သျှမ်းပြည် လားရှိုးမြို့ပေါ် လူနေရပ်ကွက်များသို့ လက်နက်ကြီး၊ ရှော့တိုက်ဒုံး ကျရောက်ပေါက်ကွဲခြင်းကြောင့် အမျိုးသမီး ၅ ဦးနှင့် ကလေး ၂ ဦး အပါအဝင် အရပ်သား ၁၄ ဦး ထိခိုက်သေဆုံးခဲ့ကြောင်း စုံစမ်းသိရသည်။
ယမန်နေ့ (ဇူလိုင်လ ၃ ရက်)မှ စတင်ပြီး ယနေ့ (ဇူလိုင် ၄ ရက်)အထိ လားရှိုးမြို့အခြေစိုက် ရမခ တိုင်းစစ်ဌာနချုပ်နှင့် စစ်ကောင်စီတပ်စခန်းများကို ညီနောင်မဟာမိတ်တပ်များက ထိုးစစ်ဆင် တိုက်ခိုက်နေစဉ် နှစ်ရက်အတွင်း လူနေရပ်ကွက်များသို့ လက်နက်ကြီး၊ ရှော့တိုက်ဒုံး ကျရောက်ပေါက်ကွဲခြင်းကြောင့် အမျိုးသမီး ၅ ဦးနှင့် ကလေး ၂ ဦး အပါအဝင် အရပ်သား ၁၄ ဦး ထိခိုက်သေဆုံးခဲ့ကြောင်း လားရှိုးဒေသခံများက ပြောသည်။
“ဒီမနက် ရပ်ကွက် (၉) ဘက် ခေးနင်းဘူတာဘက် လက်နက်ကြီးကျပြီး သားအမိ ၂ ယောက် ဆုံးတယ်။ နောက်ထပ် ရပ်ကွက် (၁၂) ဘက်က ရာစုသစ်ကိုယ်ပိုင်ကျောင်းနားလည်း ကျတယ်။ လူထိတာတော့ ဆေးရုံခေါ်သွားနေတယ်လို့ ပြောတယ်။ ရပ်ကွက် (၁၁) အုတ်ကွင်းဘက်လည်း ယောကျ်ားလေး ၂ ယောက် ခေါင်းပြတ်နဲ့ တစ်ယောက် အူပွင့်ပြီး ထပ်သေတယ်”ဟု လားရှိုးမြို့မှ ဒေသခံအမျိုးသားတစ်ဦးက သျှမ်းသံတော်ဆင့်ကို ပြောသည်။
လက်ရှိသတင်းရေးသားနေချိန်အထိ လားရှိုးမြို့ ရပ်ကွက်(၅) မန်အိုင်ရှိ စစ်ကောင်စီတပ်၏ ခြေမြန်တပ်ရင်း ခမရ-၅၀၇ တပ်စခန်းဘက်တွင် လက်နက်ကြီး၊ လက်နက်ငယ်များဖြင့် ဆက်လက်ပစ်ခတ်နေပြီး လေယာဉ်ပျံဝဲနေကြောင်း လားရှိုးဒေသခံများထံမှ သိရသည်။
အလားတူ လားရှိုးမြို့နယ် နမ့်ပေါင်တိုက်နယ်ရှိ စစ်ကောင်စီ ခလရ-၂၉၁ တပ်ရင်းကို ကိုးကန့်တပ်ဖွဲ့ MNDAA က ဒရုန်းဖြင့် ဗုံးကြဲတိုက်ခိုက်နေစဉ် ယနေ့ (ဇူလိုင်လ ၄ ရက်) နံနက် ၈ နာရီခွဲခန့်တွင် နမ့်ပေါင်ကျေးရွာ ရပ်ကွက် (၃) ရှိ လူနေအိမ်ပေါ် ဒရုန်းဗုံး ကျရောက်ပေါက်ကွဲပြီး အမျိုးသမီး ၂ ဦးအပါအဝင် စုစုပေါင်း ၃ ဦး ဒဏ်ရာပြင်းထန်ကြောင်း ဒေသခံများက ပြောသည်။
“ဒီမနက် ၄ နာရီခွဲကတည်းက စနေတာ အခုထိ သေနတ်သံ မငြိမ်သေးဘူး။ နမ့်ပေါင်တံတားနား ပစ်တာ ဘုန်းကြီးကျောင်းပေါ် ဒရုန်းကျတာလည်း ကိုရင်ဒဏ်ရာရတယ်။ ၈ နာရီခွဲ ဒီမနက် ရပ်ကွက် ၃ ဘက်မှာ ဒရုန်းလားမသိဘူး အိမ်ပေါ်ကျပြီး ၃ ယောက်မှန်တာ။ တချို့လည်း ကတုတ်ကျင်းတူးထားတာ အဲ့ထဲကို မိုးရေဝင်တော့လည်း နေမရလို့ ထွက်ပြေးရတာပေါ့”ဟု လားရှိုးမြို့နယ် နမ့်ပေါင်ကျေးရွာမှ အမျိုးသမီးတစ်ဦးက သျှမ်းသံတော်ဆင့်ကို ပြောသည်။
နမ့်ပေါင်ကျေးရွာတွင် ပြည်သူနေအိမ်ပေါ် ဒရုန်းဗုံး ကျရောက်ပေါက်ကွဲခြင်းကြောင့် ထိခိုက်ဒဏ်ရာရသူများမှာ အသက် (၄၅) နှစ်အရွယ်ခန့်ရှိ ပီနန်းမို၊ ၁၈ နှစ်အရွယ် သမီးဖြစ်သူနှင့် အသက် (၇၀) နှစ်အရွယ်ခန့်ရှိ ဦးကျော်ပီးမှာ ဒဏ်ရာပြင်းထန်ကြောင်း သိရသည်။
ယမန်နေ့ (ဇူလိုင်လ ၃ ရက်) ညနေ ၅ နာရီခန့်ကလည်း လားရှိုးမြို့ ရပ်ကွက်(၄) ပန်အုပ်ဘုန်းကြီးကျောင်းဝင်းထဲ ရှော့တိုက်ဒုံး ကျရောက်ပေါက်ကွဲခဲ့ရာ အရပ်သား (၁) ဦး သေဆုံးပြီး စစ်ဘေးရှောင် ၇ ဦးကျော်နှင့် ကိုရင်များ ထိခိုက်ဒဏ်ရာ ရရှိခဲ့ကြောင်း ဖြစ်စဉ်သိရှိသူများထံမှ သိရသည်။
လားရှိုး ခမရ တိုင်းရုံးနှင့် တက္ကသိုလ်ကြားရှိ ရပ်ကွက်(၁) ဗျူဟာလမ်းတွင်လည်း ဒရုန်းဗုံးကြောင့် အမျိုးသမီးနှင့် ကလေးအပါအဝင် မိသားစု (၆) ဦးလည်း ယမန်နေ့ (ဇူလိုင်လ ၃ ရက်) နံနက်အစောပိုင်းက နေအိမ်၌ ပွဲချင်းပြီးသေဆုံးခဲ့ကြောင်း လားရှိုးဒေသခံများက ပြောသည်။
ထို့အပြင် လားရှိုးမြို့နယ် နမ့်ပေါင်ကျေးရွာတွင်လည်း ပြည်သူနေအိမ်ပေါ်သို့ ကိုးကန့်တပ်ဖွဲ့ MNDAA ၏ ဒရုန်းဗုံး ကျရောက်ပေါက်ကွဲခြင်းကြောင့် လင်မယားနှစ်ဦး ထိမှန်ခဲ့ပြီး အမျိုးသမီးမှာ ပွဲချင်းပြီး သေဆုံးသွား၍ အမျိုးသားမှာ ခြေထောက်နှစ်ဘက်စလုံး ပြတ်သွားပြီး နမ့်ပေါင်ဆေးရုံတွင် ဆေးကုသမှု ခံယူနေရကြောင်း ဒေသခံများထံမှ သိရသည်
Leave a Comments