သျှမ်းပြည် လားရှိုးမြို့တွင် မြို့သိမ်းတိုက်ပွဲအတွင်း လက်နက်ကြီးကြောင့် ထိခိုက်ပျက်စီးသွားသော ဒေသခံ နေအိမ်များကို ကိုးကန့်တပ်ဖွဲ့က လျော်ကြေးပေးခဲ့ကြောင်း သတင်းသိရသည်။

လားရှိုးမြို့ပေါ်တွင် “၁၀၂၇ စစ်ဆင်ရေး” ဒုတိယပိုင်းအတွင်း စစ်ကောင်စီတပ်နှင့် ကိုးကန့်တပ်ဖွဲ့ MNDAA တို့၏ တိုက်ပွဲများကြောင့် ဒေသခံနေအိမ်များသည် လေကြောင်း၊ လက်နက်ကြီး ပစ်ခတ်မှုများ ခံခဲ့ရပြီး ဒေသခံနေအိမ် များစွာ ထိခိုက်ပျက်စီးခဲ့သည်။

အိမ်ခြေတစ်သောင်းကျော်ရှိသည့် လားရှိုးမြို့တွင် ကိုးကန့်တပ်ဖွဲ့ MNDAA မှ လုံးဝ ထိခိုက်ပျက်စီးသွားပြီး ပြန်လည်နေထိုင်၍ မရတော့သည့် အိမ်ခြေ (၃၀၉) အိမ်ကို ယမန်နေ့ (ဧပြီလ ၇ ရက်) တွင် တစ်အိမ်လျှင် ကျပ်သိန်း (၅၀) နှုန်းဖြင့် လျော်ကြေးငွေ ပေးအပ်ခဲ့ကြောင်း လားရှိုးမြို့ ‌ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။

“သူတို့ကတော့ နည်းတာ များတာ ဆိုတာထက် လိုအပ်တာကို အရင်ကူညီတာပေါ့။ ဗုံးကျလို့ မီးလောင်သွားတဲ့ အိမ်တွေ လုံးဝပျက်စီးသွားတဲ့ အိမ်တွေကို အရင်ကူညီတာပေါ့။ ပြီးတော့ နေတဲ့အိမ် နည်းနည်းပါးပါး ထိခိုက်ပျက်ဆီးသွားတဲ့ အိမ်တွေကိုတော့ နောက်တစ်ခါ ကူညီမယ်ပြောတာပဲ။ တစ်အိမ်ကို သိန်း ၅၀ ကူညီတာပေါ့ မနေ့ကပေးတာ။ ဒီနေ့ပဲ သွားယူလာတာ အိမ်ခြေကတော့ ၃၀၉ အိမ်ရတာပေါ့”ဟု လားရှိုးမြို့ ဒေသခံအမျိုးသားတစ်ဦးက ပြောသည်။

လားရှိုးမြို့ရှိ နေအိမ် ၃၀၉ အိမ်အပြင် တိုက်ပွဲအတွင်း ထိခိုက်ပျက်စီးခဲ့သည့် အခြားကျန်ရှိနေသော နေအိမ်များကို မည်သည့်အချိန်တွင် လျော်ကြေးငွေ ထပ်ပေးရန် ပြောကြားခြင်း မရှိခဲ့ကြောင်း လားရှိုးမြို့ ဒေသခံအမျိုးသားတစ်ဦးက ဆက်ပြောသည်။

“ဒုတိယအကြိမ် ကူညီရင်တော့ တန်ဖိုးနည်းသွားမှာပေါ့ ရတာနည်းမယ်ပြောတယ်။ ဒါက ပထမဆုံး အကြိမ်ပါပဲ ဒီလိုပေးတာ။ ကျန်တဲ့အိမ်တွေကို နောက်ထပ် ဘယ်အချိန် ထပ်ပေးမလဲ ဆိုတာတော့ မပြောသေးပါဘူး”ဟု ၎င်းဒေသခံအမျိုးသားက ပြောသည်။

လတ်တလောတွင် တရုတ်၏ ဖိအားပေးမှုကြောင့် သင်္ကြန်အပြီး မြန်မာနှစ်ဆန်း (၁) ရက်နေ့ ဖြစ်သည့် ဧပြီလ (၁၇) ရက်အထိ လားရှိုးမြို့ပေါ်မှ MNDAA တပ်ဖွဲ့ဝင်များကို တပ်ဆုတ်ခွာရန် အချိန်ပေးထားကြောင်း သိရသည်။

ကိုးကန့်တပ်ဖွဲ့ MNDAA ထိန်းချုပ်ထားသည့် လားရှိုးမြို့ပေါ်သို့ စစ်ကောင်စီဘက်မှ ပြန်လည် ဝင်ရောက်မည် ဆိုခြင်းကြောင့် (ဧပြီလ ၃ ရက်) မှ စတင်၍ ဆေးရုံနှင့် ဌာနဆိုင်ရာရုံးများမှ ပစ္စည်းအားလုံးကို ကားကြီးကားငယ်ဖြင့် တင်ဆောင်ပြီး ကိုးကန့်တပ်သားများ မြို့ပေါ်မှ တပ်ဆုတ်ခွာရန် ပြင်ဆင်နေကြောင်း ဒေသခံများကပြောသည်။