မြန်မာအမျိုးသား ဒီမိုကရက်တစ်မဟာမိတ် တပ်မတော် MNDAA ၏ ခရိုင်စစ်ဦးစီးမှူးများကို တရုတ်အာဏာပိုင်များ အရေးပေါ် ခေါ်ယူတွေ့ဆုံနေပြီး စစ်ကောင်စီနှင့်လည်း မတ်လ (၂၂) ရက်တွင် ထပ်မံတွေ့ဆုံ ဆွေးနွေးမည်ဖြစ်ကြောင်း စုံစမ်းသိရသည်။

ယမန်နေ့ (မတ်လ ၁၃ ရက်) မှ စတင်ပြီး ကိုးကန့်တပ်ဖွဲ့ MNDAA ဖွဲ့စည်းသတ်မှတ်ထားသည့် ကိုးကန့်ခရိုင်၊ ကွတ်ခိုင်ခရိုင်၊ သိန္နီခရိုင်နှင့် မုံးကိုးခရိုင်တို့မှ စစ်ဦးစီးမှူးများကို တရုတ်အာဏာပိုင်များမှ ကူမင်းမြို့သို့ အရေးပေါ် ခေါ်ယူတွေ့ဆုံနေသည်။

ထို့အတူ စစ်ကောင်စီနှင့် MNDAA တို့လည်း မတ်လ (၂၂) ရက်တွင် ထပ်မံတွေ့ဆုံ ဆွေးနွေးမည်ဖြစ်ရာ စစ်ကောင်စီနှင့် မတွေ့ဆုံခင်စပ်ကြား ကြိုတင်ဆွေးနွေးခြင်း ဖြစ်နိုင်ကြောင်း စစ်ရေးသတင်းရင်းမြစ်တစ်ဦးက သျှမ်းသံတော်ဆင့်ကို ပြောသည်။

“ခရိုင်စစ်ဦးစီးမှူးတွေကို တရုတ်က အရေးပေါ်ဆိုပြီး ခေါ်တွေ့နေတယ်၊ မနေ့ကမှ သွားကြတယ်။ ဘာတွေ ဆွေးနွေးမယ် ဆိုတာကတော့ မသိရသေးဘူး။ ကြည့်ရတာ ဒီလ ၂၂ ရက်နေ့ စစ်ကောင်စီနဲ့ ထပ်တွေ့မယ့် ဆွေးနွေးပွဲအတွက် ဖြစ်မယ်ထင်တယ်။ တရုတ်က ဘာတွေ ကြိုတင်ဆွေးနွေးမလဲ၊ ခေါ်သွားပြီး ပြန်မလွှတ်တော့ဘူးလား ဆိုတာလည်း မပြောတတ်ဘူး”ဟု စစ်ရေးသတင်းရင်းမြစ်တစ်ဦးက သျှမ်းသံတော်ဆင့်ကို ပြောသည်။

၎င်းတွေ့ဆုံမှု မတိုင်ခင် မတ်လဆန်းမှ စတင်ပြီး လားရှိုးမြို့မှ ကိုးကန့်တပ်သား အင်အားအများအပြား စစ်လက်နက် အပြည့်အစုံ ကိုင်ဆောင်ပြီး သိန္နီမြို့ဘက်သို့ မျက်နှာမူ၍ ချီတက်သွားခဲ့ခြင်းကြောင့် ယခင်က သတင်းထွက်ပေါ်ခဲ့သည့်အတိုင်း ဇွန်လမတိုင်မီ လားရှိုးမြို့ပေါ်မှ ကိုးကန့်တပ်များ အသုတ်လိုက် ဆုတ်ခွာသွားမည်ကို ဒေသခံများက စိုးရိမ်နေပြီး စစ်ကောင်စီနှင့် တိုက်ပွဲထပ်မံ ဖြစ်ပွားလာနိုင်ကြောင်း သုံးသပ်ပြောဆိုမှုများ ရှိနေသည်။

သို့သော် လားရှိုးမြို့မှ MNDAA တပ်ဆုတ်ခြင်းမျိုး မဟုတ်ဘဲ ပုံမှန် တပ်အပြောင်းအရွှေ့ ပြုလုပ်ခြင်းဖြစ်ကြောင်း၊ သီပေါမြို့နယ် နောင်အန်ကျေးရွာအုပ်စုနှင့် မိုင်းရယ်မြို့နယ် ဟိုယကျေးရွာအုပ်စုတွင်လည်း MNDAA ဘက်မှ ကတုတ်ကျင်း ခံတပ်များ အခိုင်အမာ တပ်စွဲထားဆဲဖြစ်ကြောင်း ၎င်းစစ်ရေးသတင်းရင်းမြစ်က ရှင်းပြသည်။

ထို့အပြင် လာမည့် မတ်လ ၁၅ ရက် နံနက်ပိုင်းတွင် ကိုးကန့်တပ်ဖွဲ့ MNDAA ထိန်းချုပ်ထားသည့် လားရှိုးမြို့ပေါ်ရှိ ဒေသခံများမှ ဦးဆောင်၍ တရုတ်နိုင်ငံ ဘေဂျင်းအစိုးရကို ဆန္ဒထုတ်ဖော်ပြီး မြန်မာပြည်တွင်းရေး ဝင်ရောက်စွက်ဖက်ခြင်း၊ ညီနောင်မဟာမိတ် ၃ ဖွဲ့ အပါအဝင် တိုင်းရင်းသားလက်နက်ကိုင် တပ်ဖွဲ့များ အားလုံးကို ဖိအားပေးခြင်း မပြုလုပ်ရန် စသည့် အချက်များကို တောင်းဆိုသွားမည်ဟု ဒေသခံများက ပြောဆိုသည်။

“ဒေသခံတွေပဲ ဦးဆောင်ပြီးတော့ တရုတ်အစိုးရကို ဆန္ဒပြမှာ။ တရုတ် ဘေဂျင်းအစိုးရက မြန်မာနိုင်ငံ ပြည်တွင်းရေး ကိစ္စအရပ်ရပ်ကို ဝင်ရောက်စွက်ဖက်ခြင်း မလုပ်ဖို့ပေါ့။ ညီနောင်မဟာမိတ် အပါအဝင် တိုင်းရင်းသားလက်နက်ကိုင်တပ်ဖွဲ့ အားလုံးကို တရုတ်အစိုးရဘက်က ဝင်ရောက်စွက်ဖက်တာ မလုပ်ဖို့၊ ဘယ်လို ဖိအားမျိုးမှ မပေးဖို့ ဒီအချက်တွေ ဆန္ဒထုတ်ဖော်သွားမယ်”ဟု ၎င်းဒေသခံ အမျိုးသားက သျှမ်းသံတော်ဆင့်ကို ပြောသည်။

ဒေသခံများ၏ ကြွေးကြော်သံ၊ တောင်းဆိုသံများကို မြန်မာ၊ အင်္ဂလိပ်၊ တရုတ် သုံးဘာသာဖြင့် ရေးသားပြီး လမ်းလျှောက်ချီတက်၍ ဆန္ဒထုတ်ဖော်မည်ဟု ကနဦး သိရှိရပြီး ကိုးကန့်တပ်ဖွဲ့ MNDAA ကိုလည်း အသိပေး အကြောင်းကြားထားကြောင်း သိရသည်။

သို့သော် လားရှိုးဒေသခံများမှ တရုတ်ဘေဂျင်းအစိုးရကို ဆန္ဒပြရန် လုပ်ဆောင်မည့်အပေါ် အမြင်သဘောထား အမျိုးမျိုး ကွဲပြားနေပြီး တရုတ်အစိုးရ၊ စစ်ကောင်စီနှင့် ကိုးကန့်တပ်ဖွဲ့ ပြဿနာအကြား လူထုအသုံးချခံ ဖြစ်သွားမည်ကို စိုးရိမ်ရကြောင်း နိုင်ငံရေးလေ့လာသုံးသပ်သူတစ်ဦးက ပြောဆိုသည်။

“တရုတ်၊ SAC နဲ့ ကိုးကန့်တပ်ကြားက ပြဿနာကို လူထုအသုံးချပြီး ကိုင်တွယ်ဖြေရှင်း တာမျိုးဆိုရင်တော့ ဒါကို လုံးဝကန့်ကွက် ရှုတ်ချသင့်တယ်။ အဖွဲ့အစည်း တစ်ခုခုကနေ ဖိအားပေး လုပ်ခိုင်းတာ မဟုတ်ရင်တောင်မှ ပြည်သူတွေကတော့ အာဏာရှင် မဆန်ဘဲ၊ စစ်ရေးအမိန့်ကနေ ဆင်းသက်လာတာ မဟုတ်ဘဲ ပြည်သူအုပ်ချုပ်တဲ့ အစိုးရမျိုးကို လိုချင်ကြတာ”ဟု သျှမ်းပြည် နိုင်ငံရေးလေ့လာသူတစ်ဦးက သုံးသပ်သည်။

ရုရှားနှင့် ဘီလာရုစ်နိုင်ငံမှ ပြန်ရောက်လာသည့် စစ်ခေါင်းဆောင် မင်းအောင်လှိုင်ကို တရုတ်နိုင်ငံ အာရှရေးရာ အထူးကိုယ်စားလှယ် မစ္စတာ တိန့်ရှီကျွင်းက မတ်လ (၁၀) ရက်နေ့တွင် နေပြည်တော်၌ လာရောက်တွေ့ဆုံခဲ့ပြီး ရွေးကောက်ပွဲ ကျင်းပနိုင်ရေး၊ မြန်မာနိုင်ငံ ငြိမ်းချမ်းရေး၊ အွန်လိုင်းကျားဖြန့် ပပျောက်ရေးနှင့် နှစ်နိုင်ငံ နယ်စပ်ကုန်သွယ်ရေး ကိစ္စရပ်များ ဆွေးနွေးခဲ့ကြောင်း စစ်ကောင်စီဘက်က သတင်းထုတ်ပြန်ထားသည်။