သျှမ်းပြည် ပြန်လည်ထူထောင်ရေးကောင်စီ/ သျှမ်းပြည်တပ်မတော် (RCSS/SSA) ဥက္ကဋ္ဌ ဗိုလ်ချုပ်ကြီး ယွက်စစ်သည် နမ့်စန်မြို့နယ် ဝမ်နောင်ကျေးရွာအုပ်စုရှိ မွေတော်ဘုရား ဓမ္မာရုံ ရေစက်ချလှူဒါန်းပွဲသို့ တက်ရောက်ခဲ့ကြောင်း သတင်းသိရသည်။

ယမန်နေ့ (မတ်လ ၁၉ ရက်) မွန်းလွဲပိုင်း၌ နမ့်စန်မြို့နယ် ဝမ်နောင်ကျေးရွာအုပ်စု ဟိုတိကျေးရွာရှိ တိလုံမွေတော်ဘုရားတွင် ပြုလုပ်သည့် စေတီရေစက်ချ လှူဒါန်းပွဲသို့ RCSS ဥက္ကဋ္ဌ ဗိုလ်ချုပ်ကြီးယွက်စစ်၊ ဒုဥက္ကဋ္ဌနှင့် စစ်ဦးစီးချုပ် ဗိုလ်ချုပ်ခေးငင်း တို့ တက်ရောက်လာပြီး ပေါ်လစီ မူဝါဒများ ရှင်းလင်းတင်ပြခဲ့ကြောင်း ဒေသခံများက ပြောသည်။

“စဝ်ယွက်စစ်ကတော့ ကိုယ့်လူမျိုးကို ချစ်တတ်ဖို့၊ မိဘကို ချစ်သလိုမျိုး ကိုယ့်ကို ကာကွယ်ပေးနေတဲ့ လူတွေကိုလည်း ချစ်တတ်ဖို့၊ နောက်ပြီးတော့ ဘယ်ကိုမှ မထွက်ပြေးကြဘဲနဲ့ စည်းစည်းလုံးလုံး ရှိကြဖို့ ပြောတယ်။ ကိုယ့်အချင်းချင်း စည်းလုံးညီညွတ်မှပဲ ငြိမ်းချမ်းရေး ရမယ်လို့ ပြောသွားတယ်”ဟု ပွဲတက်ရောက်ခဲ့သူ ဒေသခံ အမျိုးသမီးတစ်ဦးက သျှမ်းသံတော်ဆင့်ကို ပြောသည်။

ထို့အပြင် စိုင်းစိုင်းငင်းမှ ဒေသန္တရ အုပ်ချုပ်ရေးဆိုင်ရာများ ဟောပြောခဲ့ကြောင်း RCSS သတင်းများ ရေးသားဖော်ပြနေသည့် Tai Freedom မီဒီယာမှ သျှမ်းဘာသာဖြင့် ထုတ်ပြန်ထားသည်။

“ကိုယ့်ဒေသခံ အချင်းချင်း သူကြီးနဲ့ ရွာသားတွေကို ဖိနှိပ်တာ ခွဲခြားဆက်ဆံတာတွေ မလုပ်ဖို့၊ စည်းစည်းလုံးလုံး နေကြဖို့ ပြောတယ်။ ပြီးတော့ သစ်ပင်ကြီးတွေကို ခုတ်ပြီး ရွှေ့ပြောင်းတောင်ယာလို မလုပ်ကြဖို့၊ သစ်ပင်မရှိတော့ရင် ရေခမ်းပြီး ဒုက္ခရောက်ကြမယ်လို့ သတိပေးတယ်”ဟု ၎င်းဒေသခံ အမျိုးသမီးက ထပ်လောင်းပြောသည်။

အလားတူ ဟိုတိ မွေတော်ဘုရားပွဲတွင် နမ့်ခုံးရှမ်းများ ပရဟိတအသင်းဥက္ကဋ္ဌ၊ ကျားဖြူပါတီဝင်နှင့် သျှမ်းတပ်နှစ်တပ် ငြိမ်းချမ်းရေးသံတမန် ဖြစ်သူ ဦးညို မှ တောင်ကြီး၊ နမ့်စန်၊ ခိုလမ်၊ ကာလိ၊ ကွန်ဟိန်းမြို့များတွင် လူမှုကူညီရေး လုပ်ဆောင်နေမှုများ၊ SNDP ကျားဖြူပါတီမှ ရွေးကောက်ပွဲအတွက် ကြိုတင်ပြင်ဆင်မှုများအပြင် သျှမ်းတပ်နှစ်တပ်အကြား ဆက်ဆံရေးကိုယ်စားလှယ်အဖြစ် တာဝန်ယူထားမှု အခြေအနေများကို ရှင်းပြခဲ့ကြောင်း Tai Freedom မီဒီယာတွင် ဖော်ပြသည်။

ပြီးခဲ့သည့် မတ်လ (၁၅) ရက်နေ့ကလည်း ခိုလမ်မြို့ နောင်ဖာ၌ တည်ရှိသော စက်တော်ရာကျောင်းသို့လည်း RCSS ဥက္ကဋ္ဌနှင့် စစ်ဦးစီးချုပ်တို့ ရောက်ရှိခဲ့ကြသည်။

သျှမ်းပြည်နှင့် ပြည်ထောင်စု မြန်မာနိုင်ငံ၏ နိုင်ငံရေးပြဿနာ ဖြေရှင်းနိုင်ရေးအတွက် RCSS သည် တွေ့ဆုံဆွေးနွေးခြင်း နည်းလမ်းဖြင့် ကြိုးပမ်းဖြေရှင်းသွားမည်ဖြစ်ကြောင်း နှစ်ပတ်လည် အစည်းအဝေး ကျင်းပပြီးနောက် ဖေဖော်ဝါရီ (၂၅) ရက်တွင် ထုတ်ပြန်ထားသည်။