သျှမ်းပြည် နမ့်ခမ်းမြို့နယ်အတွင်း ကလေးငယ်ကို ပြန်ပေးဆွဲလုပ်သည့် အဖွဲ့အား အသေ တစ် ဦး၊ အရှင် (၂) ဦးကို တစ်နေ့တည်းအတွင်း ဖမ်းဆီးရမိကြောင်း စုံစမ်းသိရသည်။
ယနေ့ (အောက်တိုဘာ ၉) ရက် နံနက်ပိုင်း ၈ နာရီခွဲကျော်တွင် နမ့်ခမ်းမြို့နယ်၊ စာရေးတန်းရပ်ကွက် (ပွၵ့်ၸရေးတၢၼ်း) ၌ နေထိုင်သည့် အသက် (၄) အရွယ်ရှိ ကလေးငယ် တစ်ဦး ပြန်ပေးဆွဲခံရပြီး ပြန်ပေးဆွဲသည့် အဖွဲ့ဝင် တချို့ကို ဒေသအာဏာပိုင်းများက ဖမ်းဆီးရမိကြောင်း သိရသည်။
“ကလေးငယ် မူကြိုသွားဖို့ အမေဖြစ်သူက လိုက်ပို့နေတဲ့အချိန် လမ်းမှာပဲ အပြာနုရောင် Crown အမျိုးအစား ကားတစ်စီးပေါ်က အမျိုးသား ၅ ယောက်ဆင်းလာပြီးတော့ ကလေးငယ်ကို လုယူ သွားတာ။ အဲ့ဒါ အရပ်ထဲကရော နီးစပ်ရာ အဖွဲ့အစည်း နဲ့ အာဏာပိုင်တွေကိုရော အကြောင်းကြား ပြီး အကူအညီတောင်းတော့ လမ်းတွေပိတ်ပြီး စစ်ဆေးမှုပြုလုပ်ပေးခဲ့တယ်၊ ပြန်ပေးဆွဲလုပ်တဲ့အဖွဲ့ကို နမ့်ဖတ်ကာဘက် သွားတဲ့ လမ်းမှာ ဖမ်းမိတာ” ဟု ဖြစ်စဥ်ကို သိရှိသည့် နမ့်ခမ်းမြို့ခံ အမျိုးသား တစ်ဦးက သျှမ်းသံတော်ဆင့်ကို ပြောသည်။
အဆိုပါ ကလေးငယ်ကို ပြန်းပေးဆွဲလုပ်သွားသည့် အဖွဲ့သည် ကားနှစ်စီးဖြင့် နမ့်ခမ်း မြို့မှ နမ့်ဖတ်ကာ ဘက် ဖြတ်လမ်းဖြစ်သည့် ပြည်သူ့စစ် စစ်ဆေးရေးဂိတ် ရှိရာ လမ်းတစ်နေရာ၌ ဖမ်းမိခဲ့ရပြီး၊ အပြန် အလှန်ပစ်ခတ်မှုများလည်း ရှိခဲ့ကြောင်း သိရသည်။
ယင်းကဲ့သို့ အပြန်အလှန် ပစ်ခတ်မှုကြောင့် ပြန်ပေးဆွဲ အဖွဲ့မှ ကားနှစ်စီးအနက် ကားတစ်စီးက ထွက်ပြေးလွတ်မြောက် သွားပြီး ကလေးတင်ခေါ်လာသည့် ကားပေါ်မှ အမျိုးသား (၂) ဦးကို အရှင်ဖမ်းမိပြီး၊ နောက်ထပ် တစ်ဦးက သေဆုံးသွားကြောင်း လည်း အထက်ပါ အမျိုးသားက ဆက်ပြောသည်။
“ပြန်ပေးဆွဲအဖွဲ့နဲ့ ပစ်ခတ်မှုဖြစ်တဲ့ ပြည်သူ့စစ်က ဦးအောင်ထွန်း တပ်ဖွဲ့လို့ သိရတယ်။ ပစ်ခတ်မှုဖြစ်လို့ ပြန်ပေးဆွဲ အဖွဲ့က (၁) ဦးသေသွားတယ်၊ နောက် (၂) ဦးကတော့ အရှင်ဖမ်းမိ တာပေါ့။ ပစ်ခတ်မှု ဖြစ်တဲ့ အချိန်မှာ ကလေးငယ်ကိုလည်း ကျဥ်ထိဒဏ်ရာရထားလို့ အခုဆိုရင် ရွှေလီမြို့ထဲက ဆေးရုံမှာ ဆေးကု သမှုခံယူနေရတယ်” ဟု အထက်ပါ အမျိုးသားက သျှမ်းသံတော်ဆင့်ကို ပြောသည်။
ပြီးခဲ့သည့် သြဂုတ်လ ၂၈ ရက် မှာလည်း တာချီလိတ်မြို့ ဆန်ဆိုင်းရပ်ကွက်အတွင်းရှိ နေအိမ်တစ်အိမ်ကို ကားတစီး နှင့် မျက်နှာဖုံးစွပ် အမည်မသိ လူ ၃ ဦးက သေနတ်ကိုင်ဆောင်ပြီး အိမ်ထဲရှိနေသည့် အမျိုးသမီးတစ်ဦးကို တရွတ်တိုက် ဆွဲခေါ်ပြီး ပြန်ပြေးဆွဲရန် ကြိုးစားခဲ့သည့် ဖြစ်စဥ် ဖြစ်ပွားခဲ့သည်။
စစ်တပ်မှနိုင်ငံတော် အာဏာသိမ်းယူပြီးနောက်ပိုင်း နိုင်ငံ နှင့် တစ်ဝှမ်းလုံး၌ တရားဥပဒေ စိုးမိုးမှု ကင်းမဲ့ လာပြီး တရားမဝင် ငွေရှာချင်သည့် သောင်းကျန်းသူ အဖွဲ့များက ကလေးငယ်များ၊ အမျိုးသမီးများကို ပြန်ပေးဆွဲ ပြုလုပ်လာကြသည့်အတွက် ဒေသအတွင်း လုံခြုံရေးများလည်း ကင်းမဲ့နေသည်။
ထို့အပြင် နယ်စပ် ဒေသဖြစ်ကြသည့် မူဆယ်၊ နမ့်ခမ်း နှင့် တာချီလိတ်တို့လို နေရာများ၌ လူဝင်လူထွက် များပြားပြီး လက်နက်ကိုင် တပ်ဖွဲ့ ပေါင်းစုံက ဝင်ထွက်သွားလာနေသည့်အတွက် ရာဇဝတ်မှုလည်း ပိုမိုများပြားသည်။
Leave a Comments