သျှမ်းပြည်တောင်ပိုင်း၊ ရွာငံမြို့နယ် ရှိ တောကျယ်ရေပြာအိုင်သည် ငလျင်ဒဏ်ကြောင့် ရေပြာအိုင် အရောင်ပြောင်း သွားကြောင်း စုံစမ်းသိရှိရသည်။
ပြီးခဲ့သည့် မတ်လ (၂၈) ရက်နေ့ မွန်းလွဲပိုင်းတွင် လှုပ်ခတ်ခဲ့သော အင်အားပြင်းငလျင်ကြောင့် ရွာငံရေပြာအိုင် အပါအဝင် ရေထွက်ဦး အချို့ ရေနှောက် အရောင်ပြောင်းလဲမှုများ ဖြစ်ပေါ်သွားကြောင်း ဒေသခံများထံမှ သိရသည်။
“ငလျင်နောက်ဆက်တွဲ အနေနဲ့ အရောင်ပြောင်းသွားတာပဲ။ အရင်ရေကြီးတုန်းကလည်း အရောင်ပြောင်းသွားတယ်။ ဒါပေမဲ့ သူပြန်ပြာတယ်။ အခုငလျင်ကြောင့် ဆိုတော့ ပြန်ပြီးပြာအုံးမလားမသိဘူး။ ဒီနားက ရေထွက်အချို့လဲ ရေတွေ့နှောက်သွားတယ်။အခြေနေကတော့ သိပ်မကောင်းနေဘူး။” ဟု ဒေသခံ အမျိုးသမီး တစ်ဦးက သျှမ်းသံတော်ဆင့်ကို ပြောသည်။
အလားတူ ဟိုပုံး မြို့မဆည် အပေါ်ဘက် ရေထွက်ဦးတွင် လည်း ငလျင်လှုပ်ခတ်ပြီးနောက်ပိုင်း ရေအနီရောင်သို့ ပြောင်းလဲ သွားခဲ့ပြီး ယခုကဲ့သို့ ဖြစ်ရပ်မျိုးကို ပထမ ဆုံး ကြုံဖူးကြောင်း ဟိုပုံးဒေသခံ အမျိုးသားက ပြောသည်။
“ရေဆို လုံးဝအဝါရောင် ပြောင်းသွားတာ။ တစ်ခါမ မမြင်ဖူးဘူး။ ငလျင်နောက်ဆက်တွဲ အခြေနေပေါ့ဗျာ။ ရေကြီးတုန်းကတောင် အရောင်မပြောင်းဘူး။ အခု ရေအရောင်ပြောင်းသွားတော့ အနီးနားက ရေမှီခိုနေရတဲ့ သူတွေတော့ ဒုက္ခရောက်တာပေါ့ဗျာ။” ဟု ဒေသခံအမျိုးသားက ပြောသည်။
မြန်မာနိုင်ငံတွင် ငလျင်လှုပ်ခတ်ပြီး( ၄ )ရက်မြောက်နေ့တွင် သေဆုံးသူ ( ၁၇၀၀ )ကျော် ရှိပြီး၊ဒဏ်ရာ ရသူ (၃၄၀၀ )ပျောက်ဆုံးသူ (၃၀၀) ရှိသည်ဟု စစ်ကောင်စီက ထုတ်ပြန်ထားသည်။
Leave a Comments