TNLA ထိန်းချုပ်ထားသော သျှမ်းပြည်မြောက်ပိုင်း နမ့်ခမ်းမြို့နယ်ရှိ ရွှေလီမြစ်ထဲတွင် ရေဆော့ ကစားနေသည့် ကလေးတစ်ယောက် ရေနစ်ပျောက်ဆုံးနေကြောင်းသိရသည်။
နမ့်ခမ်းမြို့နယ် ဟိုဆိုင်းကျေးရွာရှိ ဟိုဆိုင်းချောင်းသာတွင် ဧပြီလ ၁၄ ရက် ညနေခင်းက ကလေးငယ် တစ်ဦး ရေနစ်ပျောက်ဆုံးမှုဖြစ်ပွားခဲ့ပြီး ယနေ့ ဧပြီလ ၁၅ ရက်နေ့အထိ အလောင်းရှာမတွေ့သေးဟု အခင်းဖြစ်သည့်နေရာသို့ သွားရောက်ကူညီရှာဖွေ ပေးသည့် နမ့်ခမ်းမြို့ ပရဟိတအဖွဲ့ဝင်တစ်ဦးက သျှမ်းသံတော်ဆင့်သို့ပြောသည်။
“ ညနေ ၄ နာရီခွဲလောက် ဖြစ်သွားတာ၊ ကလေးက ၁၅ နှစ်ပဲရှိသေးတာ၊ ပလောင်ကလေးလေး သူတို့နှစ်ယောက် တူတူလာဆော့ကြတာတဲ့ တစ်ယောက်ကျ ရေထဲပါသွားတာ အလောင်းတော့ ဖြစ်တဲ့ချိန်ကတည်းက စက်လှေ သမားတွေနဲ့သွားရှာပေးတာ မတွေ့သေးဘူး” ဟု ၄င်းကပြောသည်။
ထိုကလေးငယ်ရေနစ်သည့် ယမန်နေ့ ညနေခင်းပိုင်းတွင် ဟိုဆိုင်းကျေးရွာရှိ လယ်ကွင်းတစ်ချို့ မီးလောင်နေ သည့်အချိန်ဖြစ်နေသည်ဟုလည်း ထိုပရဟိတ အဖွဲ့ဝင်က ဆက်ပြောသည်။
“အဲ့ချိန်က လယ်ကွင်းမှာမီးလောင်နေတာ၊ မီးလောင်တဲ့နေရာကလည်း သူရေနစ်တဲ့ နားလေးမှာပဲ၊ မီးလောင်လို့ မီးသတ်ကားတွေလဲအများကြီးရောက်လာတော့ သူများက မီးလောင်နေတဲ့ဖက် ကိုပဲ အာရုံစိုက်နေတာ၊ ရေနစ်သွားတာကို သိတာ နောက်ကျသွားတာ” ဟုဆိုသည်။
ရေနစ်ပျောက်ဆုံးသည့်ကလေးသည် သျှမ်းပြည်မြောက်ပိုင်း၊ နမ့်ခမ်းမြို့နယ် လွယ်အွန်ကျေးရွာနေ မိုင်းနိုင်ထက် အသက် ၁၅ နှစ် ဖြစ်ကြောင်း စုံစမ်းသိရှိရသည်။
အလုပ်သင်သတင်းထောက် စိုင်းဟန်မော(ဝ်) ရေးသားသည်။
Leave a Comments