သျှမ်းပြည်မြောက်ပိုင်း၊ နောင်ချိုမြို့နယ် တောင်းခမ်းဒေသရှိ အမြောက်တပ်ရင်းများတွင် စစ်ကောင်စီနှင့် TNLA ပူးပေါင်းတပ်ဖွဲ့တို့ တိုက်ပွဲဆက်လက် ပြင်းထန်နေပြီး စစ်ကောင်စီဘက်မှ အင်အားအလုံးအရင်း ဖြည့်တင်းနေကြောင်း သတင်းရရှိသည်။

ဧပြီလ(၂)ရက်နေ့မှ (၂၂)နေ့အထိ ရက်ပေါင်း (၂၀)ကြာ TNLAတို့ အပစ်အခတ် ရပ်စဲကြောင်း စစ်ကောင်စီဘက်မှ ကြေညာထားသော်လည်း နောင်ချိုမြို့နယ် တောင်းခမ်းဒေသသို့ စစ်အင်အား အလုံးအရင်း ဖြည့်တင်းခြင်း၊ TNLA နှင့် တော်လှန်ရေးတပ်ဖွဲ့များကို ထိုးစစ်ဆင် တိုက်ခိုက်ခြင်းများ ပြုလုပ်နေကြောင်း မြေပြင်တွင် တိုက်ပွဲဝင်နေသည့် ဓနုပြည်သူ့လွတ်မြောက်ရေးတပ်တော် DPLA နှင့် နီးစပ်သူတစ်ဦးက သျှမ်းသံတော်ဆင့်ကို ပြောသည်။

ထို့အပြင် စစ်ကောင်စီဘက်မှ အပြင်းအထန် ထိုးစစ်ဆင်နေပြီး လေကြောင်းအသုံးပြု တိုက်ခိုက်လာသည်မှာ ယခုရက်ပိုင်းတွင် ခပ်စိတ်စိတ်တွေ့လာရကြောင်း ၎င်းက ဆက်ပြောသည်။

“ခုထိ တိုက်ပွဲက ပြင်းထန်နေတုန်းပဲ။ မြေပြင်လည်း ထိုးစစ်ဆင်တာတွေ ရှိတယ်။ လေကြောင်းဗုံးကြဲတာက မကြာခဏဆိုသလို ဗုံးကြဲနေတယ်။ သူတို့ဘက်က အပစ်ရပ်တယ်ဆိုပေမဲ့ လေကြောင်းနဲ့လည်း ပစ်တယ်။ အခုထိလည်း တိုက်ပွဲ ဆက်ဖြစ်တုန်းပဲ” ဟု DPLA နှင့် နီးစပ်သူတစ်ဦးက သျှမ်းသံတော်ဆင့်ကို ပြောသည်။

နောင်ချိုမြို့နယ် တောင်းခမ်းဒေသတွင် စစ်ကောင်စီ၏ အမြောက်တပ်ရင်း ကွပ်ကွဲမှုဌာနချုပ် အခြေစိုက်ထားပြီး သျှမ်းပြည်မြောက်ပိုင်းမှ စစ်ရှုံးသွားသည့် စစ်ကောင်စီတပ်သား အများစုမှာ တောင်းခမ်းဘက်တွင် လာရောက်စုပေါင်း၍ ထိုးစစ်ဆင်နေသောကြောင့် တိုက်ပွဲများ ရှည်ကြာနေခြင်းဖြစ်ကြောင်း အဆိုပါ DPLA နှင့် နီးစပ်သူ အမျိုးသားက ပြောသည်။

အလားတူ အပစ်ရပ် ကြေညာထားသည့် စစ်ကောင်စီတပ်မှ TNLA ထိန်းချုပ်ထားသည့် မိုးကုတ်နှင့် နောင်ချိုမြို့နယ်များကို လေကြောင်းဖြင့် ဗုံးကြဲတိုက်ခိုက်ခြင်းများ လုပ်ဆောင်ကြောင်းခဲ့ကြောင်း TNLA ထုတ်ပြန်ချက်အရ သိရသည်။

ကိုးကန့်တပ်ဖွဲ့ MNDAA သည် တရုတ်ဖိအားကြောင့် သျှမ်းပြည်မြောက်ပိုင်း မြို့တော် လားရှိုးမြို့ကို စစ်ကောင်စီထံ ပြန်အပ်ပြီး ဧပြီလ (၁၇) ရက်နေ့ နောက်ဆုံးထား၍ ပြန်လည်ဆုတ်ခွာမည် ဆိုသောကြောင့် နောင်ချို၊ ကျောက်မဲနှင့် သီပေါမြို့များကို ထိန်းချုပ်ထားသည့် TNLA နှင့် တော်လှန်ရေးအင်အားစုအပေါ် သက်ရောက်မှုများ ရှိလာနိုင်သည်ဟု DPLA နှင့် နီးစပ်သူ ၎င်းအမျိုးသားက ဆက်ပြောသည်။

“လားရှိုးကို စစ်ကောင်စီထံ ပြန်အပ်မယ်ဆိုတော့ ကျနော်တို့ တော်လှန်ရေး အင်အားစုအပေါ်မှာ သက်ရောက်မှု တစ်မျိုးမျိုးတော့ ရှိလာနိုင်တယ်။ ကျနော်တို့အနေနဲ့ အများကြီးတော့ မစိုးရိမ်ပါဘူး။ ပြင်ဆင်မှုတွေတော့ အများကြီး ရှိတယ်။ နိုင်ငံရေး အပြောင်းအလဲအတွက်လည်း ပြင်ဆင်ထားတယ်။ ကျနော်တို့ ရည်မှန်းချက်အတိုင်းတော့ အကောင်အထည်ဖော် ဆောင်ရွက်သွားမှာပဲ” ဟု အဆိုပါ အမျိုးသားက ထပ်လောင်းပြောသည်။

ပြီးခဲ့သည့် ဧပြီလ (၅) ရက် နေ့လယ်(၂)နာရီတွင် နောင်ချိုမြို့နယ် တောင်းခမ်းကျေးရွာရှိ (၉၀၂) တပ်စခန်းအနီး တိုက်ပွဲဖြစ်ပွားနေချိန် စစ်ကောင်စီတပ်မှ အဆိပ်ငွေ့ဗုံး( ၃)လုံး လာရောက်ကြဲချခဲ့ကြောင်း TNLA၏ ထုတ်ပြန်ချက်တွင် ဖော်ပြထားသည်။

အလားတူ မတ်လ (၂၈) ရက်တွင် မြန်မာနိုင်ငံတဝှမ်း အင်အားပြင်း ငလျင် လှုပ်ခတ်နေစဉ် နောင်ချိုမြို့နယ် နောင်လင်ကျေးရွာကို စစ်ကောင်စီတပ်က ဂျက်ဖိုက်တာဖြင့် လေကြောင်းဗုံးကြဲခဲ့ခြင်းကြောင့် ဓနုပြည်သူ့လွတ်မြောက်ရေးတပ်တော် DPLA မှ စစ်မေ (၆) ဦးနှင့် တပ်သား (၁) ဦး ကျဆုံးခဲ့ကြောင်း သိရသည်။

အဆိုပါ စစ်မေ(၆)ဦးနှင့် တပ်သားတစ်ဦးတို့သည် စစ်ကောင်စီတပ်မှ ဂျက်ဖိုက်တာဖြင့် လာရောက် ဗုံးကြဲတိုက်ခိုက်စဉ် ဗုံးခိုကျင်းထဲ ဝင်ပြေးရာမှ ဗုံးသီးများသည် ၎င်းတို့ ခိုအောင်းရာ ကတုတ်ကျင်းထဲသို့ ကျရောက်ခဲ့ခြင်းကြောင့်‌ နေရာတွင်ပင် ပွဲချင်းပြီး သေဆုံးခဲ့ကြရသည်ဟု သိရသည်။