်စလပ်တိုက်နယ်အတွင်း သွားလာလှုပ်ရှားနေသည့် SSPP/SSA နှင့် MNDAA တို့ နှစ်ဖက်ထိတွေ့ တိုက်ပွဲဖြစ်ပွားခဲ့ပြီး ထိုစဉ်က ကိုးကန့်တပ်ဖွဲ့ MNDAA မှ ဒရုန်း၊ ရှော့တိုက်ဒုံးများဖြင့် ပြန်လည်တိုက်ခိုက်ခဲ့ကြောင်း သိန္နီဒေသခံများထံမှ သိရသည်။

MNDAA အနေဖြင့် တရုတ်ဖိအားကြောင့် လားရှိုးမြို့ကို စစ်ကောင်စီထံ ပြန်လည်လွှဲပြောင်းလိုက်သော်လည်း လားရှိုးမြို့ပြင်ရှိ ကျေးရွာများတွင် ဆက်လက်တပ်စွဲထားကြောင်း ဒေသခံများထံမှ သိရသည်။