စစ်ကိုင်းတိုင်းဒေသကြီး၊ စစ်ကိုင်းတွင် ကူညီကယ်ဆယ်ရေး လုပ်သားများ များစွာလိုအပ်နေပြီး ပိမိထားသည့် အလောင်းများကိုထည့်ရန် အိတ်များလိုအပ်နေသည်ဟု စစ်ကိုင်းဒေသခံများထံမှသိရသည်။

ပြီးခဲ့သည့် မတ်လ (၂၈)ရက်နေ့မွန်းလွဲ ပိုင်းတွင် လှုပ်ခတ်ခဲ့သော အင်အားပြင်း ငလျင်ကြောင့် စစ်ကိုင်းတိုင်းတွင် ၈၀ ရာခိုင်နူန်းနီးပါး အဆောက်အုံ ပြိုကျပျက်စီးခဲ့ပြီး လူသေဆုံးမှုများလည်း ထောင်ချီအထိ ရှိနေကာ ယနေ့အထိ ကူညီကယ်ဆယ်ရေးများမရောက်လာကြသေးကြောင်း ဒေသခံအမျိုးသမီးတစ်ဦးက ပြောသည်။

“ဒီဘက်မှာ ကယ်ဆယ်ရေးတွေ အရမ်းလိုအပ်နေပါတယ်။ စစ်ကိုင်းလမ်းပိုင်းလည်း ပြတ်တောက်နေတော့ ရေလမ်းကပဲ လာလို့ရမယ်ထင်တယ်။ အစားသောက်တွေ ဆေးဝါး၊ရေသန့် တွေ အလောင်းထည့်တဲ့အိတ်တွေ အများကြီးလိုအပ်နေပါတယ်။တတ်နိုင်သလောက်ကူညီကယ်ဆယ်ရေးတွေ လုပ်ပေးပါအုံးရှင့်။”ဟု စစ်ကိုင်းဒေသခံအမျိုးသမီးတစ်ဦးကပြောသည်။

စစ်ကိုင်းတွင် မီးသတ်ရုံများလည်း ပြိုကျပျက်စီးကုန်တာကြောင့် ကူညီကယ်ဆယ်ရေးလုပ်သားများလည်း မရှိသေးတာကြောင့် အလောင်းများကို ဆယ်မထုတ်နိုင်သေးဘဲ အပုတ်နံ့များလည်းရနေသည်ဟု ၎င်းက ပြောသည်။

မန္တလေးဗဟိုပြုလှုပ်ခတ်ခဲ့သော မြေငလျင်သည် မန္တလေးတွင်သာမက မန္တလေးအနီးရှိ စစ်ကိုင်းတိုင်းကိုပါ အထိနာစေပြီး လူသေဆုံးမှုများကာ အဆောက်အုံပျက်စီးမှုများလည်း များစွာရှိနေသည်။

ထိုကဲ့သို့ အကူညီလိုအပ်နေသည့်စစ်ကိုင်းကို စစ်ကောင်စီမှ ကူညီကယ််ဆယ်ရေးကို ဦးစားပေးမလုပ်ကြောင်း သိရသည်။