ထိုင်းနိုင်ငံ ချင်းမိုင်မြို့ရှိ မြန်မာစားသောက်ဆိုင်များကို ထိုင်းအာဏာပိုင်များက ယခုရက်ပိုင်း ရှောင်တခင် စစ်ဆေးမှု ပြန်လည်ပြုလုပ်နေပြီး၊ အထောက်အထားမဲ့ ရွှေ့ပြောင်းအလုပ်သမားများ သတိထားရန် လိုအပ်ကြောင်း ရွှေ့ပြောင်းအလုပ်သမားအရေး ကူညီဆောင်ရွက်သူများက ပြောဆိုလိုက်သည်။

ယနေ့ (မတ် ၂၆ ရက်) နေ့လယ်ပိုင်းတွင် ချင်းမိုင်မြို့ရှိ မြန်မာစားသောက်ဆိုင် တစ်ခုကို ထိုင်းအာဏာပိုင်များက ရှောင်တခင် ဝင်ရောက်စစ်ဆေးမှု ပြုလုပ်ခဲ့ကြောင်း၊ ထိုစစ်ဆေးမှုတွင်လည်း အထောက်အထားမဲ့ ရွှေ့ပြောင်းအလုပ်သမား အမျိုးသမီးတစ်ဉီး ဖမ်းဆီးခံရကြောင်း သိရသည်။

ထိုဖမ်းဆီခံရသည့် အမျိုးသမီးသည် မြန်မာစားသောက်ဆိုင်တစ်ခုတွင် ဧည့်ကြို၊စာပွဲထိုး အလုပ်လုပ်ပြီး တစ်ရက်လျှင် ထိုင်းဘတ် နှစ်ရာသာရကြောင်း Chiangmai Immigration က သတင်းထုတ်ချက်တွင် ဖော်ပြထားသည်။

“ကျနော်တို့တွေ အမြဲတမ်း သတိတော့ ရှိရတယ်။ မြန်မာဆိုင်ဆိုရင် ဘေးပတ်ဝန်းကျင်က တိုင်ချင်ကြတယ်လေ၊ လက်မှတ်မရှိရင်တော့ ပိုသတိထားရသလို လက်မှတ်ရှိပြီးရင်လည်း အလုပ်ရှင် မှန်ကန်မှု ရှိ၊ မရှိ ကလည်း သတိထားရပြန်တယ်”ဟု ရွှေ့ပြောင်းအလုပ်သမားအရေး ကူညီဆောင်ရွက်နေသည့် အမျိုးသားတစ်ဉီးက ပြောသည်။

စစ်အာဏာသိမ်းပြီးနောက်ပိုင်း စစ်ကောင်စီ၏ ပြည်သူ့စစ်မှုထမ်း ဉပဒေ ထွက်ပေါ်လာပြီးနောက် မြန်မာနိုင်ငံသား အများအပြားသည် ထိုင်းနိုင်ငံသို့ အလုံးအရင်း ရွှေ့ပြောင်းလာကြသည်။

လာမည့် ဧပြီလဆန်းပိုင်းတွင်လည်း စစ်အာဏာသိမ်းခေါင်းဆောင် မင်းအောင်လှိုင်သည် ထိုင်းနိုင်ငံ ဘန်ကောက်မြို့တွင် ကျင်းပမည့် BIMSTEC အစည်းအဝေးကို ကိုယ်တိုင် တက်ရောက်ရန် ရှိကြောင်း ထိုင်းသတင်းဌာနများက ရေးသားထားသည်။

“ကျနော်တို့ မြန်မာလူမျိုးတွေအနေနဲ့ အခုနောက်ပိုင်း ပိုပြီး သတိထားဖို့ လိုအပ်တယ်။ ထိုင်းအာဏာပိုင်နဲ့ စစ်ကောင်စီကြား ဆက်ဆံရေး ကောင်းမွန်နေတယ်။ စစ်ကောင်စီဘက်က တောင်းဆိုမှုတွေကိုလည်း လိုက်လျောပြီး လုပ်ပေးတာတွေ ရှိလာနိုင်တယ်။ ကျနော်တို့ ဒီဘက်က အထောက်အထားမဲ့တွေကို ဖမ်းဆီးပြီး မြန်မာပြည်ပြန်ပို့တာ ပိုလုပ်လာနိုင်ခြေရှိတယ်”ဟု ရွှေ့ပြောင်းအလုပ်သမားအရေး ကူညီဆောင်ရွက်သူက ထပ်လောင်းပြောသည်။

ထိုင်းနိုင်ငံအတွင်း တရားမဝင် နေထိုင်နေသော နိုင်ငံခြားသားများကို စုံစမ်းစစ်ဆေးရေး စီမံချက်ဖြင့် ထိုင်းအာဏာပိုင်များသည် ချင်းမိုင်မြို့အတွင်းရှိ စားသောက်ဆိုင်များကို ရှောင်တခင် ဝင်ရောက်စစ်ဆေးဖမ်းဆီးမှုများ ဆက်တိုက်ပြုလုပ်နေကြောင်း သိရသည်။