ကရင်နီပြည်နယ် လွိုင်ကော်မြို့အဝင်အထွက်ရှိ စစ်ကောင်စီ စစ်ဆေးရေးဂိတ်တွင် မှတ်ပုံတင်စစ်ဆေးမှု တင်းကြပ်ခြင်းကြောင့် CDM ဝန်ထမ်း ၁၀ ဦးထက်မနည်း ဖမ်းဆီးခံရကြောင်း သတင်းရရှိသည်။

ယခု ၂၀၂၅ မတ်လ ပထမပတ်မှ စတင်၍ လွိုင်ကော်မြို့ အဝင်အထွက်ရှိ စစ်ကောင်စီ စစ်ဆေးရေးဂိတ် တွင် မှတ်ပုံတင်များကို Tablet ဖြင့် အချက်အလက် တိုက်ဆိုင်စစ်ဆေးမှု ပြုလုပ်ခြင်းကြောင့် အချက်အလက်များကို ကြည့်၍ ဖမ်းဆီးခံရသည့် CDM ဝန်ထမ်း ၁၀ ဦးထက်မနည်း ရှိနေကြောင်း လွိုင်ကော်မြို့ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။

“သူတို့ ဒီမြို့အဝင်အထွက်ဂိတ်က စစ်ဆေးမှု ပိုတင်းကြပ်နေတယ်။ ဖုန်းတွေရော၊ မှတ်ပုံတင်တွေက အချက်အလက် အကုန်ထွက်အောင် Tablet စက်နဲ့စစ်တာ။ တချို့တွေကြတော့ အိမ်ကိုပြန်ကြည့်တာ အဲ့လိုစစ်ဆေးမှု တင်းကြပ်ချိန်နဲ့ တိုးတာပေါ့။ မှတ်ပုံတင်စစ်လိုက်ရင် အကုန်ပေါ်တယ် အချက်အလက်တွေ၊ အဲ့ကြောင့်ဖမ်းခံရတဲ့ လူဦးရေက ၁၀ ယောက်လောက်ရှိမယ် အသိနှစ်ယောက် ပါတယ်”ဟု လွိုင်ကော်မြို့ ဒေသခံ ၎င်းအမျိုးသားက ပြောသည်။

Tablet ပါ အချက်အလက်များနှင့် တိုက်ဆိုင် စစ်ဆေးမှုကို လွိုင်ကော်မြို့ အားကစားနှင့် ကာယပညာ သိပ္ပံကျောင်းဝန်း စစ်ဆေးရေးဂိတ်တွင်ပြုလုပ်စစ်ဆေးနေကြောင်း လွိုင်ကော်မြို့ ဒေသခံများက ပြောသည်။

စစ်ကောင်စီတပ်မှ လွိုင်ကော်မြို့တွင် သင်္ကြန်ပွဲ ပြုလုပ်ရန်နှင့် မိုးဗြဲ-ဖယ်ခုံ နယ်စပ်တကြောတွင် တိုက်ပွဲများ ဖြစ်ပွားနေခြင်းကြောင့် လွိုင်ကော်မြို့တွင် လုံခြုံရေးပိုင်း ပို၍ စစ်ဆေးတင်းကြပ်မှုများ ပြုလုပ်နေကြောင်း သိရသည်။

လက်ရှိ မတ်လထဲတွင် စစ်ကောင်စီ၏ ဖိအားကြောင့် လွိုင်ကော်ဒေသခံ စစ်ဘေးရှောင်များလည်း နေရပ်သို့ ပြန်လာနေကြပြီး ရပ်ကွက်တစ်ခုတွင် စစ်ကောင်စီ စစ်ဆေးရေးဂိတ် အနည်းဆုံး ၄ ခုခန့် ထားရှိပြီး မှတ်ပုံတင် ပါမှသာ မြို့ထဲသို့ သွားလာခွင့်ပြုသည်။

အလားတူ ဆီဆိုင် – လွိုင်ကော်မြို့ ပြည်ထောင်စုလမ်းမကြီး တစ်လျှောက်တွင် စစ်ကောင်စီ စစ်ဆေးရေးဂိတ်နှင့် ပအိုဝ်းပြည်သူ့စစ် (PNO) ဂိတ် စုစုပေါင်း ၁၅ ခုထက်မနည်း ရှိကြောင်းသိရသည်။

လွိုင်ကော်-ဆီဆိုင်လမ်း တကြောတွင် စစ်ကောင်စီတပ်မှ နည်းလမ်းပေါင်းစုံဖြင့် စစ်ရေးလှုပ်ရှားမှု ပြုလုပ်နေခြင်းကြောင့် တော်လှန်ရေးတပ်များနှင့် စစ်ရေးအခြေအနေအရ အချိန်မရွေး တိုက်ပွဲထိတွေ့မှုများ ဖြစ်ပွားနိုင်ခြင်းကြောင့် ခရီးသွားလာခြင်းမပြုလုပ်ရန် KNDF မှ သတိပေးထားသည်။