သျှမ်းပြည်မြောက်ပိုင်း နမ့်ခမ်းမြို့နယ်တွင် ယနေ့မနက်ပိုင်းက နေအိမ်တစ်လုံး မီးလောင်ပျက်စီးခဲ့ပါသည်။
TNLA ထိန်းချုပ်ထားသော နမ့်ခမ်းမြို့နယ်ရှိ ကွန်လုံကျေးရွာတွင် ဧပြီလ ၅ ရက် နံနက် ၁၀ နာရီအချိန်က နေအိမ်မီးလောင်ခြင်းဖြစ်ပြီး လူသူထိခိုက်သေဆုံးမှုတော့မရှိကြောင်း နမ့်ခမ်းမြို့ဒေသခံ အမျိုးသားတစ်ဦးက သျှမ်းသံတော်ဆင့်သို့ ပြောသည်။
“ဒီမနက် ၁၀ နာရီ ဝန်းကျင် ကွန်လုံရွာမှာ မီးလောင်တာ၊ လောင်တဲ့ချိန်က အိမ်ရှင်မရှိဘူး၊ ဘာကြောင့် လောင် တာလဲဆိုတာတော့ သေချာမသိသေးဘူး၊ အိမ်ရှင်ကစျေး သွားနေတာတဲ့၊ အိမ်မှာရှိတဲ့ ပစ္စည်းတွေတော့ အကုန် လောင်သွားတာ လူတော့ဘာမှမဖြစ်ဘူး” ဟု အဆိုပါအမျိုးသားက ပြောသည်။
အလားတူ ဧပြီလ ၁ ရက်နေ့တွင်လည်း သျှမ်းပြည်တောင်ပိုင်း ပင်လုံမြို့တွင် သင်္ကန်းပရိက္ခရာ ဆိုင် မီးလောင်ကျွမ်း မှုကြောင့် ၄ ဦးအသက်ဆုံးရှုံးခဲ့ရသည်။
ယခုကာလသည် အပူချိန်မြင့်မားသော နွေရာသီရောက်လာပြီဖြစ်သဖြင့် နေအိမ်တွင်လျှပ်စစ်မီးဖြစ်စေ ထင်း၊ မီးသွေး၊ ဖယောင်းတိုင်မီးများ ဖြစ်စေ သုံးစွဲပါက လုပ်ငန်းကိစ္စပြီးမြောက်သည်အထိအထူးစောင့်ကြည့်ရန် လိုအပ်ပါသည်။ နေအိမ်မှမထွက်ခွါမှီ နှင့်ညအိပ်တော့မည့်အချိန်တိုင်း အသုံးပြုနေဆဲလျှပ်စစ်မီးနှင့် ထင်း မီးသွေးမီးဖိုများကို သေချာစွာ ငြိမ်းသတ်ထားသင့်ကြောင်းလည်း မီးဘေးအန္တရာယ်ကာကွယ်ရေးအဖွဲ့အစည်းက တိုက်တွန်းနိုးဆော်ထားသည်။
အလုပ်သင် သတင်းထောက် စိုင်းဟန်မောဝ် ရေးသားသည်။
Leave a Comments