သျှမ်းတောင်၊ ကလောမြို့နယ်၌ လာမည့် ဇန်နဝါရီ ၁၁ ရက် ကျင်းပမည့် စစ်ကောင်စီ ရွေးကောက်ပွဲတွင် မဲထည့်ပါက လိုင်စင်မဲ့ကား တရားဝင် စီးနင်းခွင့်ပြုမည်ဖြစ်ကြောင်း PNO- ပြည်သူ့စစ်ပါတီက မဲဆွယ် စည်းရုံးနေသည်ဟု ဒေသခံများက သျှမ်းသံတော်ဆင့်ကို ပြောသည်။
ယင်းသို့ လိုင်စင်မဲ့ကား တရားဝင် စီးနင်းခွင့် ရမည်ဟု စည်းရုံးရာတွင် ယှဉ်ပြိုင်မည့် လွှတ်တော် ကိုယ်စားလှယ်လောင်းက ဟောပြော စည်းရုံးခြင်း မဟုတ်ဘဲ ဒေသခံ PNO စည်းရုံးရေးမှူးများက နီးစပ်ရာ ကျေးရွာများတွင် လိုက်လံ ပြောဆို စည်းရုံးခြင်း ဖြစ်သည်ဟု အောင်ပန်းမြို့တွင် နေထိုင်သူ ဒေသခံ အမျိုးသား တဦး က ဆိုသည်။
“PNO အဖွဲံထဲကိုဝင်ရင် အဖွဲ့ဝင်ကတ် ထုတ်ပေးတယ်။ အဲကတ်နဲ့ ဝတ်သောက် (လိုင်စင်မဲ့) ကား စီးလို့ရတယ်ပေါ့။ ရဲဖမ်းရင် ပိုက်ဆံပေးစရာ မလိုဘူးပေါ့။ အဲလို စည်းရုံးတော့ ဒီ အောင်ပန်း ပတ်ဝန်းကျင်က ဓနုရွာတွေကတောင် PNO ထဲ ဝင်နေတာတွေ ရှိနေတယ်။ ဓနုပါတီ လူကြီးတွေ မကောင်းတော့ လူမျိုးပါ ဒုက္ခရောက်ရတာ” ဟု ၄င်းကရှင်းပြသည်။
လက်ရှိ စစ်ကောင်စီက ဒေသတွင် လိုင်စင်မဲ့ကားများ ဆက်တိုက် ဖမ်းဆီးနေရာ ကလောမြို့နယ် အတွင်း PNO ပြည်သူ့စစ်များပင် လိုင်စင်မဲ့ကား ပေါ်ပေါ်ထင်ထင် မစီးရဲသဖြင့် PNO အဖွဲ့ဝင် ကတ်ဖြင့် စီးနင်းနိုင်ရန်မှာ မဖြစ်နိုင်ကြောင်း ဒေသခံ အချို့က ဆိုသည်။
“သူတို့ ပအိုဝ်းနယ်မှာတော့ ရမှာပေါ့။ ဒီအောင်ပန်း ကလော ဘက်မှာက စစ်တပ်များတယ်။ PNO တွေတောင် ရဲကဖမ်းရင် ပိုက်ဆံပေးနေရတာကို” ဟု တခြား အောင်ပန်းဒေသခံ တဦးက ဆိုသည်။
လက်ရှိ ကလောမြို့နယ် စစ်ကောင်စီ ရွေးကောက်ပွဲတွင် ဓနုပါတီ၊ PNO ပြည်သူ့စစ်ပါတီနှင့် ကြံ့ခိုင်ရေးပါတီတို့ အပြိုင်အဆိုင် ဖြစ်နေချိန် ဓနုပါတီ ခေါင်းဆောင် အချို့ PNO ပြည်သူ့စစ်ပါတီထံမှ ငွေကြေးရယူ၍ ဓနုလူမျိုးများ PNO ကို မဲထည့်ရန် စည်းရုံးပေးနေကြောင်း ဒေသတွင်း သတင်းများ ထွက်ပေါ်နေသော်လည်း သီးခြား အတည်ပြုနိုင်ခြင်း မရှိသေးပေ။
သျှမ်းတောင် စစ်ကောင်စီ ရွေးကောက်ပွဲ ပထမပိုင်းတွင် PNO ပြည်သူ့စစ်ပါတီက တောင်ကြီး၊ လွိုင်လင်၊ ဟိုပုံး တွင် ပြည်သူ့လွှတ်တော်နေရာတွင် အနိုင်ရရှိခဲ့သည်။
Leave a Comments