သျှမ်းပြည် ဟိုပုံးမြို့ ရှင်လောင်းပွဲအပြန် လမ်းမှာအင်အားပြင်း ငလျင်လှုပ်ခတ်မှုကြောင့် မတော်တဆယာဉ်တိုက်မှုဖြစ်ပြီး အသက် ၈ နှစ်ကလေးငယ်တစ်ဦးအပါအဝင် ၄ ဦးသေဆုံးသွားခဲ့ကြောင်း သိရသည်။
မတ်လ ၂၈ ရက်နေ့ ညနေပိုင်းတွင် ဟိုပုံးမြို့နယ် ပန်လျှန်းရွာမှ ဒေသခံ ၄ ဦးသည် ဟိုပုံးမြို့ရှိ ရှင်းလောင်းပွဲသွားပြီး ပြန်လာရာ လမ်းတွင်အင်းအားပြင်း ငလျင်လှုပ်ခတ်မှုကြောင့် မတော်တဆ ယာဉ်တိုက်မှုဖြစ်ပြီး သေဆုံးသွားခဲ့ရကြောင်း ၎င်းတို့၏မိသားစုဝင်တစ်ဦးက သျှမ်းသံတော်ဆင်ကို ပြောသည်။
“ဟိုပုံးပွဲကို လာရင်းနဲ့အပြန်လမ်းမှာ ငလျင်လှုပ်လို့ သူတို့စီးတဲ့ကားနဲ့ တွဲကားတိုက်မိတာ။ ငလှုပ်လုပ်လို့ သူများလည်း အလုပ်ရှုပ်နေတာ၊ ကယ်ဆယ်ရေးသမားလည်း ချက်ချင်းရောက်မလာဘူး။ နောက်မနက်မှ ဖုန်းဆက်လာလို့ ဦးလေးတို့ ဆုံးပြီလို့သိရတာ” ဟု ၎င်းကပြောသည်။
သေဆုံးသူ ၄ ဦးထဲတွင် အသက် ၈ နှစ်အရွယ် နန်းဥမ္မာဦး၊ အသက် ၅၂ နှစ် ခွန်ပန်းအောင်နှင့် အသက် ၄၈ နှစ် မွိုးစောထွေးတို့မှာ မိသားစုဝင်များဖြစ်ကြပြီး အသက် ၄၈ နှစ် ခွန်းထွန်းကြည်သည် ပန်လျှန်းကျေးရွာ ဒေသခံတစ်ဦးဖြစ်ကြောင်း သိရသည်။
မတော်တဆယာဉ်တိုက်မှုကြောင့် သေဆုံးသွားရသော ပန်လျှန်းကျေးရွာမှ ဒေသခံ ၄ ဦး၏ အလောင်းကို မတ်လ ၂၉ ရက်တွင် မီးသင်္ဂြိုဟ်ခဲ့ကြောင်း သိရသည်။
ငလျင်ဒဏ်ကြောင့် မြန်မာတနိုင်ငံလုံး သေဆုံးသူ စုစုပေါင်း ၁,၇၀၀ ဦးကျော်၊ ဒဏ်ရာရသူ ၃,၄၀၀ ဦးနှင့် ပျောက်ဆုံးနေသူ ၃၀၀ ဦးရှိကြောင်း စစ်ကောင်စီက မတ်လ ၃၀ ရက်နေ့တွင် ထုတ်ပြန်သည်။
ထိုသေဆုံးမှုများသည် တနိုင်ငံလုံးအတိုင်းအတာဖြင့် ကောက်ယူနိုင်သည့် အချက်အလက်များ မဟုတ်သောကြောင့် မြေပြင်တွင် ထိုထက်မကသေဆုံးနိုင်သည်။
Leave a Comments