သျှမ်းပြည် သိန္နီမြို့ရှိ ပျက်စီးသွားသည့် မြို့မဈေးထဲ မူလဆိုင်ခန်းနေရာတွင် ပြန်လည်ဖွင့်လှစ် ရောင်းချနေသည့် ဈေးသည်များကို ကိုးကန့်တပ်ဖွဲ့ MNDAA ရဲများက လာရောက်နှင်ထုတ်ခဲ့ကြောင်း စုံစမ်းသိရသည်။

ယမန်နေ့ (ဧပြီလ ၁၅ ရက်) နံနက်ပိုင်းတွင် သိန္နီမြို့ ရပ်ကွက် (၁) ဈေးတန်းရပ်ရှိ ပျက်စီးသွားသည့် သိန္နီမြို့မဈေးထဲ မူလဆိုင်ခန်းနေရာတွင် ပြန်လည်ဖွင့်လှစ် ရောင်းချနေသည့် ဈေးသည်များကို ကိုးကန့်တပ်ဖွဲ့ MNDAA ရဲများက လာရောက်နှင်ထုတ်ခဲ့ပြီး ၎င်းတို့ အသစ်ဖွင့်လှစ်ထားသည့် ပန်လော့ရွာဘက်သို့ သွားရောက်ရောင်းချခိုင်းကြောင်း ဒေသခံများက ပြောသည်။

“စျေးထဲပြန်ရွှေ့ပြီးရောင်းကြတာ ၃ ရက် ၄ ရက်လောက်ရှိမယ်။ မနေ့က MNDAA ၄ ယောက်လောက်က စျေးသူစျေးသားတွေကို မောင်းထုတ်ကြတယ်၊ သူတို့လုပ်ထားတဲ့ ပန်လော့ရွာဘက်မှာ သွားရောင်းခိုင်းကြတယ်။ စျေးသူစျေးသားတွေက မကျေနပ်ကြဘူး။ ခုက အလကား သိမ်းချင်နေကြတာ၊ စျေးကို Casino ရုံလုပ်မယ်လို့တော့ ကြားထားတယ်”ဟု သိန္နီမြို့မဈေးမှ ဈေးသည်တစ်ဦးက သျှမ်းသံတော်ဆင့်ကို ပြောသည်။

ပြီးခဲ့သည့် ၂၀၂၄ ခုနှစ် ဇူလိုင် ၁၈ ရက်တွင် MNDAA ထိန်းချုပ်ထားသော သိန္နီမြို့ရှိ မြို့မဈေးကို စစ်ကောင်စီတပ်က လေကြောင်းမှ ဗုံးကြဲတိုက်ခိုက်ခဲ့ခြင်းကြောင့် ဆိုင်ခန်းများ ပျက်စီးဆုံးရှုံးခဲ့ပြီး ပြည်သူများမှာ ဈေးအနီး လမ်းဘေးတစ်လျှောက်၌ ဈေးရောင်းချခဲ့ရသည်။

ယခု ဧပြီလကုန်ပိုင်းမှ စ၍ သိန္နီမြို့တွင်းရှိ လမ်းဘေးတလျှောက်၌ ဈေးရောင်းချနေသော ဈေးသည်များကို MNDAA မှ ပန်လော့ရွာတွင် ဖွင့်လှစ်မည့် ဈေးသစ်၌ ပြောင်းရွှေ့ရောင်းချသွားရန် ကြေညာထားကြောင်း ဈေးသည်များထံမှ သိရသည်။

“သူတို့ မလာအုပ်ချုပ်ခင်ကတည်းက ဒီစျေးမှာ ကိုယ်ပိုင်ဆိုင်ခန်းနဲ့ ရောင်းနေကြတာ၊ စျေးကလည်း သိန္နီစော်ဘွားခေတ်ကတည်းက ရှိနေတာ။ မနေ့ကပဲ စျေးသူစျေးသားတွေ စုပြီး ရုံးမှာ ဆန္ဒသွားပြကြတာ၊ MNDAA ပြောတာတော့ အထက်လူကြီး မရှိဘူး နောက်မှလာလို့ပဲ ပြောတာ။ ဒီနေ့ ၁၆ ရက်နေ့လည်း လာပြီး မောင်းထုတ်နေကြတာ”ဟု သိန္နီမြို့မဈေးမှ ၎င်းဈေးသည်အမျိုးသားက ဆက်ပြောသည်။

သိန္နီမြို့ MNDAA မှ ပန်လော့ရွာဘက်တွင် ဖွင့်လှစ်မည့် ဈေးသစ်တွင် ဆေးဆိုင်ဖွင့်လှစ်ပါက တစ်လလျှင် ၅၀၀,၀၀၀ (ငါးသိန်း) ကျပ်၊ သစ်သီးဝလံ ရောင်းသည့် ဆိုင်ဖြစ်ပါက တစ်လလျှင် ၅၀,၀၀၀ (ငါးသောင်း) ကျပ်၊ ပျံကျဈေးသည် တစ်နေရာလျှင် တစ်လ ၂၀,၀၀၀ (နှစ်သောင်း) ကျပ်နှင့် အမှိုက်ခွန် ၁၅,၀၀၀ (တစ်သောင်းခွဲ) ကျပ် စသဖြင့် အခွန်အသီးသီးကို MNDAA ထံ ပေးဆောင်ရမည်ဖြစ်ကြောင်း သိန္နီမြို့ဈေးသည်များထံမှ သိရသည်။

“ပြည်သူ့သဘောထားလည်း မမေးကြဘူး၊ သူတို့စာထုတ်ချင်တိုင်း ထုတ်ပြီး စွတ်လုပ်နေကြတာ။ ယခုပေါက်စျေးနဲ့ ပြန်လျှော်ပေးရင် တစ်မျိုးပေါ့။ ပြီးတော့ ဆိုင်ခန်းခွန်လည်း နေရာလာတိုင်းပြီး ပိုက်ဆံတောင်းတာ၊ ဘယ်နှပေရှိလဲ ဆိုပြီး တွက်ပြီးတောင်းတာ။ တချို့ဆိုင်ဆို ၁ သိန်းကျော် ၂ သိန်းထိ ပေးရလို့ နေရာနည်းနည်းပဲ ခင်းတော့တာ”ဟု သိန္နီမြို့မှ ဈေးသည် အမျိုးသမီးတစ်ဦးက သျှမ်းသံတော်ဆင့်ကို ပြောသည်။

သိန္နီမြို့တွင် တစ်ပိုင်တစ်နိုင် ဈေးရောင်းချနေသည့် ပြည်သူများမှ ကိုးကန့်တပ် (MDNAA) ထံ အခွန်ပေးဆောင်ရမည့်အပြင် ဆိုင်ကယ်ဖြင့် နယ်လှည့်ဈေးရောင်းနေသည့် ဈေးသည်များလည်း MNDAA မှ ဈေးရောင်းလက်မှတ် ထုတ်ပေးပြီးမှသာ ရောင်းချရမည်ဖြစ်ကြောင်း ဆိုသည်။

ထို့ကြောင့် စီးပွားရေး ကြပ်တည်းမှုနှင့် အလုပ်အကိုင် ရှားပါးမှုကြား ပြည်သူများ၏ တစ်ပိုင်တစ်နိုင် လုပ်ငန်းများကို အခွန်ကောက်ယူမှုအပေါ် ရပ်ဆိုင်းပေးရန် (သို့မဟုတ်) လျှော့ချပေးရန် ဒေသခံများက တောင်းဆိုထားသည်။