သျှမ်းပြည်တောင်ပိုင်းတကြောရှိ အွန်လိုင်းကျားဖြန့် ငွေလိမ်ဂိုဏ်းများကို စစ်ကောင်စီမှ ယခုရက်ပိုင်း အသည်းအသန် ရှာဖွေဖမ်းဆီးမှုများ ပြုလုပ်နေကြောင်း စုံစမ်းသိရသည်။

မတ် ၂၂ ရက်မှ စတင်ပြီး စစ်ကောင်စီတပ်ဖွဲ့မှ ကျေးသီး၊ နမ့်စန်၊ ခိုလမ်နှင့် လဲချားမြို့နယ်အတွင်း အွန်လိုင်းကျားဖြန့် ငွေလိမ်ဂိုဏ်းများကို အသည်းအသန် ရှာဖွေဖမ်းဆီးမှုများ ပြုလုပ်ခဲ့ရာ ကျားဖြန့်လုပ်ကိုင်သူ (၇၀၀) ကျော်ကို ဖမ်းဆီးရမိခဲ့ပြီး ၎င်းတို့ကို သျှမ်းပြည်တောင်ပိုင်း နမ့်စန်မြို့ ရပ်ကွက်(၅) ရှိ အားကစားရုံတွင် ထိန်းသိမ်းထားသည်။

ထိုဖမ်းဆီး ထိန်းသိမ်းခံထားသည့် ကျားဖြန့်လုပ်ကိုင်သူ (၇၂၃) ဉီးထဲတွင် တရုတ်နိုင်ငံသား အများအပြား ပါဝင်ပြီး၊ ၎င်းတို့အတွက် နမ့်စန်မြို့ပေါ် ရပ်ကွက် (၅) ခုမှ တစ်ရပ်ကွက်လျှင် ထမင်းထုပ် (၁၅၀) ထုပ်စီ သွားရောက်ပို့ဆောင် ကျွေးမွေးရကြောင်း နမ့်စန်မြို့ဒေသခံ အမျိုးသားတစ်ဉီးက သျှမ်းသံတော်ဆင့်ကို ပြောသည်။

“ဖမ်းလာတဲ့ ၇၂၃ ယောက်ထဲမှာ တရုတ်လူမျိုးတွေက အများဆုံးပဲ။ အခု ကျနော်တို့ တစ်ရပ်ကွက်ကို ထမင်းထုပ် (၁၅၀) ထုပ်စီ သွားပေးရတယ်။ သူတို့က ပြည်သူပိုက်ဆံတွေ လိမ်စားနေတဲ့ သူတွေဆိုပြီးတော့ ကျားဖြန့်မလို့ အချို့ကလည်း မပေးချင် မကျွေးချင်ကြဘူး”ဟု ၎င်းဒေသခံ အမျိုးသားက ပြောသည်။

ဖမ်းဆီးရမိသည့် တရုတ်နိုင်ငံသားများကို စစ်ကောင်စီက ၎င်းတို့၏ နိုင်ငံသို့ ပြန်လွှဲပြောင်းရန် စီစဉ်နေကြောင်း၊ ထပ်မံဖမ်းဆီးထားသည့် ကျားဖြန့်များကို စစ်ကောင်စီက နမ့်စန်မြို့တွင်းသို့ ထပ်မံလာရောက် ပို့ဆောင်မည်ဟုလည်း ပြောဆိုထားကြောင်း ဒေသခံများထံမှ သိရသည်။

“တရုတ်နိုင်ငံသားတွေဆိုရင် စစ်ကောင်စီက သူတို့ တရုတ်နိုင်ငံကို ချက်ချင်း လွှဲပေးတယ်။ မြန်မာနိုင်ငံသားဆိုရင် ဖမ်းမိတာနဲ့ ပိုက်ဆံတောင်းပြီး ပြန်လွှတ်ပေးလေ့ရှိတယ်” ဟု နမ့်စန်မြို့ ကျားဖြန့် ဖမ်းဆီးမှုကိစ္စနှင့် ပတ်သက်ပြီး ဖြစ်စဉ်သိရှိသူ အသက် ၅၀ အရွယ်ခန့် ၎င်းအမျိုးသားက ပြောသည်။

ယမန်နှစ် ၂၀၂၄ ဇန်နဝါရီလအတွင်းကလည်း စစ်ကောင်စီ ဖမ်းဆီးရမိသည့် ကျားဖြန့်လုပ်ကိုင်သူ တရုတ်လူမျိုး (၁၀၀၀) ကျော်ကို ကားတင်ဆောင်ပြီး နမ့်စန်မြို့ကို ဖြတ်သန်းကာ သျှမ်းပြည် အရှေ့ပိုင်းမှ တဆင့် တရုတ်နိုင်ငံသို့ ပြန်လည်လွှဲပြောင်းပေးခဲ့ကြောင်း ဒေသခံများထံမှ သိရသည်။

အလားတူ မိုင်းရှူးမြို့နယ်အတွင်း အခြေစိုက်လုပ်ကိုင်နေသည့် ကျားဖြန့်ငွေလိမ်ဂိုဏ်းတစ်ခုကို ရှမ်းပြည်တိုးတက်ရေးပါတီ/ ရှမ်းပြည်တပ်မတော် (SSPP/SSA) က မတ်လ (၂၃) ရက်တွင် ဝင်ရောက်ဖမ်းဆီးခဲ့ရာ တရားမဝင် တရုတ်နိုင်ငံသား အချို့ ဖမ်းဆီး ရမိခဲ့ကြောင်း SSPP Info မှ သတင်းထုတ်ပြန်ထားသော်လည်း ဖမ်းဆီးရမိခဲ့သူ အရေအတွက်ကို ဖော်ပြထားခြင်း မရှိပေ။