ပအိုဝ်းအမျိုးသားလွတ်မြောက်ရေးတပ်မတော် (PNLA) တပ်ဖွဲ့ဝင် (၆၁)ဦးသည် စစ်ကော်မရှင်တပ်နှင့် ပအိုဝ်းပြည်သူ့စစ် (PNO) ထံ အလင်းဝင်လာကြောင်း သတင်းရရှိသည်။

ပြီးခဲ့သည့် ဧပြီလ (၂၅)ရက်နေ့ ညနေအချိန်တွင် ဗန်းမတ်ဒေသတွင် ခွန်တန်(ခ)ဇာတ်လိုက် ဦးဆောင်သော PNLAတပ်ရင်း (၃၅၉)မှ တပ်ဖွဲ့ဝင် (၆၁)ဦးသည် စစ်ကော်မရှင်တပ်နှင့် ပအိုဝ်းပြည်သူ့စစ်(PNO)ထံတွင် လက်နက်ချ အလင်းဝင်ရောက်ခဲ့ကြောင်း PNO မှ အရာရှိတစ်ဉီးက သျှမ်းသံတော်ဆင့်ကိုပြောသည်။

ထိုသို့ လက်နက်ချ အလင်းဝင်ရောက်ပြီးနောက် ဧပြီလ (၂၆)ရက် ညနေ (၅)နာရီအချိန်တွင် ဗန်းမတ်ဒေသ တောင်ဘက် ရေသပြေ ကျေးရွာဘက်တွင် PNLA တပ်ဖွဲ့နှင့် PNOတို့ ထိတွေ့တိုက်ပွဲဖြစ်ပွားခဲ့သေးသည်။

“သူတို့လက်နက်ချ အညံ့ခံပြီး နောက်ရက်မှ တိုက်ပွဲဖြစ်တာ။ တိုက်ပွဲက နာရီဝက်ကြာတယ်။ PNLAတပ်က တပ်ဖွဲ့ဝင် (၆၁) ဦး ကို ဒီနေ့ ဧပြီလ (၂၈) ရက် ဟိုပုံးမှာ မိသားစုတွေ ဆွေမျိုးသားချင်းတွေနဲ့တွေ့ပြီးတော့ လက်မှတ်ထိုး ခိုင်းတယ် ပြီးရင် နေရပ်ပြန်ပို့ပေးတယ်။” ဟု ၎င်းအရာရှိကပြောသည်။

ထို့အပြင် လက်နက်ချ အညံ့ခံရာတွင် PNLA တပ်ရင်း (၃၅၉)မှ လက်နက်တို (၂၇)လက်နှင့် လက်နက်ရှည် (၃)လက်နှင့်တကွ အလင်းဝင်ရောက်လာကြောင်း ၎င်း အရာရှိတစ်ဦးက ပြောသည်။

အဆိုပါ PNLA တပ်ရင်းတစ်ခု လက်နက်ချရသည့်အကြောင်းမှာ စားနပ်ရိက္ခာခြားပါးမှု ကြောင့် လက်နက်ချအလင်းဝင်ရောက်လာသည်ဟု ထင်မြင်မိကြောင်း PNO တပ်ဖွဲ့မှ တာဝန်ရှိသူ တစ်ဦးက ပြောသည်။

“စားတာသောက်တာ အဆင်မပြေတာက တပိုင်း ၊ဒီလိုစားတာ သောက်တာ အဆင်မပြေတော့ တောထဲမှာ ရေရှည်နေဖို့အဆင်မပြေဘူး၊ ဒါကြောင့် သူတို့က အလင်းဝင်လာတာ၊ ဒီမှာက သူတို့မိဘတွေလည်းရှိတော့ ပြန်လာတာ။ ဗန်းမတ်ကတော့ ကျနော်တို့ PNO တပ်ဖွဲ့ပြန်ထိန်းချုပ်ထားတယ်၊ စစ်ရှောင်တွေကတော့ မရှိတော့ဘူး၊ အခုတော့ တိုက်ပွဲငြိမ်ပြီ ဘာမဖြစ်တော့ဘူး။”ဟု အဆိုပါ PNO တပ်ဖွဲ့မှ တာဝန်ရှိသူတစ်ဦးက ပြောသည်။

ခွန်တန်(ခ)ဇာတ်လိုက် သည်ယခင်က ဗန်းမတ်ကျေးရွာတွင် အခြေချနေထိုင်ခဲ့ပြီး PNOတပ်ဖွဲ့နှင့်ပူးပေါင်းကာ ပင်လောင်းမြို့နယ် ဆောင်းပြောင်းတိုက်ပွဲတွင် ပါဝင်ခဲ့ပြီး သဘောထားခြင်း မတိုက်ဆိုင်သည့်အတွက် PNLAတပ်ဖွဲ့ထံတွင် ခိုလှုံခဲ့သည်ဟုလည်း သိရသည်။

ထို့နောက် PNOတပ်ဖွဲ့က ဗန်းမတ်ကျေးရွာကို ထိန်းချုပ်ပြီးနောက် ခွန်တန်တို့အဖွဲ့သည် လက်နက်များဖြင့် PNOတပ်ဖွဲ့ထံ ပြီးခဲ့သည့် ဧပြီလ (၂၅)ရက်က လက်နက်ချ အလင်းဝင်ခဲ့သည်။

အဆိုပါ PNLAတပ်ရင်း (၃၅၉)မှာ လက်နက်ချသည့် အကြောင်းရာနှင့် ပတ်သက်၍ PNLAတပ်ဖွဲ့ ပြောရေးဆိုခွင့်ရှိသူကို သျှမ်းသံတော်ဆင့်က ဆက်သွယ်မေးမြန်းရာ ပြန်လည်ဖြေကြားခြင်းမရှိခဲ့ပေ။

ဆက်လက်ပြီး ပြီးခဲ့သည့် ဖေဖော်ဝါရီလ ပထမပတ်တွင် ဖြစ်ပွားခဲ့သော စစ်ပွဲကြောင့် ကဒူးကြီးဒေသမှ ဒေသခံ တစ်ထောင်ကျော် စစ်ဘေးတိမ်းရှောင်ခဲ့ရပြီး ယခု ဧပြီလအတွင်း စစ်ကော်မရှင်တပ်နှင့် တော်လှန်ရေး အင်အားစုတို့ ကြား စစ်ရေးအခြေနေတင်းမာမှုများ ဖြစ်နေသောကြောင့် ထပ်မံနေရာရွှေ့ပြောင်းနေရကြောင်း သိရသည်။