လွိုင်ကော် – ဆီဆိုင်လမ်းကို ပြည်သူများ ခရီးသွားလာခြင်း မပြုလုပ်ရန် ကရင်နီအမျိုးသားများ ကာကွယ်ရေးတပ် (KNDF) ဗျူဟာ အမှတ်(၂)က ယမန်နေ့ (မတ်လ ၂၀ ရက်) တွင် အသိပေး ထုတ်ပြန်လိုက်သည်။
အဆိုပါ လွိုင်ကော်-ဆီဆိုင်လမ်း တကြောတွင် စစ်ကောင်စီတပ်မှ နည်းလမ်းပေါင်းစုံဖြင့် စစ်ရေးလှုပ်ရှားမှု ပြုလုပ်နေခြင်းကြောင့် တော်လှန်ရေးတပ်များနှင့် စစ်ရေးအခြေအနေအရ အချိန်မရွေး တိုက်ပွဲထိတွေ့မှုများ ဖြစ်ပွားနိုင်ကြောင်း အသိပေးထားသည်။
“နယ်မြေလုံခြုံရေးနှင့် စစ်ရေးအခြေအနေအရ မိဘပြည်သူများကို လိုက်နာပေးရန်၊ လက်ရှိ အချိန်မရွေး တိုက်ပွဲဖြစ်နိုင်ချေရှိတဲ့အတွက် ယာဉ်ကြီးနဲ့ ယာဉ်ငယ်များ ခရီးသွားလာခြင်း ခေတ္တ ယာယီရပ်ဆိုင်းထားပြီး အထူးသဖြင့် လိုက်ရန်ပေးရန်”ဟု ထုတ်ပြန်ချက်ထဲတွင် ရေးသားထားသည်။
အလားတူ သွားလာနိုင်မည့် အချိန်နှင့် နေ့ရက်များအား ပြန်လည် အသိပေးမည်ဖြစ်၍ အထက်ပါ ထုတ်ပြန်ချက်အတိုင်း လိုက်နာပေးပါရန် KNDF ဗျူဟာ အမှတ်(၂)က အသိပေး မေတ္တာရပ်ခံထားပါသည်။
ထို့အပြင် လွိုင်ကော်မြို့တွင် ယခု မတ်လ မှ စတင်ပြီး စစ်ကောင်စီတပ်က တော်လှန်ရေးတပ်ဖွဲ့ကို ထောက်ပံ့ပေးသည်ဟု စွပ်စွဲကာ KPay အသုံးပြုသူများကို လိုက်လံစစ်ဆေးမှု ပြုလုပ်ခြင်းကြောင့် ဖမ်းဆီးခံရသူ ၁၀ ဦးထက်မနည်း ရှိကြောင်း လွိုင်ကော် ဒေသခံ အမျိုးသားတစ်ဦးက ပြောသည်။
“ဒီလ အစကတည်းက KPay သုံးတဲ့သူတွေကို မှတ်ပုံတင်နဲ့တဆင့် စစ်ဆေးမှုတွေ လုပ်တယ်၊ ပုံစံအမျိုးမျိုးနဲ့ စစ်တယ်။ ကျနော် သူငယ်ချင်း ၂ ယောက်ဆို တော်လှန်ရေးကို ထောက်ပံ့တယ်ဆိုပြီး ဖမ်းသွားတယ်။ ထောင်ဒဏ် ၁၂ နှစ် ချမှတ်မယ်လည်း ပြောသေးတယ်။ အဖမ်းခံရတာ ၁၀ ယောက်မကဘူး”ဟု ဖြစ်စဉ်သိရှိသူ ၎င်းဒေသခံ အမျိုးသားက ပြောသည်။
လက်ရှိ မတ်လထဲတွင် စစ်ကောင်စီ၏ ဖိအားကြောင့် လွိုင်ကော်ဒေသခံ စစ်ဘေးရှောင်များလည်း နေရပ်သို့ ပြန်လာနေကြပြီး ရပ်ကွက်တစ်ခုတွင် စစ်ကောင်စီ စစ်ဆေးရေးဂိတ် အနည်းဆုံး ၄ ခုခန့် ထားရှိပြီး မှတ်ပုံတင် ပါမှသာ မြို့ထဲသို့ သွားလာခွင့်ပြုနေသည်ဟု ၎င်းက ဆက်ပြောသည်။
ကရင်နီပြည်နယ် လွိုင်ကော်မြို့ရှိ အဝေးပြေးယာဉ်ရပ်နားစခန်းကို ယခင်က နောင်ယားရပ်ကွက်တွင် ဖွင့်လှစ်ထားသော်လည်း လက်ရှိတွင် ကယားဒေးကွင်း အနီးသို့ ပြောင်းရွှေ့ဖွင့်လှစ်ခဲ့ကြောင်း ယာဉ်လိုင်းဂိတ်မှူးတစ်ဦးက သျှမ်းသံတော်ဆင့်ကို ပြောသည်။
ပြီးခဲ့သည့် မတ်လ ၁၉ ရက် နံနက်ပိုင်းတွင် ပြုလုပ်ခဲ့သည့် ဖွင့်ပွဲအခမ်းအနားတွင် စစ်ကောင်စီ ခန့် အပ်ထားသည့် ဝန်ကြီးချုပ် ဦးဇော်မျိုးတင်နှင့် ဌာနဆိုင်ရာ ဝန်ထမ်း၊ ယာဉ်လိုင်းပြေးဆွဲသူနှင့် ဒေသခံများ တက်ရောက်ခဲ့ကြောင်း ဒေသခံများထံမှ သိရသည်။
Leave a Comments